《李喬小說─寒夜》

 | | | 轉寄

兒女情(11)

作者 李喬 漢羅翻寫：Suingi 2010.07.18

　　「你講mak-ke？」

　　「……」他搖搖頭，挺挺胸，冷肅ke講：「阿桂伯婆，ngài還he承蒙妳。Ngài oi走了，mò ko揪等ngài！」

　　「你oi到奈去？蕃仔林？」

　　「哼！……」

　　「唉！」阿桂伯婆吞一口口涎水(heú-lân-súi)，緊看等他問：「你正經mò-oi她——你生母去『寫字』？」

　　他肯定，重重搖頭。

　　「M̀ he？」

　　「Ngài mò-oi麼人去！她，m̀ he ngà阿媽！」他，心口燒燒ke，yi像有mak-ke會熝人ke液汁湧出來，滾落去。

　　「阿桂嫂，求妳了！」她yi像ti噭？

　　「就án-ngiòng？鐵石心腸？」

　　「哼！鐵石心腸！著，鐵——石——心腸！」他冷笑。

　　「該，ngài代她去喏？」

　　Mak-ke代她去？他心肝肚一橫，一種怨恨化成ke近乎快感ke東西湧上來，他講：「阿桂伯婆，ngài he來要求妳幐手ke；講妳『代』麼人，該就算了！」

　　「男家mò人去，樣仔『寫字』喏？」

　　「M̀寫！M̀ pûn她招，做得mò！反正又m̀會死！」

　　「唉。阿桂嫂：看他，還he細人仔子哪。妳就去吧。」

　　「哼！妳還替他求！」

　　「Ngài mò-oi麼人代求麼人！」他又譴譴oi向外衝。

　　「Ngài m̀管！Ngài mò-oi去！」阿桂伯婆也發譴了。

　　「M̀。Mò án-nè。」她轉向他厲聲喊：「阿漢！你轉來……」

　　「Ngài做mak-ke oi聽若話！」

　　「你？……你mò-oi聽，ngài跪你好mò？」

　　「妳？……」

　　「阿媽he對m̀起你，你恨ngài，應該ke。Liá-ha只求你讓阿桂伯婆去女家，通過『寫字』ke一關。好mò？」

　　「……」

　　「阿漢，你m̀答應，ngài就跪你，ngài跪下來……」她正經oi跪落去。

　　「搞mak-ke鬼？Pûn ngài起來！」阿桂伯婆阻止她。

　　「桂嫂，妳假使m̀肯，ngài也跪你……」

　　「好啦好啦！光天化日，見到大頭鬼！」

　　他像一截木樁，僵立ti該片，心肝肚卻he滔天大浪，遍地野火，逼他ti絕境肚掙扎，逼到他會隨時瘋狂而炸裂，炸成片片。

　　他liá-ha就想來一場大火，lâu自家燒死，燒燬，化成煙，燒成灰燼；然後定著oi有一下狂風，lâu自家吹散，吹到完全消失，淨淨利利。

　　阿媽！Ngài……ngài oi喊妳一聲阿媽！

　　Ngài oi妳去，去「寫字」作主，去看阿漢ke新娘燈妹，因為她he若心舅。

　　「咦？Liá-he奈來ke聲音呀？」他pûn心肝肚隱秘處ke微弱訴願嚇著了。

　　實在奇怪。樣有án荒唐可笑，又羞恥無聊ke聲音喏？

　　「Liá定著he水鬼魍神想迷亂ngà心神，挑試(tiâu-sṳ)學ngài ke聲胲(sâng-kôi)講ke。」他想。

　　他試著當可笑，他提醒自家：自家he一個成年男子漢了，水鬼魍神奈何m̀了ke。

　　阿桂伯婆總算「自願」答應，陪他去蕃仔林，幫他完成「寫字」手續。

　　他帶阿桂伯婆離開時，阿媽企ti路唇默默相送。

　　Yi像幾下屋ke門唇，有人ti窺視；草叢肚，也有幾下雙目珠ti看他。

　　經過阿媽身邊時，他一直努力，想頭那tâng起來看阿媽一眼，m̀過還he失敗了。

　　阿媽既經pûn拋到身後好幾步。

　　他，四肢用力，咬緊牙關，全身用力一撐——轉過身來，向阿媽看去。

　　該張面，歪歪斜斜ke……眼角ke皺溝肚，yi像有盈盈ke目汁，嘴唇微張，yi像ti笑……

　　「阿……」

　　他還he講m̀出mak-ke。阿桂婆行當遽喏。他卻三五步追了上去。