《李喬小說─寒夜》

 | | | 轉寄

隘勇个日仔(4)

作者 李喬 漢羅翻寫：Suingi 2009.05.24

南湖庄ke隘勇寮，直接受大湖隘勇統制所ke指揮。目前駐紮ke「留隘」二十人，「游隘」四十人；liá幾日情勢mò麼个對，臨時又tui大湖該片調來游隘二十五人。總共有八十五人ke兵力。

來南湖ke第五天，劉阿漢lâu另外一儕隘勇徐水火，奉命去統制所連絡事務；臨晝邊仔，正踏入「閂門棍」ke山排，隘勇寮ke集合鐘堵好響：「緊迫情況。」

「Ên上哨站看看，偷一下懶。」徐水火講。

「全隊集合，樣做得m̀去？」

「嗐，M̀-he就án-nè——oi ên賣命，等m̀及啦？」

兩人拉拉扯扯khie̍t上「閂門棍」頂。

Liá片ke面積有四坪大細；細細ke茅寮，做得容納四五儕人。日時頭，兩人放哨，暗晡頭加兩人上去；liá-ha he癩皮旺lâu酒鬼尤春木兩人值勤。

「樣仔？」阿漢問。

「奈有樣仔？反正kì-teû會出草咧。」

「奈時？」

「算得準，仗就m̀使打啦。」

出草，he一種奇襲，kì-teû專門ti危險得人驚ke情形下動手；先pûn對方增加心理壓力到最高點，然後出人不意忽然間動手；然後恬恬撤離，ko mò留痕跡。假使he明銃對陣，kì-teû 絕對mò辦法抵抗。

「Ngài看有兜奇怪——你兜kiak來看！」酒鬼尤春木講起話來總he醉意十足。

「怪呀！liá回kì-teû……」徐水火he老隘勇，做得pûn他大驚小怪，定著m̀簡單。

「奈有mak-ke奇怪？」阿漢看咧異久，恅著kì-teû故弄玄虛。

「哼！看河唇ke一排排ke東西！」

「喔，二十幾下儕人——奈有mak-ke東西。」

「看m̀出來kì-teû ti做麼喔?」

「啊。Ti磨刀哩！磨戰刀！好傢伙！」

阿漢lâu涂水火都嚇著；兩人對看，作聲m̀得。癩皮旺lâu酒鬼yi像早就知；m̀懷好意ke看等阿漢緊笑。

阿漢發覺涂水火面色却也掠過一絲異彩；ke he著驚並mò奈ke神色。續等，he黯然lâu漠然垂掛下來。老隘勇，平常總he án-ngiòng黯然lâu冷漠。

「Ngài做咧六年ke隘勇。M̀識看過liá種排場。」癩皮旺講。

「走。Kiak-kiak報告『刴三刀』去！」

「刴三刀」，he南湖隘勇段ke統領——南湖隘「哨官」。

阿漢lâu徐水火kiak-kiak下崎，走到集會所時，人員既經散了；mò想到全體集合，會án kiak就匆匆解散。

「刴三刀」堵好對liá片行過來，mò等kì-teû招呼馬上就下達命令：

「聽等：tui liá-ha開始，m̀准行出南湖庄五十步；多食飯，儘量睡，戒酒！」

「Kì-teû，kì-teû，ti河邊磨刀！」

「嘿嘿，早知道了。Mò事。多食飯，儘量睡。戒酒！」

Liá句話he「刴三刀」ke口頭禪。情況緊迫時，liá儕人絕對m̀講攻防ke事；他oi大家相信他，m̀使多瞭解敵情。單淨照厥計畫去做就做得。

事實上，tui他接掌南湖段隘勇寮兩年以來，經過三次陣仗，單淨損失五儕居民，四員隘勇，比起來，he盡「平安」ke歲月咧。

「刴三刀」he又矮又粗ke中年漢子。四方面，尖鼻子，小嘴巴；頭那毛tên-tên，加上滿面鬚菇。奇怪ke he，圓圓ke牛眼頂項，竟然mò生半根目眉毛：一張又怪又得人驚ke大面。

「刴三刀」he一ke當特別ke人。關於他ke傳說當多。聽講他he直接tui長山來ke，ko還he劉銘傳ke部下——一ke逃兵。又傳說he北部「葛瑪蘭」（宜蘭）ke獨行盜，哺娘子pûn先住民殺害，正會投身做隘勇哨官。

還kha荒唐ke一種講法he:他其實he一ke先住民。或者he有先住民血統ke雜種……。

「剁三刀」有兩種麼人都比m̀得ke本事：一he有兜泰雅族話他聽得識。二he他一身ke拳術非常高明，liá-he弟兄領教過ke。 Liá-ha「剁三刀」下達ke命令，做得講he盡嚴厲ke，可見情況定著十分危急。

劉阿漢想想。決定去尋黃阿陵講講話。