《李喬小說─寒夜》

 | | | 轉寄

屙屎嚇蕃(6)

作者 李喬 漢羅翻寫：Suingi 2009.12.27

　　Liá暗晡，下半夜起，雨毛仔轉成少見ke浩洪斗雨。天亮後雨勢轉小，氣溫卻又猛降下來。

　　刴三刀遵照黃大獅ke意見，今晡日m̀打hong牀鐘，pûn大家隨意睡，早餐也隨意mak-ke時節食，m̀過不准任何人溜出營區一步。 　到當晝頭，又恢復雨毛仔；ke深山春日特有ke嵐煙霧氣也籠罩下來了。

　　「Liá-he最最理想ke天氣，嘿嘿！」

　　食晝以後，黃大獅命令盧成：「一切照計畫施行！」

　　到liá時節，刴三刀lâu歪頭兩人也既經約略瞭解liá一「計」到底he樣仔一回事：

　　首先，lâu四張矮腳飯桌teu起來，然後lâu昨晡日煮熟既經冷忒ke蕃薯倒to桌項。Ko來lâu四簍芎蕉去皮後，也和蕃薯堆共下。 包尾派幾儕人lâu芎蕉和蕃薯攪成糊泥。

　　糊泥香噴噴，pûn人想流口涎水，但he水份thióng多，顯得thióng軟。

　　「Lâu磨好ke米粉倒上去！」盧成下令。

　　「Ên oi請蕃仔食蕃薯粄啊？」隘勇們忍m̀核了，m̀記得做m̀得多問ke禁戒。

　　「Liá-ha lâu米粉攪勻來。」

　　大家m̀多知仔笑了起來。M̀過黃大獅，刴三刀，盧成，歪頭，全都一本正經ke，大家ke笑聲也就半途停下來，吞啊轉去。

　　攪拌好ke蕃薯糊泥he淡黃色ke，韌度也增加了；lâu它分裝to八桶飯甑——也就he隘勇們盛飯用木製大飯桶。

　　下一步工作he，lâu炒到lat-lat ke米糠分裝to四桶水桶，然後lâu搜購ke五十斤烏糖平分倒入去攪拌一下，勻勻ke lò共下。

　　「當香喔！」看ke，動手ke都食指大動，口涎水駁駁跌；甚至有人偷偷掘一垤塞入嘴肚。

　　「好了，liá-ha lâu東西放to屋肚，大夥去睡當晝！」盧成講。

　　「申時都來了，還睡當晝？」

　　「睡m̀落覺就去眠牀項睡等！」刴三刀大聲講。

　　「記得，今晡日liá兜把戲，不准張揚出去。」黃大獅揮手喊大家散開。

　　盧成請刴三刀選四儕得力勇頭，入來參加開會。本旦正規編制ke勇頭單淨有三員，招募ke兩個「頭仔」前天都開溜了，劉阿漢pûn選上遞補liá個缺額。

　　「Ngài又m̀ he頭仔，開mak-ke會？」

　　阿漢雖然恁樣講，還he行入刴三刀ke細屋，lâu其他人員共樣坐好。他pûn示意就坐ti最外背ke矮凳仔項；án-ngiòng lâu黃大獅堵好面對面。

　　他忽然間試著驚驚，m̀敢大大方方放眼看去。Liá個人yi像有一股mò形ke威勢。Mò頭mò腦ke khin啊過來。

　　「齊了。還斯你講吧。」黃大獅向盧成講。

　　盧成點點頭，斡頭睞刴三刀一眼，然後lâu全套行動ke細節講了出來。

　　時間：今晚，午夜開始行動，預計天亮前返防。

　　地點：分四路進行。一隊tui義民廟偷偷打暗摸前進。渡過南湖坑，到「加里合彎社」附近。其他兩隊強行軍趕到正南面，越過淋漓坪，ti武榮山腰「大禾埕」一帶，另一隊tui淋漓坪折向正東，爬登大邦山，到達寬敞ke山腰附近。

　　編隊：每隊tui勇頭率領十人，另配黃大獅ke十員兵勇十lâu火銃，一共二十人為一隊。

　　「黃……大人，到底，oi ên做mak-ke？」

　　「去嚇kì-teû。用嚇。」

　　「嚇kì-teû？樣仔講！」

　　「M̀使緊張。Liá-ha就解釋pûn大家聽。」盧成忽然笑了起來。
　　M̀過一下又收斂笑容。Ke瘦乾ke小臉，liá一笑一斂，顯得很滑稽。

　　「大家聽好：ên就用liá兜香噴噴ke東西……」

　　盧成ke口才真好，講得詳細又生動。本旦大家皺起目眉毛，集中心神聆聽，後來目珠擘到越來越大，嘴也擘開了，闔m̀上去啦。

　　包尾，揚眉，瞇眼，嘴唇定定仔咧開，接著m̀知麼人先「哈哈」一聲笑了起來。接著哈哈笑聲lâu一切都掩蓋了。

　　哇哈哈！哈哈哈哈！哇哈！

　　刴三刀也捧腹大笑。黃大獅ke團團肥面，也笑得yi像裂開紅仁ke石榴果。M̀過ke總he恬恬ke笑，mò一息仔聲息。

　　「記得：oi絕對肅靜，絕對秘密行動。」盧成一本正經。

　　散會後，四個勇頭便分別去招選隊員。