《李喬小說─寒夜》

 | | | 轉寄

兒女情(6)

作者 李喬 漢羅翻寫：Suingi 2010.06.13

　　Ngài有mak-ke面見人？還有阿枝仔……

　　想著阿枝仔，心口ke疼痛加劇了；該he mò影跡，mò固定部位ke劇痛。

　　Liá一張揚開來，喊阿枝仔樣仔做人喏？

　　「阿枝仔：妳liá-ha樣仔？He pûn人綁了起來mò？但願妳平安……」

　　阿枝仔，當可愛ke細妹。他細膩ke，m̀盼得thióng遽ke，定定仔思念起阿枝仔來；ti心版項，浮凸、清晰又正確ke描摹阿枝仔ke形容：

　　阿枝仔身材苗條，手腳當長，辮子烏烏亮亮ke，面當白，皮膚當幼，mò像長年日曬風吹ke女孩；m̀過，該白皙中透出ke紅潤彩光，做得知她十分康健。長長ke目眉毛，長長ke目珠，柔柔ke鼻公，微微翹起ke圓嘴：liá兜配置ti略略嫌瘦ke面項，她m̀使講話，就勝過千言萬語了，該份情意全表露出來。

　　人興第一擺he看著她ke背影：粗布衣衫下，一ke柔美優雅，pûn人當舒服ke倩影。

　　他歸身yi像mò來由ke泛起一身汗，或者he一種波紋tui底背往外幅射，震顫遍全身。就ti liá時節，該倩影，m̀知樣驀然轉過身來。

　　啊！第一眼，he第一眼，他確切ke相信，兩個人ke目光he ti她轉過身來ke一ngia̍p目就立刻相堵頭ke。

　　該he yi美、yi烈，也帶兜仔野性不馴ke眼神。

　　「……妳？早哇。」他倉皇失措。

　　「早！你安到人興吧？」她竟喊出厥名。

　　「He，he。Ngài……妳，妳安到……mak-ke名字?」

　　「許枝妹，阿枝仔，嘻嘻！」

　　Án坦率，開朗，笑到明媚又燦爛。

　　Tui liá時節起，他就失魂落魄ke，偷偷仔苦苦ke思念阿枝仔。

　　從此以後，阿枝仔ke目光眼神越來越靚，越柔越迷人；第一擺所見ke強烈野性也漸漸仔消失。

　　阿枝仔yi像一頭強壯ke小母鹿，下擺仔溫馴，下擺仔任性，惹人遐思，誘人偎近，m̀過又m̀ pûn人忒狎近。

　　Ti深山肚，人ke心特別容易接近，經過幾擺自然ke約會，兩個人都一步步沉陷ti甜蜜同苦澀交織ke情網底背。

　　但he，ti liá片，男女交往，mò論已婚男女ke偷情，抑he少男少女ke相戀，總下認為he大逆不道ke——「通到」，liá-he極m̀名譽ke罪名，只要兩人獨處ti偏僻mò人ke所在，pûn麼人發覺了，就幾乎pûn認定既經「通到」了，以後就yi難ti當地安身。

　　不幸得很，kì-teû ke來往，早就pûn發覺，然後pûn禁止；禁止mò效，雙方試圖用「交換婚姻」處理，m̀過雙方「條件」m̀相當，只好作罷。

　　人興lâu阿枝仔ke情，既經做m̀得作罷，ti liá期間，阿枝仔識pûn阿媽斥責過，禁足過，甚至羞恥ke挨過打；人興也pûn嚴重警告過。

　　今晡日下晝，盡大ke「羞恥事件」sa總算揭開：

　　下晝，一下狂烈ke「風時雨」來襲；因為連續半時辰，山溪猛漲，山洪就泛濫到卡低瓤ke新墾地。

　　今晡日做m̀得ko趕工了，大家啄等雨提早轉去，人興留下來監視山洪ke情況。

　　怕he未申交接時節，「風時雨」忽然間停歇；洗後ke草木山野，ti日頭下閃著濕濕ke翠綠光芒，空氣底背飃等淺綠淡藍ke氤氳。

　　該薄薄ke暑熱，統統沖刷清淨了。

　　人興悠然睡在潮濕到像泥濘ke斜坡草地泥項。

　　他本旦就脫掉淋濕ke衣衫ke;一網涼涼帶略略仔癢癢ke感覺，tui赤裸ke背板傳過來。

　　他忽然間試著自家ke肉身完全lâu背板下ke大地合而為一；自家he大地ke一部份，自家也he草木中ke一頭；他尋m̀到自家ke形像，甚至在組成「阿興」ke一團感覺，也tui混沌而融溶而消失。

　　然後，一切yi像ti夢中án-ngiòng。

　　Liá兜日仔，做夢he唯一ke享受：夢中總he事事如意ke。

　　他總he夢見阿枝仔。見面時，他永遠he木木訥訥。腦筋也變到還卡憨，mak-ke也mò辦法表達。M̀過，阿枝仔講她明白他ke意思，明白他ke心。Án-nè就做得了。M̀過，他就he恨自家講m̀出來。

　　夢中，liá兜困難都圓滿解決了。他暢所欲言，而且會做出有兜大膽ke舉動，甚至得人驚ke事。

　　阿枝仔又出現ti他夢中。

　　阿枝仔ke衣褲he燥ke。可見he雨後正溜出來。她看等他痴痴仔笑。

　　他對她招手。她遲疑一駁仔就行過來，ko柔順ke依偎ti他胸膛項。Liá個動作、很自然，因為近幾擺見面時，兩人m̀多知仔就會相攬一下；雖然總he身軀一接觸，兩人就同時警覺而緊緊撤退，然後都脹紅了面。

　　M̀過，liá一擺阿枝仔yi像也ti夢中——哦，本旦he ti夢中嘛——難怪她久久緊貼ti他胸膛項，軟軟ke，燒燒ke，她真he又軟又燒，壓到人好舒服。

　　「M̀好，ngài打赤膊哩！」他心肝肚著驚。

　　M̀好。該日——搬來mò幾久ke一ke清早，大哥大嫂ti「燒焿」ke灶坑附近，ke幕天蓆地ke一場遊戲，他識睞了一眼，就ke一眼，卻也永遠深烙心項。該央時他立刻離開，mò幾久又轉去想再看看……

　　該he比聽人家亂講鬧笑時提到ke遊戲還kha動人ke一幕。Liá安到「百聞m̀像一見」。他想。

　　Liá-ha，大哥大嫂ke ke場遊戲，又mò名其妙地浮項腦海……

　　忽然間，他全身泛起微微ke震顫。手腳挪動了一下。

　　「Mò-oi……」阿枝仔嬌喊一聲。

　　「阿枝仔……妳，嫁pûn ngài吧。」他講。喉頭乾乾ke。

　　「好嘛。」

　　「Liá-ha！阿枝仔，liá-ha就嫁pûn ngài……」

　　「Liá-ha……liá-ha樣仔嫁？……」

　　看m̀清楚她嬌羞ke模樣。讓她趴伏ti自家身項he m̀著ke；唔，哪有細妹人壓ti男仔人身項喏？M̀好看。大哥大嫂就m̀ he án-ngiòng。

　　然後，阿枝仔就反過來，睡ti地泥項。阿枝仔緊閉目珠，面頰紅得yi像遽落山ke日頭。

　　他心肝肚很亂。很激動。眞ke很激動。

　　阿枝仔yi像阻止過他。M̀過她ke嗓音太微弱了，樣仔抗得過自家耳光邊洶湧奔騰ke山洪聲響？

　　實在大哥lâu大嫂。樣會pûn ngài看到喏?

　　就像大哥大嫂án-ngiòng。Ngài he向他學ke，麼人喊kì-teû讓ngài看見？

　　「阿興你……啊！」

　　「阿枝仔，mò，mò要緊……」

　　「阿興……」

　　「阿枝仔……ngài，ngài oi妳嘛！」

　　——忽然間，身邊ke草木枝葉猛烈搖晃起來。He一下狂風吧。

　　M̀ he風。He夾雜等腳步聲ke樣仔。還有斥責譴罵聲。

　　大家亂作一團。幾大ke石塊飛過來，打ti他ke肩胛項。然後m̀知mak-ke棍棒向他揮過來。

　　他yi像mò抵抗。他ke胸腹、背部挨了好幾下重ke。他始終mò反抗。他唯一清醒ke意識he隨便人家吧！死也隨便人家！

　　包尾他pûn押到許石輝家。原來he許家兄弟「獵獲」ke。老頭子倒he冷靜得很，阻止孩子們動武，也免去綁ti他身項ke黃蔴繩索。

　　許石輝lâu徐日星、蘇阿錦尋來，然後共下到彭家理論去。

　　事情就án-ngiòng。就tui kì-teû樣仔決定，他就樣仔接受任何決定。

　　Liá-ha他既經m̀識ko替自家設想mak-ke。Ke一股狂亂ke情緒也既經紓解。他liá-ha只擔心一點：阿枝仔m̀知樣仔了？

　　「虎毒m̀食子，總m̀會……」他想。

　　他太累了。Án-ngiòng一想，ke千鈞重壓ke疲累就四方八面擠向他；全身酸酸，澀澀，軟軟，yi像oi解散樣仔。

　　他睡在濃密ke草叢中。深夜，漆黑ke深夜。大地濕漉漉ke。