《李喬小說─寒夜》

 | | | 轉寄

人禍天災(6)

作者 李喬 漢羅翻寫：Suingi 2010.11.27

　　Liá四日，he蕃仔林家畜ke浩劫，丈量師第一日還表示：對「香肉」有特別偏好，又知夏日食香肉ke妙法——用黃枙子同桑樹根燉香肉，去火消燥，he夏日補品——故所連幾隻狗也遭殃受難。Kì-teû oi離開該日當晝，許石輝臨時想到一ke主意：灶爺上天庭，食甜講甜ke，總就大家湊合送一隻大紅包吧。

　　甲長陳阿發打頭陣贊成，其他人等，也只好拚命湊上一份。Liá一場丈量土地ke大事，雖然差m̀多剝忒蕃仔林各屋人ke一層皮，m̀過，mò幾久，許石輝取得「墾戶」ke名份，大家卻取得土地ke實權，án-nè一想大家心頭還he偷偷仔歡喜雀躍。

　　Ti liá四日，唯一心情開朗m̀起來ke he彭家老人家，阿強伯。

　　自tui第一天，看到丈量師排開桌項該張蕃仔林ke地圖起，他就緊悵悵然若有所失。做mak-ke地圖項有各家耕地圖形喏？liá he哪來仔？幾隻月前葉阿添派人來丈量過，該央時he分人逐走ke，kì-teû mò可能丈量到mak-ke——地圖hong ke各屋分配圖單淨概略大致定定，會憑麼人口頭講ke畫下mò？He麼人去講ke？又為著mak-ke án-nè做？該六儕傢伙正經he墾撫局ke人mò？假使m̀-he，該he麼人ke人喏？

　　好死m̀死，陳阿發liá儕人m̀早m̀晚tui官廳派作甲長；阿強伯直覺上緊緊認定：mò派許某，tui陳某任甲長，liá件事lâu kì-teû耕地權益上，定著有mak-ke關連。他lâu liá個心事lâu許石輝講。

　　「呵呵！阿強哥，你也，嘿，án多心哪！」許笑到開朗之至。

　　「He mò？你，正經就án放心？」他滿面肅然。

　　「Lâu你講啦？Liá幾日ngài也mò閒閒——派人去墾撫支局查過啦。」

　　「哦？樣仔？」

　　「丈量師，確確實實he支局ke！」

　　他還想講mak-ke。看許石輝滿面紅光，眉開眼笑，yi像liá一丈量土地，他就he雄霸蕃仔林ke大墾戶——另外一ke黃大獅出世啦。他暗暗透一口大氣，mò ko開口。

　　日仔，ti興奮lâu期待中顯得特別慢。期盼中，中元節悄悄過去。

　　中元節過後五日當晝頭，蕃仔林ke人總算盼著了消息。甲長陳阿發恬恬仔交pûn許石輝一大包文件：該he kì-teû申請墾戶lâu隘首ke文書——駁回來了。許緊緊lâu徐日星請來，看看衙門ke文書底背講mak-ke？

　　原來駁回ke理由，講得當清楚：一、該土地既經核准tui葉阿添拓墾。二、申請人條件m̀合。另一張文書指明：大湖庄三保第六甲許石輝等人「濫墾戶」在十日內應與官置墾戶接洽，辦理「給佃契約」，mò就oi用濫墾處置條例嚴判云云。

　　許石輝張口結舌，企ti該片直翻白眼，就he講m̀出話來。徐日星破口大罵。包尾許石輝拿起神桌項ke警鑼，行到禾埕項猛打緊急集合ke信號。

　　Án-ngiòng，ti liá熱燁燁仔ke下晝，蕃仔林傳出急促、狂烈ke鑼聲，而且一直持續；到有兩家戶長趕到了，許石輝還ti打啊打，就yi像oi永遠打落去樣仔。

　　先到ke人問許石輝mak-ke事，他m̀應，還he專心一意ti打鑼。Kì-teû tui徐日星該片知了大體ke事情。續等kì-teû m̀ he跈等破口大罵就he企著pot-tok-ngok……

　　「來，ngài來打。」

　　有人伸手去抓許手中ke警鑼。許yi像mò聽著mak-ke，mò表示mak-ke，還he繼續敲打，面項先he一片煞白，然後越轉越紅；烏紅面項，汗水緊流，密密跌下來。

　　因為he當晝頭，大部份人都ti山園肚做事，故所花費oi兩刻鐘，各戶各家ke代表正到齊，到齊時，許石輝還he有一聲mò一聲ke打等警鑼。

　　「你就mò ko打啦！」蘇阿錦行過去，強pûn kì搶下來。

　　「各位：看，liá，樣葛煞？」徐日星講。他代替許講出第一句話。

　　He呀，樣葛煞？大家經過一下耳語以後，都瞭解情況了，而且都反問過自家千百擺——樣葛煞？

　　「石輝哥，」阿強伯清一清乾澀ke嗓音：「mò-oi án-ngiòng，你總he oi拿出主張來。」

　　「He啊！石輝哥。」詹喀拳頭講。

　　「做得……樣仔？」許開口了，聲音竟然微弱像耳語。該烏紅ke老面，liá時節又轉成灰白了。

　　「做m̀得——石輝哥做m̀得講『做得樣仔』就了了！」阿強伯講，牙根癢癢想咬人。

　　「著！你he ên ke頭仔，你總oi……替大家想出點辦法來。」詹阿古講。

　　「大家ke意思he……？」

　　「總得……唉，總得……」阿強伯講了半天，就he接m̀落去，m̀多知仔發譴替代了計較：「敢講就乖乖雙手送出ên ke活命田地，做人家佃農？」

　　「著！石輝叔，ên總得去拚，做m̀得用就án-ngiòng……」

　　「屌若姆！就he oi抓他葉阿添墊ngài棺材底……」謝阿潭lâu范乾一唱一搭……kì-teû兩位遲來蕃仔林ke，差m̀多mò佔到幾多mak-ke「荒閒mò主之地」；為了家小活命，一安頓下來就先向許石輝承租山園種植蕃薯，葉阿添「墾戶」權一成立，kì-teû就oi承擔「大租」「小租」兩層稅租ke「現耕佃人」。Kì-teû比麼人都緊張。

　　「就he liá意思。」阿強伯講。語氣堅定又沉著，yi像早就有了打算：「ngài彭阿強he，手腳奉送做得，頭那pûn人做凳頭也做得，田地就he死也m̀放手！」

　　彭家，liá年半以來，雖然開墾了差m̀多夠活命ke田園，m̀過還he向許家承租了一塊斜坡地種植桂竹——liá-he新興農業，m̀過卻he多年後正有收成ke。萬一真落入葉某手掌裹，除非甘心lâu種植完成ke桂竹林交還許家，mò他也oi逐年繳一份「大租」「小租」！

　　「各位ke意思he？」許石輝liá位豪邁曠達老人家，liá-ha居然變成軟弱畏縮ke糟老頭啦：「唉！Khâi大山鋤，食山石，提鏢銃拚蕃仔，ngài許石輝行，m̀過lâu官廳打交道……」

　　「M̀ he官廳，he葉阿添該吸人血ke！」

　　「葉某khâi ke he官廳招牌哇！」

　　「石輝哥：你sṳ̀講，m̀敢？放棄？就án-ngiòng放棄？」阿強伯揮動大拳頭。

　　「做m̀得！做m̀得啊石輝哥！」詹阿古lâu蘇阿錦同時講。