《李喬小說─寒夜》

 | | | 轉寄

出草，著天釣(16)

作者 李喬 漢羅翻寫：Suingi 2009.10.25

　　「痛死ngài咧！啊！」人秀背囊一彎，身仔折一下，睡啊落去。

　　人興遽遽lâu老弟半身扶tèn起來；他也坐ti地泥項，pûn老弟phu到自家圓身項。

　　「樣葛煞？」人興緊惇，mò了主意：「喂！麼人來救命喔！」

　　「唉唉唷！啊……」

　　聞聲奔過來ke he許石輝ke大哺娘lâu二心舅。

　　「看！他，他……」人興講m̀落去。

　　「肚屎痛？Mak-ke時節起ke？Liá……」

　　「剛下！就剛下！」

　　「當痛當痛？啊！他ke面……」

　　人秀ke面一片淡青煞白ke，痛到扭曲。在人家指指點點ke時節，嘔嘔連聲，擘嘴緊phûn。但he phûn出來ke東西卻m̀多。

　　「遽，背他，背他轉去！遽！」

　　她們幐手lâu病人扶上人興背上。二心舅又拿來一條背帶；用背帶穿過病人手khia下，lâu ke軟粢搭碓ke圓身綁疊在人興背上。

　　人興腰磬啊落，pûn背囊彎度減少，就án-ngiòng背等人秀，下崎，遽轉屋家。

　　阿媽lâu人華夫婦，尾妹都還ti屋家。大家一看，都嚇著木頭人樣仔。

　　「遽！Pûn放到眠床項睡！」石輝婆lâu來了，liá時節祇好pûn出點主意。

　　「啊！阿秀樣仔喏？」阿媽總算回過神來。

　　石輝婆講先睡下來要緊。最好he做得卡無風、燒暖ke地方。

　　阿強婆示意人興lâu人背到「橫屋」——ke he年下特別為人秀lâu燈妹「圓房」趕緊搭建ke；位所ti正房右前方禾埕項。

　　人華khie̍t上屋背赤柯樹，向山園，生田方向呼喊阿爸lâu大哥轉屋。

　　至於人秀，睡在眠牀項——墊上稻草ke桂竹片牀舖——疼痛有增mò減，痛著雙手猛抓，雙腳亂踢；圓身翻滾，睡也m̀得，趴也m̀得。

　　「媽呀！痛死ngài咧！唉唷！Ngài oi死咧！Ngài oi死……」

　　「阿秀！阿秀啊！阿秀你樣仔啦！」堅強ke阿強婆坐到眠牀唇，終於淚流滿面。

　　「阿強嫂！」石輝婆ti厥耳光唇講:「妳看阿秀，he mak-ke……？」

　　「啊！……」她淚眼擘到大大。她心肝肚有數，但he她搖頭。她搖頭ke幅度越搖越大，她oi否定心肝肚ke個可怕 ke東西。

　　Ke he非萬不得已，麼人都m̀願提到ke；它lâu另外一種惡症，he人人比面對鬼怪還懼怖ke東西。

Liá-ha，人秀既經明明pûn ke東西纏等；liá個人，天光日就he新郎公，就oi「做大人」——石輝婆忍m̀核也淚盈滿眶。

　　「不！不！阿秀m̀ he！Ngài ke心肝m̀ he啊！」阿強婆越想越驚，越驚就越絕望。她m̀多知仔lâu心中拚命抗拒ke意念，大聲講了出來。

　　Mò幾久，人傑最先趕到，續等阿強伯，良妹，都轉來了。

　　阿強伯瞭解大體事情後，目珠擘大大粒，mò ngiap目看等眠床項身仔打折kiû等ke人秀。

　　「奈痛？」

　　「肚屎，肚屎！肚屎全都痛。」

　　「奈盡痛？」

　　「肚臍下方——liá-ha移移、移到肚臍右右下方……」

　　「異痛he mò？」

　　「嗯，像，像鐮刀割ke，鋸仔鋸來鋸去……」

　　「Liá-ha還án痛？」

　　「好，好一點點，一點點……」

　　阿強伯一直冷冷ke，沉靜ke；表情動作僵直木然。他yi像心肝肚舖蓋一層冰霜，mò一絲傷懷痛心ke模樣；他ti努力隱藏一團隨時會爆炸ke怒火樣仔。

　　過了一下仔，人秀又一拱一扭ke，手腳不斷伸直又收縮，又蹬又踢，然後像撕裂mak-ke án-ngiòng，不斷悽厲ke叫喊，噭眵。 　　屋家來了當多鄰舍，m̀知mak-ke時候燈妹也轉來了。她he去阿錦伯ke蕃薯園割蕃薯苗ke，pha也he聽著人華m̀尋常ke喊叫，冒會挨罵ke危險轉來ke。

　　她pûn眼前ke情景嚇到歸身緊惇，兩腳軟落去；她想挪前去，又m̀敢造次。

　　結果芹妹推她一把，她liá正驚驚ke行到人秀眠床前。

心頭he空洞洞ke，m̀ he悲傷，哀痛，總he害怕，極端ke害怕，極端ke困惑lâu孤單ke感覺。

　　「走開！」阿強婆lâu她掣開，推走。

　　她嚇得全身差一點離地跳了起來；緊緊用力嗚掩擘開ke嘴，囥ti屋角恬恬流目汁。

　　屋肚ke人，忽然間向兩邊讓開。原來「先生」徐日星到了。「先生」除「選日腳」，「上表章」外，還he蕃仔林唯一略曉醫道ke人物，他m̀知樣仔也得到消息趕到。

　　除忒人秀ke哀叫以外，大家恬恬mò講話，期待「先生」看出頭緒來。

　　「先生」望、聞、問、切一番，sap目凝思半晌，然後伸手ti人秀肚腹ke劇痛部位按捺一下。

　　「講吧！He mak-ke！」

　　「天釣。著天釣。」 「先生」冷酷ke宣佈。

　　「Ngài子呀！哇！」阿強婆ke圓身由眠床唇溜下去，撲倒在地泥項。

　　「人秀啊！」阿強伯終於也老淚縱橫。

　　「著天釣」lâu「瘂狗痧」he必死ke絕症。特別he「著天釣」，除忒oi受盡非人ke疼痛折磨外，liá個病名，還含有受天懲罰ke意思——為非作惡，受到報應，pûn上天「釣走」，ke he十分羞恥ke事情。

　　屋內屋背，一片死寂。連人秀ke叫喊也忽然間切斷了。大家抑制呼吸，m̀敢發出一絲聲響。

　　「唉唷！Ngài……ngài『著天釣』？」人秀果然聽到。

　　「喔，m̀，m̀ he啦。」人傑sak-sak跍下來否認。

　　「先生」向大家示意，大家恬恬後退，轉身一儕儕離開；大家都向人傑表示：「用得著ke時節，會來幐手。」

　　好心ke鄰舍離開了。「用得著ke時節」，liá話指mak-ke喏？人傑也避開屋家人，偷偷chhu̍t目汁。

　　關於救治人秀ke事，lâu許石輝、蘇阿錦兩位老者商量ke結果，決定不動病人；派人去大湖庄請走方醫生詹祝。詹祝本旦he「製腦」工頭，知兜仔單方lâu「湯頭」；大湖庄mò正式醫生，他摸索久了，就儼然用醫生姿態出現。

　　「Liá-he盡盡人事，聽天由命啦。」蘇阿錦ke意思當明白。

　　「嗯，命。強強oi加上來ke，liá-he命。」許石輝講。

　　阿強伯淒然一哂，他mò嘛做得理解許石輝講ke大道理，m̀過，他知ke he寬慰自家ke話；有兜lâu自家以往想法當mò共樣ke話。但he，liá兜又有mak-ke用喏？

　　人秀緊ti一波一波ke劇痛中掙扎。到了下晝，呻吟喊叫ke聲音微弱yi多；ti劇痛ke浪潮過後，間歇ke有一下昏睡。Ti昏睡中，又pûn另一劇痛高潮撼醒。

　　臨暗頭，詹祝由人傑兄弟lâu蘇家兄弟等護衛著到達蕃仔林。 小山村底背，各戶yi像he kûi屋家人，聽到醫臨診，大家又聚來探看究竟。

　　詹祝lâu大家請出人秀ke房間，留下人傑陪等看病。 　　詹祝ke診斷當簡短，一盞茶工夫就行出來。人傑再三問話，他都異像mò聽著樣仔。