《李喬小說─寒夜》

 | | | 轉寄

人禍天災(2)

作者 李喬 漢羅翻寫：Suingi 2010.09.26

　　「M̀過……當痛……」

　　「Liá還喊痛？Mak-ke話？」阿強伯怫然作色。

　　「Ngài教你一ke辦法？……」人華liá一下倒滿親切ke：「採幾片『蝦公莢』ke嫩葉，就用手掌揉碎，pûn該汁液塗ti傷口項就m̀會痛了。」

　　「M̀過liá雙手樣仔揉喏？」

　　「該……用嘴吧，牙齒嚼碎來也做得。」

　　「蝦公莢」he山野底背最常見ke野草，嚼碎ke液汁有止血作用；根部lâu氷糖共下熬煮內服，有消炎袪火ke奇效。Liá-he山野人家最常用ke藥草。

　　阿漢採幾片「蝦公莢」嫩葉放入嘴底背咀嚼。Mò想到又辣又苦，味道十分難受。總算嚼碎了，小心吐ti手掌項……

　　「啊！」他脫口喊起來。手掌一下徹骨奇痛，續等像pûn火燒著樣仔。他猛甩雙手，lâu蝦公莢碎片甩掉。

　　「樣仔？」人華對他傻笑。

　　「你！你樣án-ngiòng害人？」

　　「Liá倒m̀ he，」人傑瞪人華一眼，向他講：「痛he痛，塗上該東西，m̀發炎倒he正經。」

　　「唉！小事，小事哪！遽！遽遽做事。Liá還大驚小怪，還想食下liá暗飯？」

　　老人家ke話，he感慨而發，ya-he全衝自家來ke？Pha he liá一下劇痛，pha he老丈人liá句話，阿漢他，歸身湧起一身冷汗。

　　著。雙手liá一滴仔破皮流血又算得mak-ke？當時he為著麼个，又抱奈種決心跳入liá氷窖火宅ke？還oi食下liá碗飯，該就mò-oi嫌燒pha冷，還啊mò-oi痛惜liá身皮肉。敢m̀ he？劉阿漢你早失去爺娘你天生命苦；你he mak-ke東西？你he贅婿哪！招贅來賭命鬪生蕃ke。你還pha痛pha癢？可笑可笑！

　　該……。想到liá片，一股憤怒，同其他複雜m̀明ke mak-ke共下湧上心頭；雙手手掌單淨he辣辣ke麻麻ke，mò ko mò辦法忍受了。他提起伐刀，勇猛ke，mò頭mò腦ke向繁茂擁擠ke草萊林木揮舞，tok下：

　　「Tok吧！劈吧！殺吧！Liá，liá mò用ke東西……」

　　該老丈人yi像停下事緊看他。人傑也投過來訝異ke一眼。人華yi像還ti傻笑；m̀，m̀ he傻笑，he冷笑。

　　他心肝肚有兜仔畏縮，有兜仔反悔；自家liá m̀ he忒明顯了喏？自家he ti……ti做mak-ke喏？唔！M̀管！就m̀管！Ngài拚命做事還做m̀得？Liá敢 m̀ he你兜希望ke？你兜oi滿意正著呀！該ngài就拚命，liá總做得吧？

　　「唉！阿漢。你……就休息一下吧。」

　　講話ke，yi像he老丈人。唔，m̀ he，he人傑。人傑大哥he彭屋家盡有人情味ke一儕。他嗯了一聲。他想停下來，m̀過m̀甘願？也m̀ he m̀甘願，he停m̀下來，就he mò辦法停下來。他繼續揮動伐刀。

　　「Liá個小貨仔。M̀過當硬頸喔。」

　　「也難為他了。他m̀識做過liá種苦工。」

　　「哼！看他硬。硬到幾時？」

　　Liá兜人yi像ti品頭論足，he ti數說自家吧？Kì-teû做得，「kì-teû」當然有權án-ngiòng。敢m̀-he？Ngài he一個招贅入來ke人。Ngài只有一ke權利，ngài mò-oi命ke做事，liá總做得ke。

　　他試著，兩手握刀柄ke地方，濕漉漉ke。該he汗水吧。他寧願它he汗水m̀ he別ke。實際上，他全身早就汗流脈落，澇澇ke濕透了。 面項，頭項，還啊he汗汁緊流，流入耳凹裏。流眼眶底背澀澀刺痛，án-ngiòng目汁也pûn導引出來。

　　 Liá日臨暗收工時。阿漢想放下伐刀，m̀過刀柄竟黏ti雙手手掌項，脫m̀下來。老丈人領等人傑人華下山了，他表示休息一下正走。

　　「遽轉屋，暗了……」老丈人想ko講mak-ke樣仔，包尾還he mò講完。

　　他坐ti剛下tok下來，草香濃郁ke野草項。他he正經mò力動彈了，他oi休息一下。M̀過忍等忍等，堵m̀著了，他幽幽噭起來。

　　「Mò相干。Liá片mò人。」他想，án-nè他盡情ke噭。

　　等他頭那tâng起來一看。四片既經全暗下來。手掌還he黏ti刀柄項脫m̀下來；稍一用力掙脫，就痛到他一身汗水。樣葛煞？好轉去了；mò遽轉去又驚有一頓好罵。他掙扎ke企起來；雙手做m̀得發揮均衡作用，他踉蹌幾步又倒坐下來。目汁，又緊流下來。