《李喬小說─寒夜》

 | | | 轉寄

人禍天災(5)

作者 李喬 漢羅翻寫：Suingi 2010.10.31

　　蕃仔林人申請「開墾給照」lâu「隘首」ke文書，送出去一隻月了，兩隻月了，中元節已到，m̀過共樣還màng收著任何消息。

　　蕃仔林ke人，目光神色，越來越黯淡，mò氣mò脈。

　　文書送出去兩隻月以後，大湖庄卻意外ke pûn蕃仔林頒下一道命令：由陳阿發擔當「甲長」——苗栗第一堡、大湖庄三保，第六甲甲長。本旦ke編制he十戶為一「牌」，牌設「牌長」；十牌為一「甲」，甲有「甲首」；十甲為一「保」，保有「保正」。M̀過制度既經紊亂，蕃仔林九戶人僅做得算一牌，卻pûn訂為一甲，ko習慣上稱「長」m̀稱「首」。

　　「樣m̀ he派許石輝？」

　　全蕃仔林ke人都感到奇怪，m̀過麼人也提m̀出讓大家信服ke理由。

　　Liá段時間，蕃仔林ke人，識託人到衙門打聽申請文書ke處理情形；徐日星liá位「先生」也親自出馬過，m̀過都m̀得要領。

　　中元節前幾天，彭人華「上街」，卻ti盲仔潭唇堵著六儕手挽竹蔑軟尺、量竿、羅盤等丈量土地用具ke人。人華心肝肚一動，便折回跈等kì-teû往回行。

　　Liá六儕人果然he到蕃仔林ke。他當簡單ke lâu kì-teû相借問。Kì-teû講he墾撫支局ke「丈量師」he來pûn蕃仔林各家丈量水田山園ke。

　　「敢he，he阿添舍ke片請來ke？」人華試探kì-teû。

　　「你看：ên像mò？」

　　 Liá-he重大消息。人華一口氣走轉屋，看看父兄都上工了，他緊緊到許石輝屋家報告。許也m̀ ti屋家。他拿起警鑼就打各家各戶戶長緊急集合ke信號。Mò幾久，各家代表就到齊了。該時，蘇家老二永寶也帶來一ke消息：「丈量師」們往陳阿發家去了。

　　「陳阿發liá-ha he甲長了。」許石輝對大家講：「走，ên到陳家看看。」

　　一到陳家籬笆門外，陳阿發正候ti該片。陳告訴大家：lâu請領土地ke田地圖樣拿出來。

　　「Mò啊，ên單淨申請……ên自家mò請人丈量……」許講。

　　「Mò丈量，你兜樣仔去申請『開墾給照』？」一ke頭仔模樣ke丈量師講。

　　大家呆呆，面面相覷，講話m̀得。包尾還he該頭仔講話：

　　「故所，今晡日來pûn大家清丈一番，請大家多多幐手。」

　　「啊！該，忒好，忒好咧！」

　　「一定！Ên一定！請吩咐，ên oi樣般做？」

　　自許石輝以下，蕃仔林ke逐儕戶長都興奮又感激，就差mò跪下來。許石輝lâu陳阿發拉到一邊問：

　　「師傅們有講，oi丈量幾日？」

　　「三日吧。Kì-teû講差m̀多三日。」

　　「該……食，當然蕃仔林ke人負責，歇喏？歇ngài屋樣般？」

　　「Liá，食，ngài liá片就做得了，反正……唔，歇，倒he問題——ngài liá片尖m̀落六儕人哪！」

　　「就án-nè：全歇ngài該片。食嘛，用ngài該片為主：食當晝，看各戶ke意思，就án-ngiòng，做得mò？」

　　「Pha mò嘛異好。」陳沉吟一番正講：「Ngài liá雖然he空殼甲長，總he正下任命ke，禮數上，ngài m̀好……」

　　「該……甲長ke意思喏？」許ke眉頭皺了一下。

　　「歇 ke方面，就ti若許大伯家，食ke，ngài負責好了。至於各戶假使過意m̀去……做得送兜仔雞鴨抑he米來。」

　　Ti kì-teû談話之間，丈量師們既經ti桌面項攤開地圖，開始作業——原來官廳既經繪製了蕃仔林地圖哩，而且畫到大大細細。

　　「師傅，liá……ên ke耕地，yi像liá片有？」阿強伯liá正頭一擺開口。

　　「He，你兜恅著ên m̀知蕃仔林濫墾情形啊？」

　　丈量ke頭路，自伯公廟面前，往大細南勢ke通路右片ke水田開始，然後正he左片ke旱田，詹家徐家ke該垤斜坡地，續等he彭家ke新墾旱田，許家ke大塊山園，蘇家ke山園lâu竹林……

　　Ti丈量進行ke時節，該地耕種人同四邊接壤ke耕種人都oi ti現場；大家就ti當場，互相承認地界，然後正掛羅盤，插量竿，拉開竹蔑軟尺開始丈量。

　　丈量頭路進行得很順利，m̀過因為liá段日仔各家「搶墾」ke新地多到得人驚（比將講：黃阿陵包尾動手ke，也ti小南勢靠近河眠床ke「河川地」項，拗蠻拓開了五分地ke圃園。）結果比預定ke時間多了一天——四日正丈量完成。