《李喬小說─寒夜》

 | | | 轉寄

兒女情(10)

作者 李喬 漢羅翻寫：Suingi 2010.07.11

　　Liá一日。悲哀又翕熱ke一日，漫長又屈辱ke一天過去了；ti臨暗時節，他對故鄉tai過ke村莊投下最後ke一瞥，然後背向塗滿夕陽ke大路行去。

　　「阿，阿漢仔！喂！」

　　「？……」麼人ti喊自家？

　　「阿漢仔，轉來！」一ke老婦人家跌跌撞撞ke，向他揮手還追過來。

　　原來he 該得人惱ke阿桂伯婆。

　　「走！轉來去吾屋家。」

　　「妳肯幐手he mò？」

　　「He呀！Ngài幫了你大忙啦。行！你liá就知。」

　　他ti連勸帶súng之下，行轉阿桂伯婆ke屋家。他還màng赴發問，ti廳下門邊就見著一ke生份人——目光遲滯，擘嘴pot-tok-ngok ke中年婦人家。

　　「Liá人he麼人！」他心肝肚旋旋風昇起異樣ke感應，全身重重掣一下。

　　「就he他——大男仔人囉！樣？認m̀出？」阿桂伯婆向中年婦人家講。

　　「唔……」婦人家搖搖頭，又目盯盯仔看他看到pot-tok-ngok。

　　「像透了他短命阿爸嘛！」

　　「啊！」他猛地倒退一步。

　　其實一照面，他就幾乎知眼前ke人he麼人了。該m̀ he童年記憶保存得清晰；實際上該兜記憶，ti時間ke沖刷，同自家努力排斥之下，差m̀多完全m̀見忒。

　　M̀過，他也隱約感覺出，「自然ke記憶」散失以後，ti 該空茫ke心版項，卻又m̀知mak-ke時節起，既經建造一尊還kha清晰，還kha真實ke塑像。

　　該he mò辦法拒絕ke事。人，就he án-ngiòng mò奈。他識恁樣想。

　　He。Liá-ha凝立眼前ke婦人家，就he心中塑像挪移過來ke——就he liá模樣，正經就he liá個模樣；假使講有mak-ke mò共樣，該就he眼前ke liá一位，面上風霜痕迹忒深，身架子忒單薄瘦弱，也kha蒼老。

　　「阿漢仔，看你：喊阿媽啊？你生母哪。」

　　「……」他一醒，緊緊lâu面別開。感到m̀妥，他又頭磬磬仔，深深垂掛胸膛。

　　「阿……阿漢……你……」好澀ke嗓音。

　　「……」頭好重提m̀起來。喉嗹頭燥燥，辣辣。Án-ngiòng實在發m̀出聲音來。他告訴自家。

　　「阿漢……ngài he若姆……」

　　「……！」還he mò辦法tâng起頭來。

　　「阿漢……阿桂伯婆來講你……ngài就來了。」

　　「……！」頸根就he硬硬ke，就he m̀聽使喚。

　　「聽講你oi討餔娘。Ngài，ngài就去，好mò？」

　　「M̀ he討，he招贅啦。」阿桂伯婆提醒她。

　　「嗯。故所，ngài去『寫字』，好mò？」

　　「妳！」他總算正面迎上她。

　　「Ngài去，好mò？Ngài……」她卻頭磬磬仔了。

　　「Mò-oi！」他講。

　　他轉身就oi離開。阿桂伯婆顫巍巍ke圓身，堵好擋ti面前。

　　「Ngài知……ngài知……」阿媽向阿桂伯婆講：「該就，妳也答應過ke，由妳出面……」

　　「阿漢仔！樣做得án-ngiòng對待阿媽！」

　　「她m̀ he——分ngài走吧。」

　　他還he pûn阿桂伯婆死揪活拉ke留下來。

　　她m̀ he ngà阿媽！她m̀ he，她正經m̀ he……他ti洶湧激蕩ke怒海肚，聲嘶力竭ke發譴大喊。

　　阿婆ke話又ti耳光唇迴響：

　　該女人ti你màng四歲就mò oi你改嫁了！

　　該女人m̀ he若阿媽你千萬m̀好認她……

　　你oi打拚你oi創出家基續你劉家香火……

　　「嗐！阿婆！阿婆啊！」他心中想著，m̀多知仔朗聲講出來。