《李喬小說─寒夜》

 | | | 轉寄

人禍天災(17)

作者 李喬 漢羅翻寫：Suingi 2011.03.13

　　天光了。M̀過豪雨全mò減弱ke跡象。茅屋底背早就滲水入來，liá-ha屋底背ke水既經超過腳踝以上，ko水ti流動等。

　　屋外he一片灰濛濛ke雨林雨幕。除忒屋簷下濺迸回跳ke雨水以外，狂瀉狂倒ke雨水逼得落地ke雨點mò辦法濺迸回跳；漫漫ke雨水yi像停頓了；m̀ he雨水不斷降落，he長長ke「掛」ti天地之間；雨水，m̀ he降下來ke，he天地間倒掛等一條無窮巨大ke天河，河水不斷ke倒下來。

　　「啊呀！」企ti門口張望，弄到歸身濕濕ke阿陵忽然間驚喊一聲。

　　「Mak-ke事？」阿漢也趕過來。

　　「山花水！山花水漲到——你看！」

　　 Liá棟茅屋就搭ti山溝唇項。混濁ke山花水（山洪）滾滾而來，茅屋屋基既經全蔭入水肚，ko山洪急速上漲。

　　「阿順妹！遽！」阿陵衝入屋肚，一手揇起一ke細人仔，一頭大聲喊，一頭領先向彭屋liá片走。阿漢lâu燈妹也不慢，擐等拎等，lâu被褥，唯一ke衫箱，兩隻鑊仔全搬過來，liá時節阿陵又轉來了，lâu鋤頭、伐刀等農具也搬離茅屋。

　　「嗚……」阿陵嫂揇等孩子跍ti地泥項大聲緊噭。

　　「噭mak-ke！上來！」he阿強伯ke聲音：「遽！囥到禾埕頂高來！」

　　透過灰白濛濛ke雨幕，禾埕該片大大細細跍了一大堆人。原來he彭家大細；kì-teû尖到拶拶，暴露ti狂瀉ke雨水中。

　　「啊！」阿漢一上禾埕就驚喊一聲。

　　原來彭家該棟長條寬闊ke茅屋看m̀著了，屋基項橫七豎八堆積等倒塌ke竹片塗泥ke屋壁lâu部份散亂ke茅草屋頂。

　　阿陵嫂ke噭聲忽然停下來。顯然眼前ke景象pûn她也噭m̀出聲來。彭屋ke婦人家細人仔，都雙手揇頸磬頭跍等，mò聲音，mò麼人挪動一下。

　　阿陵嫂揇等細人，加入該沉默ke陣容。燈妹也ti唇項跍下來。人華拿一塊稻草苫片，頂ti頭項，m̀過面項身項，還he雨水直流。

　　阿強伯lâu人傑卻雙手交抱胸前，直直企等，面項全he不斷掃瀉而下ke雨水，看m̀出mak-ke表情。阿漢lâu阿陵m̀多知仔也挺胸企了起來。阿陵ke目珠始終看等滾滾山洪中ke茅屋；liá-ha，山洪既經漲到茅屋屋腳兩尺以上。

　　阿漢昂然頭那tâng起來，目珠擘大大粒凝視天頂。雨水打ti目珠項既澀又痛；忍m̀核就目珠眨(sap)起來。他m̀甘願，又ko擘開；又pûn襲擊，又闔項，然後又pak開。他oi看清楚liá灰濛濛白濛濛ke「蒼天」，看透蒼天ke心腸——到底he mak-ke心腸，竟然an-ngiòng摧殘ngài蕃仔林一方生靈！