《李喬小說─寒夜》

 | | | 轉寄

變(9)

作者 李喬 漢羅翻寫：Suingi 2011.06.26

　　老丈人pûn兩個賴仔哄啊、勸啊。怕he罵到khoi了，總算掉頭走開，轉去了；kì-teû行到埂唇時，老丈人斡過頭來鄭重宣佈：

　　「等天光吧！天光後ngài尋彭阿強請人評評理看！」

　　「失禮，阿興……m̀過，m̀-he ngài去講ke。」阿枝仔先講話。

　　「Ên也轉去。He，he ngài m̀好。」

　　「盡要緊ke he若身體，人興。」

　　「好了。Ngài知。以後不了。露水當重。」人興過去扶阿枝仔。

　　「哎唷……」阿枝仔使勁爬起來時，肚臍下方ke深處，好恬恬閃過一絲沉沉ke刺痛。

　　「仰仔啦？」人興用力扶她起來。

　　「肚屎有兜仔……」

　　「壞了！敢會，跌傷了胎兒？」

　　肚屎，特別he下腹「尿臍頭」一帶，又來一擺針刺般ke劇痛。人興慌了，步樁一矮就oi lâu她背起來。她笑講肚屎恁大，仰仔背喏？人興講用揇轉去。她講m̀使。結果he攙扶她轉屋。

　　 Liá一折騰，早過了午夜。因為pha跌該一跤傷到胎氣——照算還oi十日八日正降ke——故所又一擺陣痛來臨ke時節，阿枝仔應承人興ke要求：lâu阿媽喊醒來。

　　「Pha會早產！」阿媽聽了解說後講。

　　「Ngài該死！Ngài！唉！仰結煞？仰結煞？」

　　「哼！有麼辦法？都he你！萬一阿枝仔仰仔……看你仰仔交代！」

　　「唉！He ngài該死！Ngài he……求，求妳，阿媽，看有mak-ke辦法……」人興急得歸身冷汗，就oi向丈母娘跪落去啦。

　　「阿媽！莫恁仰嚇他，看他急成該樣。」阿枝仔忍等疼痛安慰他：「放心，就he早產，也差m̀多了，m̀會有危險——你liá-ha mò ti屋肚徑手徑腳，到廳下坐ti藤椅項睡吧。」

　　阿興啊阿興！你liá-ha定著oi安靜，oi忍耐，你oi咬緊牙關。
　　Mò事情，阿枝仔定著平安mò事，她會，會生下一ke胖墩墩ke嬰仔——m̀使驚，m̀使，定著m̀使……人興一直提醒自家，抑制自家。

　　差m̀多會天光了吧。月亮西斜，囥ti烏葉竹ke後背，披掛ti山崗林梢ke月光，蒼黃又蓬鬆；深青泛烏ke夜空，像一張木然ke大面，擺ti該片，看來he án-ngiòng ke疲憊，mò奈！

　　阿枝仔ke陣痛加快，就像一般正常ke分娩共樣。M̀過出血現象來得異m̀正常；ti還吂oi來血ke時節就一直來了。看è出來，liá-he跌一跤造成ke；看起來第一胎m̀會順利生產吧。

　　「先生」徐日星ke餔娘，he蕃仔林庄公認ke「產婆」；她既經死在饑凍，liá-ha尋mò內路人了。阿興知自家阿媽識替人接過生，他就打暗摸lâu阿媽帶到許家。

　　天色既經朦朧發光，阿枝仔ke疼痛加劇，胎兒就mò「轉頭」移動ke跡象。

　　「恁仰m̀好……」

　　「在三對時內假使做m̀得……」

　　阿強伯也趕到了。天色既經大光，雙方爺ôi商量後決定馬上派四儕人到大湖街，看做得做m̀得護送一位真經ke「產婆」來幐手；另外也到關帝爺lâu萬善爺該片求取兩張「平安符」pûn產婦燒灰服用。