《李喬小說─寒夜》

 | | | 轉寄

變(8)

作者 李喬 漢羅翻寫：Suingi 2011.06.19

　　人興聽著liá一聲尖叫，也隱約知he阿枝仔發出ke。他想抗拒該沉重ke暈眩，但he mò成功；腦海度該銀白ke巨浪汹湧而來，他暈了過去。

　　阿枝仔也仆倒ti蕃薯壠間ke凹溝底背；便便大腹跌到頗為結實。她雙手兜等肚屎，遽遽跋hong起來，人興還睡ti該片。阿枝仔手爬腳蹶ke摸到人興身邊。

　　「阿興！阿興你？」

　　阿興he暈死過去了。阿枝仔想lâu人興盦盦覆ke圓身翻過來，m̀過翻m̀贏。她哇一聲噭了出來。

　　「哼！仰仔喏？」

　　許石輝帶等兩個賴仔，m̀知mak-ke時節就企到阿枝仔後背來。Liá一開口，lâu阿枝仔又嚇著。

　　「他，他，他yi像，yi像……嗚……」阿枝仔噭到伏在壠土項。

　　許石輝ti賴仔幐手下，lâu人興ke圓身翻轉過來；俯ti胸膛項試聽一下，嗯，心臟還微細ke跳動。

　　「死m̀了ke。」許斡過頭問妹仔：「他輒常夜來pûn彭家賣命，著mò？」

　　「……」阿枝仔搖搖頭。

　　「Mò？哼！妳心肝肚也mò許家啦？」

　　「M̀ he。Ngài sṳ̀ mò嘛清楚……」

　　「妳講妳完全m̀知他家神透外鬼？」

　　「……」阿枝仔m̀敢頭那tâng起來看阿爸。

　　「枉費畜妳一場，哼！」

　　Ti老人家責備妹仔ke時節，人興既經完全甦醒過來。Liá時節mò奈何掙扎ke企起來。他決定lâu話講清楚：

　　「阿爸，三哥，五哥，ngài mò，mò事了，請，請轉去吧。」

　　「Mò事？恁簡單？」老丈人講。

　　「你he講你m̀轉去囉？」五哥講。

　　「Ngài，ngài……阿爸，ngài會——日時頭，ngài會，會照樣盡力，做事。」

　　「日時頭也轉若彭屋作好了！」

　　

　　「當，當，當然he，he liá-ha ke屋家，許屋。」

　　「嗯，he許屋，m̀ he你姓彭ke屋。」

　　「也he，還有一年he……」他lâu心肝肚ke話老老實實講出來。

　　「好！還有一年！」老丈人吆吼像嗥：「該，彭人興：今晚liá帳，仰仔算？」

　　「……」

　　「阿爸，轉去吧。天光日，天光日再來講好mò？」阿枝仔央求。

　　「不，liá-ha就oi講清楚！」

　　「阿爸，ngài，m̀，ngài誤日時頭ke頭路……」

　　「莫m̀記得你自家講ke：還有一年，liá一年，包括暗晡頭！」

　　「Ngài……阿爸，ngài，ngài以後m̀會ko……就he了。」

　　「就恁簡單？」

　　「Mò，mò仰，仰仰，結煞？做，也做了，ngài……」人興開始按捺m̀ 不住了。

　　「He啊！Mò仰結煞？反正ngà妹仔肚屎肚既經有若彭屋ke孽種！」

　　阿枝仔ke噭聲又揚起，升高。人興頭磬磬企ti該片，淨可猛力咬牙，咬嘴唇；咬到嘴肚全he鹹鹹ke苦苦ke。