《李喬小說─寒夜》

 | | | 轉寄

人禍天災(9)

作者 李喬 漢羅翻寫：Suingi 2011.01.02

　　仰結煞喏？Liá-ha，無形中，范、謝兩人lâu自家看作he領頭了；就帶等kì-teû硬幹？Kì-teû ti面對面ke時節，會忽然打卵退mò？還有老伴喏？她，她m̀會反對吧？

　　Oi lâu細人仔參詳mò？細人仔又會仰仔想喏？阿陵lâu阿漢兩儕喏？

　　「人興……」他驀然想起人興。Liá一想，心肝頭就暗暗作痛。

　　他知。他隱約知。不，心肝肚當清楚：liá場硬拚，結果he mak-ke，就he心肝肚挑試詐mò麼知定定。他試著孤恓無助，他當想咬麼人一口……

　　「該，liá場硬拚he……」

　　他也知，自家liá句問話ke答案。但he，心肝肚另外一ke堅決ke意念緊提醒他：liá個節骨眼上，既經m̀ he計較「後果」ke時節，只問oi做mak-ke，做m̀得做mak-ke；liá-he包尾ke限界，ti liá限界項，該兜千顧萬慮ke事況都oi棄置一旁，只想自家he人，「人」oi仰仔做，就恁仰做！

　　「Ngài彭阿強mò m̀著。雖然m̀識字，m̀過ngài清楚ngài án-ngiòng mò m̀著！」他清楚ke肯定liá一點。

　　Liá-ha有一ke問題he：oi命令mò，抑he要求人傑兄弟lâu阿陵、阿漢也拿起伐刀、鋤頭柄？

　　關於liá一點，他一直mò辦法決定。他知自家oi做ke he mak-ke，他相信liá he著ke，他也知結果。就為了知「結果」，他當難對厥細人仔下達命令……

　　時間，一直過去，踩踩踏踏中ke時光顛倒過yi遽。他一直mò辦法向厥細人仔開口，也m̀知許石輝為首該批傢伙有新ke計較mò？

　　但he該日仔總算到了。

　　舊曆七月二十五日。Liá日早晨，mò一絲風，螞蛄蟬也m̀知仰忽然間mò ko鳴唱；正露面ke日頭，水溶溶ke，m̀像殘夏炙熱ke日頭。

　　M̀過，日頭khie̍t上屋背樹尾時，忽然間就翕熱起來；還he mò一息仔風，熱到土蜂仔tu出窿。

　　Liá日，就he怪怪仔。聽講「出草」抑he大地震動oi來以前就he恁呢。

　　Liá日當晝，阿強伯帶等屋家人ti山園工作好一段時間，正下令休息，該「全村男仔人集合」ke警鑼就響了。

　　「出草？」人華馬上企起來。

　　「一大早，m̀會。來行！」阿強伯睞大家一眼，khâi起大山鋤轉身就行。

　　人傑、人華、阿漢三人也都收拾工具，跈等下山來。一ngiap目，kì-teû就看到了：蕃仔林ke男仔人，都離開園圃，下山趕來伯公廟前。阿漢liá群人趕到時，小小伯公廟前既經尖來尖去。M̀使講，麼人都知。Liá時節好恬恬仔響警鑼，he表示mak-ke；大家心肝肚，還一直又驚又期待liá個時節到來哩。

　　企ti蕃仔林人面前ke六儕人，都he生份面孔。兩儕中年人，一高一矮，都he又瘦又白；矮ke一身寶藍長袍，外著黑絨馬褂，頭戴瓜皮小帽，手拈一枝金光閃閃ke一尺半長旱煙筒。該高瘦ke，正ti矮瘦ke耳光邊m̀知嘀咕mak-ke。

　　Ti中年人後背ke四儕後生人，都he緊身短打裝扮，一看就知he大戶人家ke護院長工之類人物。

　　「He葉某lâu他ke總管阿仁仙……」雖然都màng識看過liá兜人，卻聽「先生」ke詳描細講過，liá一見面，大家都知he麼人了。

　　Liá-ha，企ti蕃仔林liá一邊ke he：高大魁梧ke阿強伯pûn擁ti正中央，左右分企等謝阿潭lâu范乾兩人；kì-teû手項都拿等山鋤或者大山鋤，神情漠然ke企ti該片。

　　向來pûn公認為「村長」ke許石輝，也手擎一把堆禾稈ke三股尖叉，卻企ti阿強伯左後片；囥ti右片ke詹阿古，居然lâu該枝老古董火藥銃也端出來啦……

　　阿漢游目四顧：mò-m̀-chho̍k，除忒甲長陳阿發以外，全蕃仔林ke成年男仔人都到場了。許家子弟該一群大漢企ti老阿爸ke周圍，有些人he兩公婆企共下。記得前幾天，許石輝以下，大部份ke人都打算放棄掙扎ke，仰今晡日居然都拿等傢伙趕來喏？he大家越想越m̀甘願？抑he靠人多勢眾看做得嚇著對方mò？Liá會仰仔一ke結果喏？他m̀敢繼續想。

　　敢講正經用血肉相拚？

　　恁仰一想，阿漢ke雙腳m̀多知仔抖顫起來。

　　蕃仔林ke人án-ngiòng做著(chho̍k) mò？

　　葉阿添he經過官廳批准ke墾戶，用合法ke手續得到liá垤土地ke宗主權；m̀過仰m̀使流汗流血，一紙公文書就he合法喏？「合法」？法he mak-ke喏？很顯然，蕃仔林ke人將he m̀合「法」ke。「法」仰he liá樣？敢講合法lâu m̀合法就he án-ngiòng奇怪ke分別？Liá實在he「法」本身m̀合「法」嘛！