《李喬小說─寒夜》

 | | | 轉寄

兒女情(8)

作者 李喬 漢羅翻寫：Suingi 2010.06.27

　　大家都透一下大氣。人傑liá時節細聲問：

　　「阿爸，剛下你yi像當有把扼——人家，正經肯mò？」

　　阿強伯又he án-ngiòng幽密ke一笑，雖然不置可否，大家看該神情，知老阿爸準he钁頭落地，底下ke還吂看到卻也知mak-ke啦。

　　Tui出嫁改做招贅ke方式，還he由阿陵轉告阿漢ke。聽到liá改變，他茫然一下，意外ke，卻yi像màng加深思，就點頭了。

　　「莫決定到恁遽。」阿陵講他。

　　「唉！又做得樣仔？」

　　「Ngài sṳ̀講：值mò？三年哩！」阿陵ke口氣，yi像he責備他。

　　「Mak-ke意思？反正……」

　　「Oi知『招出』ke方式，將來，mak-ke都分m̀到哩。」

　　「喔，liá mò相干，ngài m̀貪彭家mak-ke。」

　　「該你？……」

　　「Ngài he……」

　　他苦笑，mò講下去。做得lâu阿陵講mak-ke道理喏？其實也正經mò mak-ke大道理喏。

　　阿強伯ke信心，得到事實證明。阿漢他答應後，ti彭家ke催促下，馬上轉故鄉銅鑼，尋一位族長「作主」；招贅ke「寫字」儀式上，男方一定oi父或者母到場「作主」；他liá-ha ke情形只做得尋一位同宗長老來充數定定。

　　「遽遽去遽遽倒轉來，日仔既經看好。」阿強伯ke面項有一絲安慰ke笑意：「Lâu人請到『寫字』妥當——算算，堵好就he正日仔了。」

　　阿陵看阿漢怪怪仔，oi陪他去銅鑼一趟，他m̀肯。阿陵堅持oi去，他嘆氣講：

　　「你oi看ngài落喪樣仔？又m̀ he mak-ke光彩事。」

　　「該你樣恁急？……」

　　「唉！樣仔講喏？你m̀知啦。」

　　「Ngài sṳ̀ m̀知！」阿陵火氣當旺。

　　He。阿陵m̀會知得。他有時節也試著m̀了解自家。

　　M̀過，講自家m̀知，該he自欺；他心中明明白白，該he為著燈妹。Ti liá默默相處ke幾日日仔底肚，燈妹ke背影，側面，幾擺mò意中面對面ke匆匆一睞，都激起心中mò辦法抑制ke激情迴瀾。

　　另外，一擺短暫ke談話，he他心中甜甜ke隱密。

　　該日食夜後，月光光光ke暗晡頭，阿陵湊他共下去山溪釣蝦公。

　　月色好ke暗晡頭，蝦公會成羣泅到淺水石板項遊戲；該he釣蝦公ke好時節。方法he：用兩片山棕葉ke中骨，一枚thak等一隻活小蝦子，當作誘餌，另一枚作成活結繩套；ti羣蝦爭相攻擊誘餌時，繩套mò聲mò息ke tui蝦公尾部套入，然後用力一掣一提，活鮮蹦跳ke大蝦公就pûn「釣」上來啦。

　　因為成績m̀理想，阿漢想到下游kha深ke潭唇碰運氣；阿陵卻m̀想離開，他就一儕人順等山溪踏水下去。

　　又來到出入山溪ke淺灘仔。Liá搭位，堵好有一儕人tui洗衫ke石板項企起來。

　　He燈妹。他一眼就看出來了。

　　燈妹m̀知有發現他mò；彎下腰，擐起一大竹籃ke衫褲就oi離開。

　　他輕咳一聲。他驚怕嚇著人。

　　燈妹愣了一下，mò著驚，卻也斡頭看他一眼。斡頭ke動作lâu 擐竹籃he同時ke；pha he腳下石塊滑溜，或者輕重估計錯誤，燈妹圓身一傾——

　　「啊！」他搶前一步，同時伸手去攙扶。

　　燈妹既經企正，圓身企等起來，還衝他淺淺一笑。

　　月光下，燈妹ke淺笑，就án-ngiòng一綻即收，同時轉過圓身，擐起竹籃開步走開。

　　「阿……燈妹……」他tui打一下眼光醒來，冒失ke招呼燈妹。

　　「……嗯……」隔一段m̀短ke時間，燈妹正嗯一聲。

　　看起來燈妹he打算再回過頭來應ke，但he mò，動作停頓，就ti該片企等等。

　　「燈妹……ngài，ngài安做阿漢……劉阿漢。」

　　「嗯。」燈妹斡過頭來了，還he短暫ke一ke淺笑。

　　「Ngài……ngài來擐竹籃……好mò？」

　　燈妹yi像著驚一下，目珠擘到大大蕊。Mò想到燈妹ke目珠會án大哩。

　　燈妹搖搖頭，然後遽遽轉身，蹬蹬蹬拾階而上。

　　但he燈妹企ti石階ke頂端停下來，又轉身向他liá片講：

　　「……mò-oi到……下背該深潭……該……mò淨利……」

　　「Mò淨利」he有鬼怪魍魎ke意思。燈妹ti 歹勢慌張中還m̀記得關心自家喏。

　　他yi像m̀記得應。淨he久久凝凍ti該片。

　　石階上片yi像又出現一ke人影，因為he背（phoe）等月光，只有一ke高大ke輪廓，看m̀出he麼人。

　　「陵哥！」他喊。

　　人影消失了。阿陵ke應聲卻來自後背。石階頂段he麼人ke影仔喏？

　　「麼人看到ngài lâu燈妹講話了？」他想m̀出來。

　　 Liá-he第一擺lâu燈妹直接講話。亢奮中，有講m̀出ke舒爽；自家粗糙、浮躁ke心，也m̀知樣仔，忽然間轉化為柔柔ke，幼幼ke，甜甜ke，馴馴順順ke；還有，又yi像酸酸ke，澀澀ke，牽腸掛肚ke，充滿mò來由 ke憂愁……

　　該時，他瞭然ke看著自家該粒怯懦又興奮ke心；心中ti緩緩凝結，塑造，形成mak-ke……。

　　他知自家既經下了mak-ke決心。他也知自家既經mò法度改變自家。

　　故所，看起來他he m̀使考慮ke就接受入贅ke條件了。

　　回銅鑼，尋一位替他「作主」ke族長，他雖然滿口答應，而且立刻動身，m̀過他mò半息腹案。Ti阿婆活著ke時節，lâu他講ke該兜親戚，liá-ha印象都模糊不清。