《李喬小說─寒夜》

 | | | 轉寄

屙屎嚇蕃(10)

作者 李喬 漢羅翻寫：Suingi 2010.01.31

　　他長長敨一口大氣，然後向庄尾細路ke小隘寮行去。

　　面對等去淋漓坪ke路，他想起癩皮旺ke死，阿陵ke耳光，也想起瀝底寮ke蘇陳滅門慘劇；還有「屙屎嚇蕃」ke妙計……

　　小隘寮就在面前。在他遲疑間，底背冒出一ke隘勇來。He綽號「阿狗」ke老人家。他m̀知阿狗ke真名實姓。

　　「還吂走？」阿狗問。

　　「嗯，oi走了，故所來看看。」

　　「有mak-ke好看？」

　　Liá-he單淨做得容下兩個人ke空間，liá-ha祇有阿狗一人ti守寮。

　　底肚除忒一ke陶製茶壺外，就祇有壁項一ke三寸闊一尺長ke「神壇」了。神壇項放等一ke竹筒算he香爐，香爐後壁項貼一張紅紙，頂高寫等「威靈顯赫義民爺之位」。

　　「暗晡頭，還he一人守？」他問。

　　「嗯。人員m̀-la，pha oi隔一寮留人了喏。」阿狗講。目光不由ke落ti義民爺ke神位項，久久mò挪開。

　　阿漢默然。He，一儕人，特別he深夜。關起木板門，tui唯一對外ke通路——拳頭大細ke「銃眼」望去，寮外ke一切都太遙遠了；友寮更he隱入漆黑之中。

　　Liá時節寮肚當然也he一片烏暗，m̀過香爐項點一枝香，心肝肚就kha穩貼。

　　敢m̀ he？義民爺陪伴ngài守隘哩！義民爺，虎豹龍蛇都得敬畏祂，生蕃惡徒自然m̀敢摸上來。

　　還有該一縷香煙，也he 當大ke安慰；盯等香ke一點火紅，鼻等淡淡清香，心肝肚身項就án-ngiòng充滿了勇氣。

　　「阿狗哥，你也該……」他試著m̀好ko講落去。

　　「你講退職？」阿狗悽然一笑:「Liá把年紀，去食西北風？唉！實在yi驚奈日隘寮也mò-oi ngài樣葛煞？」

　　「……」

　　「故所，哈哈，ngài想m̀當有一日，就ti liá片pûn——」阿狗做一ke tok頭ke手勢：「Mò定著án-nè還kha爽快。」

　　「該——四塊銀，樣葛煞？」阿漢講。他m̀知自家樣會對老阿狗講出án-ngiòng殘酷ke話。

　　「你講買命ke四塊銀啊？哈！Ngài早有打算囉！」

　　「哦？」他笑等，他知自家笑到yi難看。

　　「Ngài一直欠老蒜亥三塊半銀——一直留等liá個賒錢數目，將來——哈哈！」阿狗講到認真八百。「老蒜亥」，he南湖庄細妹人店ke老鴇……

　　Mò言。他mò言。連一句安慰ke話，ya-he輕鬆俏皮話都講m̀上來。

　　他揮揮手，往另外一ke隘寮行去。當堵好，涂水火，酒鬼尤春木等幾個比較熟ke伙伴，都堵好值勤。Lâu kì-teû談談聊聊，又過了半日。

　　Liá時，他有一ke重大發現：liá兜留下來ke隘勇，差m̀多都he四五十歲ke，甚至有六十左右ke老人家。

　　「Liá兜老人家，樣仔守，樣仔打仗喏？」

　　他回到集會所，向刴三刀提到liá個問題。

　　「Ke oi看kì-teû來ya m̀來啦。」刴三刀講:「黃大獅ke妙計假使mò效，南湖庄單淨有撤退一途了。」

　　「撤全庄，ke還得了？幾十年ke基業！」

　　「有mak-ke辦法喏？ 」刴三刀落寞ke一笑。

　　阿漢m̀知講mak-ke好。他又再逗留兩日，然後離開。他ti大湖隘勇統制所tai了一夜，第二日共下牀，他就聽著隘勇們ti議論紛紛。

　　「黃金裘lâu蕃仔唬住了！」

　　「線民講：蕃仔驚到會死，m̀敢動啦。」

　　「加里合彎社派人來講和……」

　　「Kì-teû m̀敢離開蕃社外出……」

　　阿漢mò參加談論，總he惦惦聽等，想等。想起深夜到淋漓坪「搞」ke該一步數，心肝肚空空落落，居然mò一息興奮ya-he奇妙ke感覺。

　　「實在悲哀……」他想。

　　麼人悲哀？隘勇？後住民？先住民？Ya-he自家喏？Mò定著都m̀ he，Mò定著都he。

　　他決定馬上離開大湖，去石圍牆看阿陵「兩公婆」……