《李喬小說─寒夜》

 | | | 轉寄

變(7)

作者 李喬 漢羅翻寫：Suingi 2011.06.12

　　「Ngài 假使講喏？」

　　「阿枝仔妳，妳定著做m̀得，做m̀得講。」他深深透幾下大氣，講：「妳，妳oi替ngài想……」

　　「你也oi替ngài想！替肚屎肚ke細人仔想！」

　　「Ngài當，當打拼啊！妳莫冤枉ngài！」

　　「唉！人興，Ngài sṳ̀惜若身體……」

　　為了liá件事，兩公婆鬧到當m̀快樂。結婚voi一年，人興he百依百順ke好老公。料想m̀著liá節骨眼，竟然像一隻màng閹ke水牛牯共樣拗勁十足。

　　就恁仰，人興輒常暗夜，透支自家ke體力，then手彭屋liá片整地耕作。特別he月色好ke暗晡頭，他往往做到雞公第一道啼喊時分正歇工轉去。

　　Ti阿強伯父子liá片，mò幾日就發覺人興ke作為了。阿強伯lâu人興狠狠訓示一頓，並表示絕對不准他恁仰做。M̀過人興還he零星「偷做」了異多。阿強伯又譴又急，只得毅然表示：ko m̀停止，就oi向許石輝「告發」。Ḿ過，liá-he十分難講出來ke事，人興卻充份顯露他牛牯脾性來，就he m̀聽任何反對lâu勸告，繼續做落去。

　　人興日夜承擔過多ke體力消耗，看來還he當茁增。就he，膚色更烏了，肌肉更硬了，背板肩骨ke稜角顯得更粗更凸出了。他當沉默，m̀肯輕易講話，m̀過他好咧嘴mò聲ke憨笑。

　　阿枝仔忍啊忍，實在忍m̀核了，流等目汁央求他：

　　「好了，人興，你莫害自家thiám死好mò？」

　　「Ngài還好好咩。」他還he ti憨笑。

　　「你討厭ngài！你mò-oi ên……」阿枝仔摸等腹中胎兒：「該也m̀使恁仰——簡直he，想磨死自家！」

　　「會好咧，ko做，ko做幾日就差m̀多咧。」

　　「做m̀得！今晡日暗晡頭開始，絕對不准你ko去！」

　　人興憨笑，mò表示mak-ke。隔了兩暗晡頭，果然ti人家入睡後mò幾久後，他又khâi等钁頭行出大門。

　　He月色像銀ke暗晡頭。

　　人興來到伯公廟後背，門板岩外側彭家該垤旱田項；其實旱田ke模樣既經全pûn山洪沖失，liá-ha淨做得算he圃園。插落去半隻月ke蕃薯苗，既經開始「行藤」，蕃薯藤有兩臺尺左右，生到當好，既經蹶淰蕃薯壠項；月光下墨綠油亮ke，十分得人惜。

　　人興今夜ke頭路he除草lâu ti壠項添加泥土。他心肝肚想，liá份頭路做啊忒，差m̀多真做得歇手了。

　　「月夜除草添土，涼習習ke，有mak-ke m̀好。」他自語著。

　　 Liá-he做了會二十年ke老熟工。他做ke爽利又輕快；一壠壠ke薯園，yi遽就完成了一大片。M̀過，嗯，一連幾天日時頭掘樹根又劈柴ke粗重工，耗損力氣實在thet多，今夜還真he緊擘嘴擘鼻。頭那近頂門部位暈沉沉ke，目珠硬he擘m̀開。

　　「恁仰做m̀得——oi ko弄好五六壠正收工。」他暗自決定。M̀過實在支持m̀得咧，oi停下來休息一下——啄一下咕就好，他有liá經驗。

　　他擱下钁頭，挺腰彈腿企了起來，他又弓背捵腰正oi伸直雙臂來一下爽快ke大擘嘴。

　　好恬恬，一股強烈ke暈眩漫天徹ke覆蓋下來。M̀過意識ke中心部位還he維持一縷清醒；他調整步樁，mò pûn大幅度搖擺ke圓身仰倒落去。

　　Yi m̀簡單lâu voi仰倒落去ke身手pûn扶正；卻因用力過猛，圓身顛倒向前翻仆下來。Liá做m̀得。雙腳本能ke急速移動——án-ngiòng他ke圓身用大傾斜ke角度向前衝去。M̀好。腳尖踢著凸起ke壠土了，他重重摔到地泥項。

　　「啊！人興！」ti人興倒地ke同時，園唇有人尖聲驚喊，同時一ke身影撲了過來。