《李喬小說─寒夜》

 | | | 轉寄

人禍天災(10)

作者 李喬 漢羅翻寫：Suingi 2011.01.09

　　He恁仰mò？He恁仰？自家恁仰想，合法mò？哼哼！屌若姆ke合法。阿漢心頭掠過一下炙熱。

　　Liá時節，阿仁仙清清喉嗹，對蕃仔林ke人講話了：

　　「你兜，唔，喔，liá個，今晡日，大家定著一眼就看出來了：大家面前liá位he阿添舍，葉阿添舍，你兜ke新頭家。」

　　「Ên，從，從來也mò舊頭家。」阿強伯講。

　　「liá個，he，該he，大家he濫墾，該，唔，犯法ke。」

　　「Ên mò犯法。」

　　「Liá個，以往m̀管，唔，」阿仁仙講m̀下去了，東看西看ti尋人：「該位，該位徐日星，上擺來見頭家ke，到哪去啦？」

　　「Ngài ti liá。仰？」先生he又矮又細ke老頭，人家指名oi人，liá正tui人堆底背鑽出來。

　　「徐兄你：lâu ngà話傳到了吧？」

　　「……」先生目珠擘大大粒目瞠瞠仔，竟然m̀應他。

　　Liá一來pûn阿仁仙發火了。正oi發作，阿添舍m̀知細聲講了兩句mak-ke，然後用旱煙筒指一指阿仁仙腋下挾等ke一包東西。阿仁仙緊緊打開該包東西——原來he一疊mak-ke文書哩。

　　「Liá，拿去，he各位ke給佃契約，」阿仁仙lâu東西送到阿強伯面前：「每人兩份，大家打好了印仔，各送一份回來，手續就完成了。」

　　「……」阿強伯mò伸手去接。

　　「你，你兜？」阿仁仙勃然變色。

　　「阿強哥，ngài看……事情到此，唉，接，接過來吧！」陳阿發m̀知哪時來ke。Liá時講話了。

　　「Ên做m̀得接受！」

　　「你mo̍k後悔！」阿仁仙講。

　　「阿添舍……」阿強伯踏出兩步，súng開阿仁仙向阿添舍行去。

　　「契約，交pûn阿發就好啦。」阿添舍講。

　　阿仁仙lâu手項該一疊契約書交pûn陳阿發；阿強伯卻轉過身來，伸手一扡，lâu契約書全扡過去。他講：

　　「阿添舍：做得，做得做m̀得參詳一下？」

　　「做m̀得。」阿添舍ke話，yi像早就憋ti喉嗹頭，聽他話頭一落就彈出來。

　　「哦？就恁仰？」

　　「Ngà阿添頭家m̀ lâu佃人談條件，特別he m̀ lâu手拿兇具ke人談。」

　　「Mò人拿兇具。」

　　「該，你兜手項ke，he mak-ke？」

　　「活命ke傢伙，開山ke用具。」阿強伯切齒ke講。

　　「M̀過，liá-ha，你兜擎等liá兜，想嚇ngài？」

　　「喂！放下！你兜先放下該兜！」阿仁仙提醒大家。

　　阿強伯果然lâu大山鋤往後背一遞，人傑一ke箭步竄出，lâu它接過去。其他人見阿強伯放下傢伙，也都紛紛放下；m̀知麼人，liá時節長長透了一口氣。

　　「阿添舍：該，大人m̀記小人過——還，還he pûn ngài ngài一ke商量……」

　　「你oi講mak-ke，lâu ngà總管阿仁仙講就好。」

　　「mò，定著oi當面向你請求……」

　　「……」阿添舍斡過去ke圓身，又斡倒轉來。

　　「Ên he，he要求：ên既經開墾完成ke，就mo̍k打稅租……」

　　「天下哪有mò-oi稅租ke田地？」

　　「當然官租ên會付。」

　　「Ngài he請准了ke墾戶，當然向你兜收取大租呀！」阿添舍笑了起來。

　　「M̀過……你m̀識ti liá出一分錢，一分力。」

　　「頭家，墾戶還oi出力？哈哈！」

　　「Ên斯講：總做m̀得白白就來收租呀！」

　　「麼人講白白？Ngài斯花了銀仔正請准ke哩！今後抱隘，請隘勇還oi花大錢，知mò？」

　　「唉！Ên he請求、懇求，」阿強伯越講越he低聲下氣：「你阿添舍水田幾十甲，山園上百甲，又仰在意liá一滴仔？就高抬貴手，ên本旦開墾好ke，就讓pûn ên吧？」