《李喬小說─寒夜》

 | | | 轉寄

兒女情(16)

作者 李喬 漢羅翻寫：Suingi 2010.08.29

　　「……」

　　「燈妹，妳……定著悿le……」

　　「不……」燈妹總算開了口。

　　「燈妹……妳睡吧。」

　　「Mò-oi……」

　　「燈妹……妳……樣仔？」

　　「Mak-ke樣仔？」liá擺聲音略略仔提高。

　　「妳……妳會討厭……ngài mò？」

　　「不……」

　　「該，該……」他就he講m̀出「喜歡ngài mò」liá一句。

　　「……」燈妹看他一眼，一臉訝異ke樣仔。

　　「Ngài……ngài會打拚工作，m̀-voi pûn妳……受苦！」

　　「……」

　　「Ngài mak-ke都mò……m̀過，ngài會打拚……」

　　「……」

　　「Ngài實在mò，mò資格ke……m̀過……」

　　「阿……阿漢……」

　　「但he，ngài會盡力，做起家基，pûn妳暖飽……」

　　他實在還有當多話oi講，就he m̀知先講mak-ke好。Liá時節他mò意中摸到衫袋肚ke銀禁指。他鼓起勇氣，lâu禁指遞pûn燈妹。

　　「啊。阿漢你……」

　　「燈妹，ngài只買仔贏liá小小ke，莫見笑……」

　　「阿漢，承蒙你，阿漢……」燈妹ke嗓音透等哽咽。

　　「將來，燈妹，ngài正pûn妳買kha大ke，金子ke，好mò？」

　　　「……好。不。夠罅了。就liá一ke……liá一生，liá一ke就罅了。」

　　他又歡喜，又激動，又歹勢，又心焦焦。他鼻公酸酸。唉！一ke小小銀禁指，燈妹居然感動、高興成該樣仔。

　　外背ke風雨轉強。敢講今年ke風災恁遽就來襲？

　　燈盞火晃到還啊劇烈。He水油都化成火焰màng？

　　「異夜le，妳，妳先去睡？」

　　「……你喏？」當細ke聲頦。

　　「Ngài……ngài再坐一下就睡。」

　　「該，該，ngài也再坐。」燈妹講。下了大決心樣仔。

　　「好，ên……再坐一下。」講到「ên」，心肝頭甜甜。

　　「Ngài……ngài voi驚夜來風雨聲。」

　　「Ngài也voi驚thióng大ke風雨，án-ngiòng就會試著孤恓。」

　　「He 咩！He咩！就he án-ngiòng。」燈妹m̀多知仔暢起來。

　　「Liá-ha……以後，m̀使驚le。」

　　「嗯。」

　　「燈妹。」

　　「嗯。阿漢……」

　　燈盞火m̀知mak-ke時節烏忒。他勸燈妹去睡目，燈妹mò講話。M̀過，他想仔出燈妹羞怯ke模樣，因為自家也心口狂跳。

　　燈妹yi像企了起來，yi像移動了。他當想扼一下燈妹瘦到可憐ke小手。M̀過他動彈m̀得。燈妹yi像行過去，坐ti眠床唇？

　　暗摸胥疏，他卻試著眼前光光像日時頭。燈妹ke一舉一動，甚至眼波神情，他試著自家「看」到清清楚楚。

　　燈盞火烏忒真好。他想。他畢直向眠床唇行去。他嚴重ke要求自家：莫歹勢，就lâu燈妹並排坐ti眠床唇……。