《李喬小說─寒夜》

 | | | 轉寄

兒女情(4)

作者 李喬 漢羅翻寫：Suingi 2010.05.23

　　Ngài去死。她想。「Ngài去死」liá ke意念，幾年來幾乎一直khong ti腦海ke某一角。M̀過該he脆弱ke，m̀真實ke；阿秀正死，她pûn屋家人指等鼻公直呼害人精ke日仔，也老想到死，但he想死ke念頭輒常夾帶畏縮，懼怖，mò奈何ke感覺；心肝肚隱約明白，liá ke意念lâu正經行動，還有一段距離。

　　Ya he講，自家單淨拿「ngài去死」liá句話來阻擋別人ke指責，或者欺瞞自家thin-thin。

　　Liá-ha m̀ he。Liá-ha竟然he平平靜靜ke，自自然然ke；pha he長久內心掙扎ke結果，pha he忽然間萌生ke；或者都m̀ he，he時間既經到咧。

　　該he當微妙ke時間啊。

她tui眠床項坐等起來。她記得竹壁項有一垤鏡仔。Mò燈火當然映m̀出自家ke形貌，除非鬼魂。

　　今夜阿秀ke鬼魂定著m̀現身了。她試著缺少mak-ke；也有一種小小ke贏了mak-ke ke味道。

　　雙手托等面，輕輕仔揉一揉，然後順手整理散亂ke頭那毛。該兩條乾乾短小ke辮子幾乎散開ke；她總就lâu辮梢項ke髮帶拉脫，讓頭那毛披散下來。

　　「差m̀多鬼魂就he án-ngiòng？。」

　　她想自家he微微仔笑了一下。

　　她m̀輕m̀重ke súng開竹門，行到禾埕項。

　　一勾弦月，正掛ti屋前赤柯樹樹梢。

　　初夏ke午夜，正經he冷涼像水。

　　喲喲！喲喲……。茅屋後背，狐狸ti喊。

　　狐狸pûn人邪邪ke感覺。她yi像鼻著狐狸ke該種強烈ke羶騷味，起一身鷄mà皮。

　　Liá一身鷄mà皮助長了害怕；m̀過liá種害怕居然隱含特異ke快感lâu奇妙ke誘惑。

　　略一猶豫以後，她就拉開籬笆門行出去。

　　她行下斜坡，ti伯公廟前企一下；她雙手合十，緩緩拜了三拜。

　　目汁，還he mò來由ke，盈滿眼眶，並溢出眼眶，迸濺落去。

　　伯公伯婆啊！保佑……保佑彭家阿爸阿媽身體壯壯，頭路發展……

　　伯公伯婆：保佑ngài ke mò見過面ke生身ke娘，該m̀知thò奈ke阿爸富貴……

　　伯公伯婆啊！阿燈妹liá就走了。以後請指點ngài ke野魂孤魄……

　　她清楚ke聽到伯公伯婆「嗯」了一聲。

　　她mò往墳地睞一眼，也mò ko想起人秀。

　　她離開細路仔，行入河眠床，向一汪潭水前進。

　　忽然間，身後傳來吆喝叫喊聲。

　　她全身一震，m̀過立刻快步向前衝去。

　　一勾弦月就ti眼前，就ti腳邊。弦月ti灰暗ke天幕右角搖晃。

　　心肝肚清楚得很。她向灰暗天幕行去。後背ke喊喊聲越來越大，其中還夾帶等尖銳ke責罵。

　　心肝肚實實在ti明白得很。她ko向前跳躍幾步，然後一咬牙。向月亮ke片奮力跳上去：

　　結果她還he pûn人救起來。除忒彭屋家人以外。Mò驚動蕃仔林ke其他人。從此，她pûn人囚禁ti「新房」肚。

　　但he，彭家需要她ke勞力，特別he葉阿添想來搶佔土地以後，mò奈何冒險lâu她放出來共下工作。阿強伯講：

　　「阿燈妹，妳mò尋死。彭家m̀會強留妳——當遽就會lâu妳送走。放心。Liá-ha乖乖pûn ngài做事！」

　　——Liá-ha，正經oi pûn她嫁人了。劉阿漢，實實在在有án-ngiòng一ke男仔人，就留ti附近。Ko年歲m̀大，當好看，聽講也he一ke孤兒。該mò mak-ke m̀好。Liá正堵好相配喏。他，他生著很好看……

　　咦？樣仔敢想到相配ke事喏？

　　還偷看了人家！一ke女孩家。樣仔做得想到人家「生著很好看」？啐！真見笑……

　　不由ke，雙頰發燙，心肝緊peu； m̀知tui奈片竟然湧出yi像安到甜蜜ke感覺。

　　啊！「甜蜜ke感覺」？Liá-he平生màng曾嚐過ke。

　　燈妹她，忽然試著風涼氣爽，天高地闊，周圍ke所有，都án-ngiòng生動可愛起來。

　　「M̀過，án-ngiòng好ke運道，真會he ngài ke mò？」

她又跌入疑懼與灰心ke泥沼。