《李喬小說─寒夜》

 | | | 轉寄

東洋蕃來了(12)

作者 李喬 漢羅翻寫：Suingi 2012.01.15

　　下晝，西南風轉強。苗栗街還he平靜如常，中港溪該片，海線ke通路項，還he mò麼動靜；發生變化ke he，苗栗街南北兩邊郊區，甚至龜山山項，接連龜山上段ke大坪頂一帶，都有陣陣ke銃聲，該he當生份ke銃聲。

　　「秀官，你看樣仔？」既經he未申之交時節了，剁三刀緊來緊煩躁。

　　「嗯，ngài想……」歪頸講。

　　「樣仔？Mò-m̀-chho̍k，he mò？有古怪。」

　　「 Mò-m̀-chho̍k。Ên放該一砲，鬼仔就mò再出現……」歪頸倏地目珠擘大大：「老總！危險！Ên！」

　　「撤？你講pha he前後？……」

　　「著！Tui苗栗街，tui中港轉銅鑼該條路摸上來——包圍！」

　　「Lâu ên逼向西南斷崖？」

　　「著！營頭崠，實際上he監視哨定定，仰仔去保護苗栗街？兩門老臼砲，湊熱鬧差m̀多。」

　　「該，ngài立刻下令撤——撤到南邊崗坪項去！」

　　「著，恁呢正有退路。退入苗栗街內，該就pûn甕中捉鼈啦！」

　　——m̀過thióng慢咧。大約申時二刻，一ke派ti西山山口ke哨兵留下一條血路蹶轉營區。幾個人lâu暈死ke哨兵抬起來時正發現，傷者ke大腸既經走出來。傷者單淨講出兩隻字：「好多……」

　　「大家往苗栗街方向撤；到了西山山腳，mò-oi入苗栗街，轉到南邊山崗逃生！」

　　——砰！砰砰！砰砰！

　　一下密集ke排銃聲掩蓋了剁三刀後半段ke命令。鬼仔兵，m̀知樣仔，tui空曠ke草地四圍邊緣忽然間冒了出來；都he插上閃閃刺刀ke長銃，黃衫黃帽項，還綴等有兜鮮紅ke小飾物。Liá兜，ti奇夢幻想肚都mò可能出現ke怪模樣……

　　「殺！」有幾隻膽大ke，居然飛舞大tok刀衝了過去。可惜衝出幾步就pûn敵方銃彈打中倒下了。Kì-teû ke搶，打一發後，單淨oi一拉一súng銃膛就做得ko扣扳機，射出致命ke子彈。Liá得人驚ke速度，使所有有經驗ke隘勇也面瀝青，轉身逃命了。

　　劉阿漢mò火銃，隨手抓起一把細長扑刀，跈等剁三刀往東南方向菅草濃密ke地勢m̀平地帶撤退。他既經下定決心，oi lâu老總行共下。

　　「降！放下武器降啊！」敵人yi像ti喊話。

　　——砰！砰！砰砰！砰砰！銃聲卻一陣密過一陣。

　　「衝m̀出去了，囥入草叢吧。」剁三刀講。

　　「天烏就好了。」

　　「差m̀多了。」

　　頭頂項，身旁，銃彈還he咻咻飛來；幾十百丈項端ke營頭崠項脣，還he一片銃聲lâu吶喊聲。

　　「He ngài m̀好。Ngài……」剁三刀咬牙切齒講。

　　——呀哈！苛啦！

　　驀地，tui山項衝下來一臺日軍。剁三刀首先向下崎竄了落去。Liá-he大難臨頭各自逃命了。劉阿漢囥ti一垤全he青苔ke巨石凹處；薄暮ke黃光底背，眼前忽然間一烏。他險險voi驚喊起來。

　　他看著兩隻腳，用布條thak等ke腳。一看就試著該m̀ he臺灣人或者清廷官兵ke腳。該兩隻腳緊倒退路，就oi轉過圓身lâu他相向對立啦。

　　他，雙手緊扼細長扑刀，往對方腰肢部位大力送出。刺入——「嘿——嗞！」

　　「唷——喔！」

　　他，圓身化作一粒石塊，向另一濃密草叢擲去；ti氣息一窒ke瞬間，他知身體著地了。他猛力一滾，立刻連鑽帶爬地脫離該堆草叢。

　　就ti liá同時，狂雹驟雨般ke子彈，既經射向本旦該堆草叢。

　　他感覺著四肢胸背項，好多處隱隱作痛或者熱辣辣ke。他知liá兜都mò相干。他ke意識清醒又精確；一種汹汹熱浪湧自心ke奧底。
　　他知該he強烈ke求生意欲，他充滿了信心lâu鬪志，，一ke絕對不移ke意念支持他：做m̀得死！做m̀得死！定著oi有命！定著會走出去；就把扼該一瞬間，嗯，一瞬間。

　　他囥入一條山溝肚。忽然間一陣中人欲嘔ke腥味sùng了過來，同時他ke手掌摸著黏膩ke東西。Liá-ha差m̀多完全烏忒。特別he山溝底背，mak-ke都看m̀著，m̀過他知手項tàu著ke he鮮血，當多鮮血。