《李喬小說─寒夜》

 | | | 轉寄

冒出 「墾戶」 來(5)

作者 李喬 漢羅翻寫：Suingi 2010.03.14

　　第二日，kì-teû共下到達蕃仔林時，彭家就留下芹妹lâu一羣細人仔佇屋家定定。

　　原來kì-teû歸家人出動，oi去墾荒；kì-teû一定oi在「墾戶」正式領有土地以前，盡最大力量「佔領」土地，造成既成事實。

　　假使該位葉阿添領了「墾戶」銜固然如此，就he lâu許石輝抬出來乜he共樣；ti「土地he ngài既經開墾了」ke情況下，一切有利條件正做得成立。Oi拚命，也正有拚命ke依據。

　　就因為án-ngiòng，全蕃仔林八家人，半隻月來一片防備先住民ke襲擊，一片冒險深入伐木拓地ke頭路，正經he捨生忘死ke。

　　「阿叔：阿母去捉蝦公了。」講話ke孩子阿漢m̀識他。怕he阿江ke孩子。他想。

　　「阿陵叔，ngài去喊順姑轉來。」芹妹講。

　　「M̀使。」

　　「該你兜去尋好了，都在上蕃仔林『蟾蜍石』附近。」

　　「Ti該上段？做mak-ke？」

　　「嗐！搶荒地啊！附近ke，都mò ên ke份囉！怪就怪ên kha慢來。」

　　「Ên出去行行。」

　　芹妹大大嗓門講：m̀去看看阿順姑？阿陵mò應她。阿漢忍m̀核瞠她一眼。Liá個細妹人也實在係……。

　　阿江ke細人仔喊阿陵阿叔，芹妹還he喊他阿陵叔，又he阿順姑？

　　Kì-teû就到附近「生田」，新開墾地看看行行。阿陵看阿漢一直痴呆懵懂ke樣仔，不多知仔透了一口大氣。

　　「佬弟：你án-ngiòng，ngài實在難過。Ên liá-ha就離開好咧。轉去加想幾日仔正決定，再來。」阿陵苦笑一下:「He ngài m̀應該，mò pûn你考慮ke時間。」

　　「Ngài mò其他親人，就認識你liá大哥。」

　　「Ngài知。」

　　「Án-ngiòng好咧：假使你代ngài作決定喏？」

　　Kì-teû就在樹蔭底大石板項坐下來。

　　阿陵認真ke想了異久正講：

　　「Ngài做m̀得代你決定mak-ke。假使he ngài，ngài也m̀敢接受；m̀過，假使ngài he劉阿漢，ngài接受。」

　　「樣仔講？」

　　「Ngài m̀敢，he ngài做m̀得；你mò共樣——因爭做隘勇段日仔ngài知。你擔當得了。」

　　「抱隘，oi拚命，ngài pha做仔贏。」他搖搖頭那，yi像oi擺脫mak-ke：「Ngài sṳ̀講……」

　　他十分苦惱ke he阿陵告訴他：彭家ke屘女尾妹嫁pûn他，或者他入贅彭家；假使he前者，就用一年抱隘ke酬銀，「分期」償作聘金。

　　「你sṳ̀講oi討抑he pûn彭家招，奈樣好？」

　　「M̀ he……該阿尾妹，m̀ he憨憨？」

　　「He，半傻半憨。嘿，pû-ngiòng，án-ngiòng ke顛倒好，人又當靚。」

　　「Ngài mò-oi討一ke憨憨ke pû-ngiòng。」
　　包尾，他訕訕ke表示：假使he該花囤女，他想「還做得」……

　　「Mò mò！你m̀知人秀siâu忒咧？」

　　「就he知故所……」

　　「他pûn燈妹剋死ke呀！Liá個細妹人oi m̀得嘿。」

　　阿陵講：本旦彭家he就打算lâu燈妹pûn阿漢ke，he他堅決反對，他做m̀得pûn好友娶個命帶「八敗」ke pû-ngiòng。

　　關於人興lâu許家阿枝互相有意思ke風聲，也既經傳開多日；許家要求人興入贅三年，彭家自然m̀肯失去家中生產力最強ke人。結果雙方都當m̀歡喜。

　　自從人秀死後，彭家托人要求用燈妹lâu阿枝仔「交換」，許家堅決拒絕；後來考慮接受憨女尾妹，liá時節又冒出邀請劉阿漢抱隘ke問題。因為阿陵堅持做m̀得用燈妹「傷害」阿漢。故所彭許兩家ke「交換婚姻」，mò奈何停頓下來。

　　也故所，人興lâu阿枝仔liá一對有情人陷入極大ke困境。

　　Liá-ha，阿漢居然oi「壞命」ke花囤女，mò-oi靚靚ke尾妹？

　　「阿陵哥：你正經相信細妹人會剋死老公？」阿漢認真地ke講。目盯盯仔看阿陵。一瞬以後，目珠底背閃過一絲詭譎ke mak-ke，唇角漾起了轉忽ke笑意。

　　他ke神色使阿陵迷惑著。阿陵心頭也掠過一片意義含混ke心焦焦，m̀過嘴還he振振有詞ke講：

　　「命運，he絕對有ke，註定ke，樣做得m̀信？明知he有毒ke——細妹人，樣做得oi？」

　　「你做m̀得用án-ngiòng講該——花囤女。」

　　「……」阿陵又愕一下。

　　「人，mò降下來就註定會害人ke。」

　　「該he命嘛。」

　　「上天m̀會pûn人註定án-ngiòng ke命。」

　　「……」阿陵怔怔ke看他。

　　「假使有án-ngiòng ke命，上天就m̀會pûn他降下來。」

　　「你正經án-ngiòng想？」

　　「He啊。」他笑了起來：「Ngài一直án-ngiòng想，單淨有án-ngiòng想，ngài正有辦法過日仔。」

　　阿陵決定自家上「蟾蜍石」，先同「老丈人」報告阿漢ke意思。 阿陵走後，阿漢紊亂ke心緒，逐漸平靜下來。他liá-ha正對剛下án-ngiòng坦率表露心願，感到奇怪lâu驚訝。

　　Ngài奈來恁大ke膽量呀？

　　Ngài心肝肚，到底樣仔想ke喏？Ngài正經疑懼不安，還he阿陵哥一開口，實際上早就決定oi了喏？Ke he mò辦法預料ke日仔，lâu頭那拎ti手項ke生活；ngài會迷迷糊糊ke就接受人家去「講」？阿陵去liá一講，事情m̀就正式進行了？

　　「Mò-oi隱瞞詐憨。」他了當ke戳穿自家：「你liá傢伙！老早就記掛等該燈妹咧！老早就中意人家咧！」他m̀多知仔獨自訕笑起來。

　　Liá時節，阿陵lâu一ke婦人家tui崎頂行下來了。阿漢企起來，點點頭，算he打招呼。他應該喊一聲「阿陵嫂」ke，m̀過就喊m̀出口。

　　阿陵ti東看西看，m̀看他；顛倒he阿陵嫂對他笑笑，自自然然ke。

　　他有個明確而強烈ke感覺：阿陵嫂——liá位面目妓好ke少婦，眉宇神情之間，有一抹奇特ke mak-ke。

　　該he一種變了形ke遺迹、留痕，或者講he lâu內心ke真實相反ke影仔。就像：凝視烏黑ke甲蟲一下，然後忽然間lâu視線挪開，該時目珠仁會閃現lâu烏黑相反ke影像——白亮亮ke甲蟲。

　　阿陵嫂ke神情he歡樂ke，舒展ke，甚至he幸福ke，mò愁mò慮ke；liá-he她內心ke真實表露mò？

　　目光轉動時，mò意中睞啊過，他發覺阿陵嫂ke腰幹異像有kha粗咧。He mò？Án遽？一股神秘同迷惘ke悸動一息一息搖撼他ke心扉。

　　M̀知樣仔，他盡m̀願意想起該人ke音容竟忽然間浮現腦海，又佔領歸ke地盤。

　　「阿陵嫂真像她……」他喃喃自語。