《李喬小說─寒夜》

 | | | 轉寄

人禍天災(18)

作者 李喬 漢羅翻寫：Suingi 2011.03.20

　　蒼天mò mak-ke表情，只回應以無窮無邊ke雨水。雨水既經滙成山洪，由上而下，不分左右，先灌淰乾涸ke山溝，然後灌淰山溪；tui山溪漲起，倒灌附近ke山園底背；山溪既經容納不下，每一ke山溝自身就擴大成山溪，liá正滙成ke山溪山洪特別狂烈澎湃，用萬馬奔騰之勢，饑渴ke吞噬每一垤低窪ke園圃，沖擊刷忒每一垤山園ke泥土。

　　「去看看！」阿強伯忽然間講。話聲急促沙瘂，yi像久聚喉頭，霍然彈跳出來ke。

　　「Mò-oi！危險！危險哪！」阿強婆企了起來。

　　阿強伯khâi等大山鋤，匆匆斡頭，只睞一眼就邁開大步行出禾埕。人傑也抓起一ke钁頭跈等去。良妹lâu老阿母同時伸手擘嘴，m̀過卻都半途停頓，mò lâu自家ke意思表達出來。

　　「Ngài也去看看。」阿漢對燈妹講。

　　「該……你定著，定著……」燈妹僅做得講到liá片，m̀ he講m̀出來，而he做m̀得講mak-ke。

　　順妹卻yi快就放開細人，雙手死命ke揪緊阿陵ke褲帶；為了驚力氣m̀-la，她手肘打彎，lâu上身ke體重也挺上去，硬oi將阿陵掙扎而起ke身體拖住。

　　「Mò-oi！Mò-oi！Pûn ngài死！Ngài死好了！Mò-oi哇！」順妹厲聲喊叫，顯然心神有兜狂亂。

　　「唉！好好，ngài mò-oi去看，妳放，放下。」阿陵順從ke靠過去。Liá一動作卻pûn順妹失忒重心，人便向後倒去。阿陵顧m̀得恁多，伸手去托順妹會著地ke圓身。阿陵ke手掌堵著該凸起ke肚屎，心頭一下悸動，他決心m̀去睬洪水了。他跍下去，lâu孩子lâu餔娘揇ti胸懷；他m̀管人家看著mak-ke，就恁仰kûi屋家人揇共下。

　　阿漢跈等人傑ke後背，離開庄子來到伯公廟前。想去門板岩下看該垤旱田，m̀過山洪既經漫到伯公廟唇；ko漲三尺，pha伯公伯婆就oi學泅水啦。放眼望去，該塊旱田既經he一片茫茫黃濁ke洪水，連旱田ke田埂，周圍ke菅草都看m̀到影仔。

　　「嗐……」阿強伯長長一嘆。嘆聲he空洞ke疲累，mò力ke，認命ke。

　　「阿爸：看看山園吧。」人傑溫婉ke ti阿爸耳光唇講。

　　 Kì-teû往上段ke山園行去。陡峭ke山徑，liá-ha he急促ke洩洪道；ti土質鬆散ke地方，還形成一隻隻m̀知有幾深ke小水潭。

　　 Liá時節，除kì-teû三人以外，全蕃仔林ke壯丁男仔人都紛紛出動，準備拓寬山溝，疏濬山園下段山洪帶來ke瘀沙，pûn山洪tui山園兩片流出，試圖挽救山園。

　　 M̀過太晚了。山園差m̀多都he面目全非；農作物沖失，土壠畦道變形he小事，事實上he土壠畦道看m̀著了，山園ke「泥肉」「泥皮」完全pûn山洪沖刷盡淨，呈現眼前ke he石礫參差ke「地骨」！

　　豪雨，還ti 不停傾倒、狂瀉，連「地骨」都會pûn摧毀，pha oi傷及大地深處ke臟腑了。

　　凝神細聽，除忒林木草萊一片「索索」聲，山洪滾滾ke「河河」聲外，大地本身也發出低沉又厚重ke呻吟聲：

　　「唔唔……唔唔……」

　　 Liá-he pûn人張皇失措ke呻聲，liá也he pûn人心碎腸斷ke噭聲。Yi多人上山來ke時節，mhe驚聲怪喊，就he詛咒定定；面對liá景象時，都沉默了，再也發m̀出聲息。阿強伯就ti一垤凸起ke「地骨」坐下來。人傑想oi阻擋，旋即就又放棄。

　　「唔唔……」大地ke呻吟、噭聲升高。M̀，he阿強伯發出ke。

　　「阿爸……」人傑忍m̀核噭眵起來：「轉……轉去吧……」

　　「山花水，還ti漲……轉去吧。」阿漢胡亂ke揮動钁頭：「做m̀得，pha會pûn困ti liá片。」

　　「轉去，阿爸……」人傑伸手去攙扶老阿爸。

　　「你兜轉去……ngài oi……」老人家還he頭磬磬仔，雙手亂揮，講：「Ngài oi留ti liá片——ko坐一下。」

　　「阿爸！阿爸！」人傑mò了主意，一ke酸楚湧上鼻尖，m̀多知仔「哇」一聲噭出來。

　　「恬恬！」老人家猛然頭那tâng起來，目珠圓睜，嘴唇緊顫緊抖：「Mò志氣ke！噭mak-ke？若阿爸又màng死，噭mak-ke！」

　　「……」人傑胸膛激烈ke起伏，他lâu噭聲強強抑壓落去。

　　 阿漢做m̀得也m̀敢表示mak-ke，他做得感受著老人家ke沉痛心情，但he自家卻he憤怒加上茫然之感替代了哀痛；他ke意念中心，緊縈繞著一ke癥結：蒼天仰恁殘酷mò情？人間仰恁mò奈？

　　人們既然天生下來就恁困苦，仰蒼天還m̀ pûn他憫惜？蒼天m̀憫惜，麼人來憫惜人？

　　M̀多知仔，他又想起阿添舍。伯公廟前劍拔弩張該一幕又浮現眼前……