《李喬小說─孤燈》

 | | | 轉寄

一、哭聲 (3)

作者 李喬 漢羅翻寫：李珊伶、劉敏貞 2011.12.04

他teû行出庄仔，來到庄仔入口「伯公廟」前。永輝表示oi拜一拜，祈求保護平安。明基笑著答應。 　　

明基係全蕃仔林ke人之中，唯一受過中等教育ke人-工業學校夜間部畢業。他已經無相信妖魔鬼怪liá teû講法，m̀過，tui祖宗神主，伯公、義民爺等等，他還係十分虔誠。 　　

Liá下，永輝行在面前，他緊thet-tén.他teû都跋慣嶇崎ke人，ku-só腳步當大，還做得講笑。 　　

日光，大塊大塊，tui樹葉仔縫底背倒瀉出來。Liá下ke日光，還係涼涼，lâu周圍染成一片亮黃。 　　

忽然間，草叢底背旋起一陣風-一羣「蕃薯鳥」在他teû身邊打一ke轉，然後挾著喳喳聲，飛向樹林深處去。 　　

「南洋ke片，m̀知有蕃薯鳥無？」明基講。 　　

「管他阿姆，南洋有mak-ke鳥！」永輝無來由發譴。 　　

阿貞圓圓白白ke面，紅通通軟綿綿ke細阿妹仔，又在腦際閃現。M̀過想「看」個詳細時，sa又消失m̀見thet lè. 　　

「你火氣樣án大？」 　　

「當熱。坐一下啦。」 　　

明基好像在使性仔，還係繼續行。永輝祇好打起精神thèn上去。兩儕都m̀講話，在想自家ke心事。 　　

永輝係用「台灣勞務青年團」ke名義，pûn人征召。Lâu明基ke三哥明森pûn人征召ke「南方農業挺身隊」，性質差m̀多。 　　

三十四歲ke明森在去年初調去南洋，今年9月10號由庄役場（鄉公所）ke人護送轉來。Ke時一身烏燥燥ke皮膚，包tén瘦瘦ke骨頭，面貌身材，差yit-sit 失thet人形；實在難想像，ke係以前強壯像赤牛ke明森。 　　

明森轉來，經過一隻零月ke調養，身體漸漸恢復，m̀過人好像變成了半瘨半瘋了；m̀ 係發出細人仔ke吵鬧，就係發出pûn人驚ke怪笑……。 　　

嗯。Liá下假使忽然間接到取消征召令有yit好。永輝忽然間想到：或者太平洋戰爭結束了，或者皇軍勝利了，或者戰敗了。唔，樣做得án-ngiòng想喏？他緊緊校正思路：假使我忽然間弄瞎一隻目珠……或者斷一隻腳……唔，ke也做m̀得，一pûn巡察大人懷疑了，m̀ pûn人硬打死chang怪唷！Ke……。 　　

「喂！休息一下啦！」liá囘明基提議。 　　

頭那頂起來一看，liá片係「上蕃林仔」。Tui liá片再跋上一條「閻王崎」，差m̀多花上四點鐘，chang做得到達鷂婆嘴。 　　

眼前係菅草叢生ke李仔園。李仔樹光禿禿，一看就知，m̀係正常ke落葉，也m̀係因為太燥，提早落葉；係樹幹根全燥死。