《李喬小說─寒夜》

 | | | 轉寄

人禍天災(8)

作者 李喬 漢羅翻寫：Suingi 2010.12.12

　　「Liá m̀ he你兜想ya m̀想ke問題，mò你兜敢打起土匪ke旗仔相抗。」阿仁仙冷冷一笑，lâu搓成一團ke「煙屎」放入小碟子底背——原來還he一個抽鴉片ke喏。

　　「土地he ên開墾ke，ên 做m̀得分人搶去，liá還算犯法？」

　　「Mò人搶你兜ke土地啊，只要你兜依法納租。」

　　「做麼个oi向全mò關連ke人納租？」

　　「阿添舍he墾戶嘛！唉！你liá人樣全mò孔竅？」

　　「Liá種空頭墾戶，又為ên做了mak-ke？」先生m̀多知仔激動到做m̀得自制了。

　　「向你兜收租呀！」阿仁仙簡直he笑容可掬啦：「都án-ngiòng ke，全台灣都he án-ngiòng。Liá-he大清法律哪。樣？你兜正經oi佔山稱王，對抗王法？」

　　「……」

　　「Lâu你講：先送來兩隻大閹雞孝敬頭家當好——阿添舍盡好食閹雞炒雞酒了——少m̀得ti將來pûn佃契約項多送一兩年『限年陞科』哩！」

　　「Mak-ke意思？」

　　「就he開頭時節，多讓一兩年m̀收你兜ke大租啊。」

　　「M̀過，m̀過ên m̀……」

　　「Án-ngiòng啦：過兩日，ngài會親自lâu寫好ke『給佃契約』帶到蕃仔林，向各佃戶解說清楚，mò定著阿添舍一歡喜，也共下去看看喏。」阿仁仙拿起烏金烏金ke鴉片煙銃來搞：「Liá-ha，mò事了，你轉去。」

　　先生頭烏面烏ke轉去蕃仔林。全權使者，有辱使命，他試著難堪又懊惱。

　　他想著天。他想著天地間該兜做m̀得抗拒ke力量。風雷雨震火水瘟疫做m̀得抗拒，該依靠所謂王法而來ke勢力，也he mò人敢反抗。Liá-ha他，蕃仔林ke人，就he陷入liá種困絕境地中。螢火之微光，何以敵經天ke日月？隨在你憤怒悲傷，挺身拚命，甚至一死相抗，該都he滄海微波，莽野輕風定定，瞬刻之後，mak-ke影跡都mò，就lâu mò發生麼个事情共樣；滄海依舊，莽原依然。

　　他試著疲累又虛弱。心肝充滿了悲哀同茫然，mò助ke悲哀，深遠ke茫然。正經就án-nè？蕃仔林人正經就只有任人宰割？

　　他he蕃仔林唯一mò子女ke人。他當想liá就帶等老妻離開蕃仔林；他自然mò安家立命之地，m̀過離開liá分人憤恨悲哀ke所在總he好ke。

　　M̀過，liá he想想定定。他遽遽轉蕃仔林，lâu大家報告，lâu liá場交涉ke內容，同時也lâu自家ke感觸講出來。

　　聚集ti許家ke各戶代表久久動彈m̀得，只有恬恬凝凍ti該片。

　　「就mò商量餘地？」許石輝開口講。

　　「Ngài看……」先生緊搖頭，頭he越搖越低垂落去。

　　「Ngài知，ngài知……」阿強伯擎頭，目珠圓睜，m̀知ti想mak-ke。

　　「Liá-ha，石輝叔：oi你作主了！」范乾講。

　　「He啊！」謝阿潭企了起來：「明白講：先決定接受他mak-ke 給佃契約？抑he mò-oi接受？」

　　「Mò-oi接受又做得樣？」

　　「當場扯爛它，抗租！捉人？Ên就擎起伐刀、鋤頭柄，幹了！」

　　「Liá……」許石輝磬頭mò講話。

　　「著啊！石輝哥！」阿強伯講話了：「Mo̍k liá樣該樣，做m̀得閃避了，你oi作決定，看看大家……」

　　「Ngài，ngài做得決定mak-ke？」許環顧廳下一眼，又頭磬磬仔。

　　「阿強哥，你講喏？」范斡頭問。

　　「Ngài？屌厥姆，ngài，ngài he拚了！」
　　形勢總算明朗了：彭、范、謝三家決定用武力保衛自家ke土地，黃阿陵m̀好表示mak-ke，劉阿漢lâu陳阿發mò在場；其他各人單淨嘖嘖啐啐，頭磬磬仔恬恬，怕he準備接受liá做m̀得抗拒ke災害？

　　散會離開許家後，阿強伯mò直接上山園繼續頭路或者轉屋，他坐ti林蔭中ke石頭項沉思liá件事。

　　一開始，他m̀相信正經會到án-ngiòng絕望ke地步。後來他想全蕃仔林ke人定著會團結起來抗拒ke；mò想著連從來他欽服ke許石輝ti liá時節也軟下來了。

　　「只有liá三四戶人家……」liá正正經pun人試著寒心。