《李喬小說─寒夜》

 | | | 轉寄

兒女情(14)

作者 李喬 漢羅翻寫：Suingi 2010.08.15

彭家禾埕項，幾下儕人頂等大日頭企ti該片，廳下肚卻恬索索，男主人lâu徐日星企ti門口。

彭家昨晡日正辦啊忒人興ke喜事，liá-ha第二樁續等舉行；雖然màng曾張燈結彩，m̀過應該人人面項漾著濃濃喜氣正he。

但he，mò。一團莫名ke冷漠，蕭瑟ke氣氛，mò形mò影卻十分明顯ke籠罩等。

阿漢ke頭略略仔失魂。他用力ngiap目；他驚pha熟識人ti旁，mò pûn招呼有失禮數。

M̀過汗水滾落眼眶，pûn該兜面孔看來都he模糊又在晃動，一儕都認m̀出。

「嘿，起始啦！」徐日星liá位「先生」充當司儀：「Liá-ha，大家——阿漢、燈妹，雙方家長，兩位明媒阿陵，阿錦哥——來，照順序ti『招書』項撍印或者拇指印。」

大家照指使做了。燈妹mò印仔，只好用右手拇指紋印代替。

「點燭！彭家族長——喂！阿強哥，就你自家來好啦。」

阿強伯先點上三枝香，然後點燃桌頂ke兩枝小紅燭。

「點燭」oi「講四句」。用四句吉利話，祝福喜家lâu新人ke福祉。阿強伯朗聲講：

燭火光光，好事成雙 燭苗亮亮，彭家興旺
燈妹一身淺紅，著他pûn買ke絨面布鞋；頭項mò罩蓋羅帕；看m̀著該短短ke兩隻辮仔了，改成一ke小拳頭模樣ke髻鬃，堆ti頭那後背。模樣小小巧巧ke，有人ti嘖嘖稱讚。

燈妹ke面，差m̀多埋ti胸膛項；yi像白白紅紅ke，m̀知有塗白粉抹胭脂mò？

「祭祖！上……香！」先生宣佈。

——阿陵pûn兩位新人送上各三枝香。兩位上香後，又向神主行三跪九叩大禮。Liá時節阿強伯ke「四句」he：

彭家祖宗，有靈有顯 招來婿郎，願作鷄犬
阿強伯ke聲音m̀異高，m̀過當清楚。阿漢雖然心頭當亂，又當緊張，m̀過還he聽有了「四句」ke意思。

「拜堂——一拜天地……二拜爺ôi……三，新人互拜……」

儀式yi遽就結束。一聲「入新房」，兩位新人就退出廳下，行出禾埕，經過兩三丈遠ke細路仔，回到新茅屋，入去「洞房」。

阿漢鬆了一口氣，正想好好看新娘一眼，阿陵卻冒冒失失ke掀開門簾——用三條大手帕連綴而成ke——對他講：

「來吧！也幐手一下搬桌椅，端碗筷該兜。」

「Mak-ke？」他懷疑he自家聽m̀著（chho̍k）了。

「失禮失禮，唉！」阿陵為難：「Án-ngiòng kha好啦。」

「今晡日……阿陵！」他不由ke怒氣填膺。

「He án-ngiòng，佬弟：ên就當作平常án-nè——kha煞蜢兜仔，買人疼惜哪。」

「……」買人疼惜？正拜完天地ke新郎公，liá就去搬桌椅，端碗筷？

「……去吧。」燈妹忽然間細聲講。

燈妹看他一眼，竟然也轉身oi出去了。

「燈……妳，妳莫。」他忽然間喉漣頭哽著：「Ngài去！」 阿陵陪他行出新房。阿陵ke圓身同他靠得緊緊地，還緪緪扼等厥手掌。他知阿陵ke心意。

斡頭一看，燈妹還he出來了。阿陵嫂堵好迎向她，m̀知ti講mak-ke。

午餐，除忒彭家ke老嫩以外，竟來了四桌ke人客；看起來，蕃仔林ke逐擺一戶，都來了兩人以上。

平常奈家婚喪喜慶請人客，援例其他各家都he爐灶熄火，全家赴宴ke；今晡日鄰舍們還算he體諒彭家ti蕃仔林落腳mò幾久，特別客氣哩。

彭家兩老卻當m̀歡喜，因為事先既經再三表示過：招婿郎m̀當討心舅，mò請人客，麼人知liá兜人卻m̀放過他；包來一滴仔禮金，卻想連本帶利全pûn食轉去。

因為事出意外，阿強伯mò奈何宣佈：屋家人總下等待人客食飽後，再另外煮飯食飯。

結果，只留下他自家陪人客；老伴始終囥ti屋肚嘆息流目汁，m̀肯出來，也mò講話，其他子孫都乖巧ke「囥」起來。