《李喬小說─寒夜》

 | | | 轉寄

冒出 「墾戶」 來(3)

作者 李喬 漢羅翻寫：Suingi 2010.02.21

　　腦寮ke正中央，he一座五尺高，七八尺見方ke灶臺。灶臺項安裝直徑四尺ke銑鐵鑊；鑊項承搭一ke底部lâu銑鐵鑊共樣大細，上段漸漸仔收束（約底部ke一半），高八尺木板紮成ke「蒸炊」。「蒸炊」lâu銑鐵鑊之間，用一ke鐵條篩架支撐等。

　　「換炊」ke第一步，he lâu「蒸炊」頂蓋掀起，讓剩餘ke蒸氣消散，然後打開設ti「蒸炊」腹部ke「炊門」用五爪筢子，lâu蒸餾過ke樟木片耙出來。樟木片he腦丁用小斤斧，tui巨大樟木項「剷」下來ke。小斤斧ke頭路產量很少，為了逐擺三個時辰一「炊」ke大量樟木片，腦丁必須日夜辛苦「剷片」；三四個人鼎一座腦寮，艱苦異常。Liá也he一般人m̀肯輕易做腦丁ke原因之一。

　　——「出炊」完畢，其次he「入炊」；封閉「蒸炊」炊門後，lâu màng蒸餾過ke樟木片，tui「蒸炊」頂口倒下；為了增加容量，還得一ke人進入「蒸炊」踐踏一番。裝淰「蒸炊」，蓋緊頂蓋就算「換炊」完成。

　　Án-ngiòng重新升火煮熬銑鐵鑊ke水，用沸水ke高熱蒸氣騰入「蒸炊」，蒸餾樟木片ke油分……。

　　「蒸炊」接近頂蓋一尺下端，用一ke桂竹筒或者薄鐵皮管——「蛇管」lâu含油蒸汽導引到離灶臺近丈ke水槽底背；水槽ke水引自山澗清泉，「蛇管」ti水槽底背曲曲折折盤圈一堆，含油ke蒸氣餾過水槽ke冷却後，tui「蛇管」ke出口流出，流進米斗形鐵皮桶底背。鐵皮桶有上下兩個壺嘴，上細下大；tui上端小壺嘴流出，注入陶甕底背ke he樟腦油；tui下端大壺嘴流出ke he廢水。廢水溫度很高，而且含有分解些許樟油，he最上等ke洗身水—— 洗過ke圓身，liá暗晡蚊蚋毒蟲就m̀敢接近了。

　　「換炊」ke頭路全部完成，四個人都累出一身大汗。洗好澡時，四圍既經一片烏暗。M̀過灶底背ke火苗正旺，蒸餾過ke樟木片還殘留等油分，做柴火用十分理想。

　　空氣底背飃等當濃ke樟油香味；樟樹ke火苗，ti暗夜肚，顯得特別艷艷ke血紅。

　　「吱吱！咯咯！吱吱！咯咯！」

　　腦寮外背，崗陵上頭，輒常有山猴，lâu貓頭鳥，山鷄之類野禽ke喊聲。

　　阿漢幫m̀上忙，總就睡ti舖等禾桿ke竹架眠床項。阿陵mò閒忒雜碎事務後，liá正坐ti眠床頭透大氣。

　　「阿陵哥，你當悿，睡一下吧。」

「M̀，m̀會。」阿陵沉聲講：「Liá-ha ngài就lâu蕃仔林ke事故告訴你……」

「哦？事故？……ngài做得幐手麼个?」

「簡單講：請你『抱隘』負責蕃仔林地區ke防蕃頭路……」

「Ngài抱隘？你講笑！你？」

「聽ngài講。」阿陵m̀分他講落去：「Liá-he整套計劃ke一部份：kì-teû蕃仔林ke人oi自家申請做『開墾戶』當然oi請自家人來『抱隘』，故所……」

「唉！Mò án-ngiòng mò頭mò腦好mò？來龍去脈講清楚來嘛。」

「Lâu你講：蕃仔林，忽然間冒出一ke『墾戶』來啦！該血汗頭那換來尿坑大細ke田園，oi平白pûn人搶走哪！」