《李喬小說─寒夜》

 | | | 轉寄

彭家闖入蕃仔林(6)

作者 李喬 漢羅翻寫：Suingi 2009.04.12

阿強伯kûi屋家人ke行程，tui liá片正正經開始艱苦階段。

Tui大湖庄到蕃仔林為止，he彎彎斡斡ti岩壁凹缺，或者草叢齊腰ke彎彎曲曲ke細路仔，連單輪雞公車都打魚m̀赴餐。

照本旦ke計畫，lâu部分蕃薯同飯桌，蒸甜粄ke籠床，竹仔做ke碗櫥等粗家具，託放ti隘勇統制所ke倉庫底背。

彭家ke家神牌，還he阿強伯自家兜等。

人傑四兄弟，總下用麻袋khâi蕃薯；麻袋m̀-la，阿強伯用兩垤舊被單——拉開ke麻袋——包兩包蕃薯，放到左右肩頭項。

阿陵lâu阿漢也共下幐手：各用先住民使用ke 該種苧麻繩背包——「達極仔」背蕃薯；mò共樣ke he，kì-teû m̀會像先住民án-ngiòng，lâu「達極仔」ke繩帶頂在額頭項撐等行路。

Kì-teû最緊要帶去ke，就he liá兜蕃薯。其他oi婦人家搬運ke，單淨三餐用具lâu四領麻袋面ke被舖thin-thin。

至於某他謀生主要家當：除草劈樹ke大伐刀，大刀嬤，開山挖地ke大山鋤，長柄斧頭等，早就搬到蕃仔林ke茅屋。

離開大湖庄向東片細路出發，迎面ke小丘陵he「上坪」，行過上坪，下崎，面前he船形小盆地「社寮角」。Ti小盆地四周，茂密蓊鬱ke巨木全he樟樹。聽講liá片he大湖一帶，漢人最先邸下來蒸製樟腦ke地方。

Liá-ha看過去，順等山崗五座並列ke腦寮，却都破損m̀堪，單淨有兩座yi像有人跡ke樣仔。

「奇怪呀，大湖ke腦寮……？」人秀m̀識來大湖。

「樣仔？」阿陵笑笑仔問。

「腦價正高m̀-he？樣會án零落？」

「He啊，劉大人和蕃成功，樣會……」人華也奇怪。

「聽講劉銘傳mò oi做啦!」人興講。

「Ke也正辭職咩！看liá兜腦寮，根本就荒廢多年。」

「唉！和蕃，m̀-he嘴講講án容易啦。」

「唉！和，和和，和m̀成樣葛煞？」阿強伯低沉透一下氣。

他ke道嘆，一下感染到大家，大家ke腳步沉重起來。

他跈等感覺到，他心焦焦又有兜後悔；他想提議pûn他兜拚拚山歌，m̀過看起來mò把扼siàng蛇出窿。他只好行卡kiak兜仔，行先去。他高大ke身體，行路有風ke樣仔，實在m̀像會六十歲ke老人家。