《李喬小說─寒夜》

 | | | 轉寄

東洋蕃來了(9)

作者 李喬 漢羅翻寫：Suingi 2011.12.04

　　劉阿漢m̀記得先住民襲擊ke危機，m̀記得可能跌落崎ke危險，像一ke pûn魍神迷著ke人，順等山徑直行。他行到大湖街既經he雞啼時分。

　　天光過後，他發現路邊、屋牆項，張貼或者懸掛等yi多通告。他認得幾隻文字，像「鄉勇」「義民統領吳湯興」等——liá兜字都he ti南湖隘勇寮時學ke。

　　他當自然ke來到關帝廟脣「大湖隘勇統制所」。Liá片，意外ke，yi像堵好ti施放「義粥」哩。粥香sùng來，腸胃一下翻騰起來。他liá正想起自家幾下餐mò辦法食飽了。

　　原來liá片ti招募壯丁；m̀ he去防先住民，he開往苗栗或者新竹防東洋蕃。

　　「南湖隘，全散了。」老隘勇lâu阿漢講。阿漢本旦還想回南湖做隘勇。

　　「掛一ke名吧。一到苗栗，每員就發三個銀。」招募人員講。

　　「M̀ he六個銀？」

　　「賸ke三個銀，oi編訓好，開去對陣前正發。」

　　阿漢心肝肚還he空空茫茫ke，mò辦法思考mak-ke。M̀過，有一團悶火ti燃燒；他想咬碎mak-ke，tok倒mak-ke；他想看著紅紅ke東西，他想chhṳ̀死mak-ke。

　　他報了名。當日下晝，有二十零「壯丁」就開往苗栗街；有十幾人he隘勇出身。Liá日he立秋，陽曆八月八。

　　——新竹城ke敵我攻防戰，ti六月二十二日展開。M̀過大湖口，龍潭坡，大嵙崁直到新竹一帶ke義民前仆後繼，緊pûn他日軍間歇出沒 ke攻擊，故所日軍主力緊滯留ti新竹之北。

　　六月廿二日，新竹城陷落。但he用吳湯興、姜紹祖、徐驤為主ke五千以上義軍，仍然分佔新竹四郊，並積極準備反攻。




註：乙未年，吳湯興等義軍抗日事蹟，其時地經過各家講法極雜又互有矛盾，曾迺碩教授之「吳湯興事蹟考證」一文，對於時地事件等有極精密ke考證校誤，本文有關部分大抵依其講落筆。