《李喬小說─寒夜》

 | | | 轉寄

東洋蕃來了(17)

作者 李喬 漢羅翻寫：Suingi 2012.04.15

　　他又倒轉去。他緬起庄仔左角該座紅瓦房；該he劉家輩份盡高ke炳榮叔公ke人家。銅鑼庄本旦就he一座小莊仔，他當遽就來到紅瓦房唇。

　　Mò-m̀-chho̍k，liá片he炳榮叔公ke大瓦房。Liá-ha，正廳帶有樓棚ke部份，暗夜中還做得看得當清楚。

　　歐，還有一堆桁柱化成ke炭火冒著一縷縷烏煙……

　　「阿炳叔公！喂！炳榮叔公喔！」他，拉開微顫ke嗓音高喊。 四圍一片闐靜。真he靜像死域。連風聲，雞犬家鼠行動ke微響都mò。

　　「麼人！有麼人在 mò？」他想想，又喊：「Ngài he劉阿漢啊，外鄉轉來ke！」

　　「唷……」m̀知奈隻方向，忽然間迸出yi像抑制m̀贏ke短促人聲。

　　「麼人？出來好mò？」

　　「……」

　　「喂！Ngài喊劉阿漢哪！Tui外鄉轉……」

　　——拍！波……該堆冒煙ke炭火，忽然間熊熊燃燒起來。火苗紅到略略仔得人驚，yi像懸掛起來ke一片鮮血；mò 定著霧氣thióng重，火焰擴散m̀開，就向上掙扎，結果緊拉緊長、緊細，ti末尾處，像一縷血絲，一下投入烏空中……

　　「喂喂！麼人呀！麼人出來一下好mò？」他yín喊yín倒退。因為背囊，無由ke冒起層層雞mà皮，寒毛根根直豎起來。

　　 Mò麼人應他。該mò名ke懼怖感排山倒海般sùng了過來，他ㄧ下轉身便走。心肝肚當亂，識想到馬祖宮前看看。但he mò，他打暗摸來到伯公廟。

　　土牆桂竹片屋頂，一丈見方ke伯公廟卻好好，m̀過一入小廟，他就pûn硬確確ke東西絆倒；倒下ke地方m̀ he平坦ke地面，he高大ke石板——他仆ti石板項——原來he伯公ke小石屋pûn扳倒下來啦。

「麼人！」有人出聲喝問。

　　「Ngài！劉，劉阿漢啦。」他企穩了。烏暗中看m̀清發話ke人。

　　「M̀ he本庄ke人？」另外一ke聲音問。

　　「本旦he，liá-ha tai大湖，蕃仔林……」

　　「……來liá血水地獄做mak-ke？」

　　「轉來看看……」

　　「還he逃吧。後生ke m̀逃，日頭一上昇，鬼仔又來了。」

　　「唉……」還有一ke人ke嘆息聲，he老阿婆。

　　「Ngài sṳ̀想，想探聽，該，該……」他正經講m̀出來。他驚，驚假使ko pûn證實。

　　「你講蕃仔林……」蒼老ke聲音講：「該你，就he該，該劉阿來ke細人？」

　　「劉添來！」他ke記憶中，除忒老祖母外，就再mò麼人提及liá深埋心肝肚ke名字：「正名喊劉添來。」

　　「著，he劉添來。早死了，你轉來he？」

　　「Ngài he轉來，轉來——」他忽然間想起：「你？你老he哪ㄧ位？」

　　「Ngài he劉苟順啊。你pha oi喊……叔公？」

　　「啊！你he苟順叔公？」

　　「喔，後生人，你，來慢咧！」講話ke he女ke。

　　「He若苟順叔婆。」苟順叔公講。

　　「叔婆，妳講忒慢？」

　　「你生母——阿猛仔ke餔娘，去了，比阿猛仔還早。」

　　「仰仔死ke？」

　　Mò-m̀-chho̍k，he ti房屋pûn放火燒燬，救火時pûn開銃打死ke；既經pûn埋ti大窖穴肚——lâu該兜pûn tok頭ke居民，包括徐阿猛kì-teû……苟順叔婆講ke。

　　「還有一部份，還mò埋妥——十幾隻頭，弄m̀清楚oi配奈隻圓身。」

　　「阿媽……」

　　「Ngài ke第三隻lâu屘子，也都pûn tok了！」

　　「你該炳榮叔公最慘了，kûi屋家男仔人全都……」

　　阿漢坐ti倒置ke伯公石屋頂高。烏暗又微濕ke虛空底背，m̀知mak-ke時節出現了一ke淡淡ke影仔。M̀ he影仔，he一個婦人家。一ke面項風霜痕迹太深，身仔骨太單薄太瘦弱又蒼老ke婦人家，凝立ti該片。