《李喬小說─寒夜》

 | | | 轉寄

出草，著天釣(8)

作者 李喬 漢羅翻寫：Suingi 2009.08.30

　　「頭仔！你拿出主張來啊！」老隘勇癩皮旺講。

　　「Ên做m̀得殺入社。」刴三刀沉聲講:「就mò講統制所m̀允許，ên七八十人攻過去？萬一kì-teû反撲殺進庄來，樣葛煞？」

　　「南湖庄又m̀ he紙糊ke！」

　　「還有：假使m̀ he加里合彎社幹ke，he蘇魯社，或者馬那邦社，甚至得磨波耐社，樣葛煞？」

　　「……」

　　「你斯講，ên就án-ngiòng……」有人表示強烈ke不滿。

　　刴三刀始終當冷靜，他提出具體而穩當ke做法：

　　一、為防止先住民可能全面進犯，各隘勇寮實施加倍人員戒備。過年前後，南湖庄壯丁一律參加站崗放哨工作。

　　二、由這二十人立刻出動，搜捕殺害蘇陳兩家ke兇手。

　　「抓得著嗎？」大家所關心ke he liá一點。

　　「盡力一試——m̀過安全第一！」

　　「先住民出草獵頭，假使完全成功——斬獲敵首而同路人員又全部生還——該時先lâu敵首放ti「達極仔」(網織背袋)中，迅速脫離現場。先到敵人追踪m̀到ke安全地帶，然後ti溪畔取出首級，除忒腦漿lâu舌mà，再割下顱髮；一部分頭那毛納於隊長ke燧器袋中，其餘ke pûn斬下首級ke勇士纏在手腳項lâu刀鞘項。

　　Ti確實查清mò敵人追踪時，正到達社庄附近ke「搭搭糾克」——出草ke休憩處。Ti liá片向社庄發出凱旋信號，準備接受全社人ke歡迎……

　　依據liá個行動習性研究，假使出草ke隊伍he來自「加里合彎社」，kì-teû ke「安全地帶」或者「搭搭糾克」，應該ti該社ke東南方，也就he南湖庄正南方，南湖坑ke上游「淋漓坪」一帶。

　　另一方面，liá一路線，也就he「蘇魯社」、「馬那邦社」、「得磨波耐社」出入平地ke唯一途徑。Liá-ha集二十隻火銃ke兵力，ti liá一帶搜索兇手，也做得扼制kì-teû出草ke咽喉。

　　「大家先ti庄口等候。」刴三刀下達命令：「Ngài回所去分配戒備任務後，馬上來。」

　　刴三刀走後，有兜附近ke庄民也圍上來，ti一片耀眼ke火把照映下，都yi像m̀記得ke淒慘ke一幕，也m̀驚該嚴冬午夜ke酷冷；人人單淨有一ke心意：抓到兇首，報復liá個血仇。

　　「Ngài知liá兜鬼，定著囥ti該片。」癩皮旺講。

　　「哦？該 ên kiak去，mò pûn kì-teû走忒。」

　　「等刴三刀啊！」

　　「等mak-ke？反正該兜鬼，也m̀敢面對面ke拚——ên行！」

　　「He啊！Án-ngiòng火把光光，mò幾遠就lâu kì-teû嚇走。」

　　大家議論問，用癩皮旺為首，有七八個人丟下火把，順等南湖坑畔ke細路仔就摸索過去了。

　　「阿漢，去mò？」阿陵問。

　　「嗯……」阿漢漫聲應答。

　　其實阿漢還màng正經領會阿陵ke意思。

　　Tui一眼看清ke殘酷慘絕ke一幕起，他ke心神就pûn凝凍了。他木然而茫然。單淨有感覺，mò知覺；總he耳光邊轟轟作響，眼前焰舌亂顫；輝煌火光底肚，有一灘灘鮮紅ke，紫紅ke，烏黑ke血；抽縮等ke手腳，腫脹ke血口，四散ke碎肉片……。

　　阿陵看他嚇得三魂七魄都出竅啦！笑笑，轉身lâu癩皮旺打前鋒去了。

　　等到刴三刀轉回來，留ti庄口原地ke單淨剩下十一ke人。阿漢該時正清醒些，也正發覺阿陵m̀ ti身邊。

　　「唉哉！」他暗喊m̀好。

　　「壞了！」刴三刀譴到像oi噴火樣仔:「Liá兜傢伙m̀聽命令，簡直去送——」

　　M̀管樣仔，該隻「死」字還he m̀忍出口。

　　刴三刀下令高舉火把，逐儕人都點燃火把——緊迫追趕該兜冒失先行ke傢伙。

　　「Án-ngiòng擎等火把，樣仔捉人？」有人反對。

　　「抓人要緊，抑he救該兜糊塗蟲要緊？」

　　「哎呀！頭仔，mò mò鳥卵啦！Kì-teû，保證mò事。」

　　「Mò定著kì-teû既經得手了喏。」

　　「頭仔？」阿漢關心ke he阿陵等ke安全：「你講kì-teû？……」

　　「Kì-teû án-ngiòng打暗摸，咳！火銃有mak-ke用？麼人卡熟識地勢？」

　　「該……該 ên kiak尋！你講蕃仔囥到奈？」阿漢試著心口喉頭頂撞得厲害。

　　「蕃仔定著ti草叢中，極可能ti溪畔烏葉竹叢底背！」

　　天項地下一片烏暗，加上風雨咻咻，去奈尋喏？

　　——砰！

　　 ——砰！砰！

　　忽然間，近在十丈開外傳來銃聲，he隘勇用ke六角長管火銃發出ke。Liá-he隘勇們最新型ke銃仔。

　　——砰！砰！

　　「大家喊殺！大聲喊！kiak衝過力！」刴三刀下達命令，同時自家抽出鞘刀，像一下風向前捲去。


◎客語「唉哉」作嘆詞有兩用：一表驚訝、意料以外用；一表絕望，或者十分惋惜之用。