《李喬小說─寒夜》

 | | | 轉寄

出草，著天釣(18)

作者 李喬 漢羅翻寫：Suingi 2009.11.08

　　——第三日ke下晝，一ke日頭斜黃斜黃又清冷ke下晝頭，人秀在一陣規身抽癴後，喉漣頭「咯」一聲，頸根一偏，就恁呢過去咧。

　　在斷氣前，他識倏然tui昏迷中醒了過來。面色有卡紅潤，人看起來清醒又自在，眼神旺旺ke。他轉動頸根ti尋人。

　　「阿爸ti liá片，阿秀，樣？」阿爸蹲下來。

　　「燈妹喏？Ngài oi看看燈妹……」人華lâu燈妹súng到人秀面前。人傑、尾妹等，也都全圍了過來。

　　「做m̀得啦！m̀會好啦！阿媽，阿爸，阿秀不孝……」

　　「Mò亂講，好好休息——你有卡好咧！」

　　他又淒然一笑。用目光搜索一下。包尾停在燈妹面項。燈妹不由ke跍下，跪等，m̀敢回看他。

　　「燈妹！」阿媽ti她腰間扭一下：「遽tâng頭，看阿秀！」

　　燈妹頭那tâng起來。她認真ke回看人秀。她知liá-he mak-ke意思；m̀使人教，她知。

　　人秀ke眼神，燃燒柔和ke火焰。雖然正一下仔定定，m̀過她完全看清，看懂；人秀m̀識用liá種眼神看她，也m̀識有麼人án-ngiòng看她。她真切ke感到自家ke心，甚至整個身體都oi碎裂分散了。

　　「燈妹，妳oi保重，ngài做m̀得了，ngài做m̀得……」

　　「嗚……」燈妹一直緊緊咬等下唇，liá時節激烈ke一惇，總算迸出噭聲。

　　「阿爸，阿媽……ngài聽你，你兜……」

　　「M̀放心mak-ke？講，你講。」

　　「聽你，阿媽，阿爸……唉！M̀好對燈妹……」

　　「？……」

　　「燈妹她……」他ke面色開始轉壞，顯然劇痛又起：「燈妹mò mò，mò做m̀著，mò怪……」

　　「阿，阿秀……」燈妹跪著拜了落去……

　　然後人秀差m̀多還斷續講一息仔話。續等he噭聲爆裂，然後他試著自家圓身pûn一隻強力ke mak-ke捉起，súng開；m̀，he拋開。以後就陷入窒息ke濃霧之中，以後又失去知覺。

　　人秀「著天釣」死亡。第二日朝晨頭，徐日星做「和尚」，完成喪禮法事，當晝頭就用tâng-tâng編織ke新ke桿苫包等，埋葬在「生田」上面，伯公廟後ke墓地。Liá塊墳墓地既經有五六位先來ke人客。

　　就在liá日——正月十八日下晝，人華細聲lâu嫂子良妹講一ke消息，結果良妹囥ti屋肚噭到喊生喊死。

　　該he「屯兵營」ke隘勇傳出ke；阿陵ke左耳光連同一片皮肉pûn劈忒ke消息。