《江嵐客家文學專欄》

| | | 轉寄

阿細妹ke故事(2)

包尾有人lâu佢做媒人,講有一ke後生條仔老實又緣投,he因爭家庭窮苦ke關係正會吂討親,媒人婆有問過對方,對方肯佢度厥姆共下過去,講加一儕人幐手做事有麼該m̀好哇!該央時,單純ke兩子哀,mò探家風也mò去看男家頭ke屋生來仰般,就憑媒人ke一句話嫁到山頂高做山。

從細在街市項大ke阿細妹,自從就m̀識做過山事、摘過茶,頭一轉轉外家倒轉來,著高踭鞋lâu黃泥禾埕,踏到一窟一窟仔,厥家娘看著就譴之之仔問講:「He麼人食飽恁閒,拿遮仔lâu禾埕tung到一窟一窟仔?」這件事情阿細妹到厥家娘過身忒正敢拿出來講,下後he有轉外家,遠遠就lâu高踭鞋脫忒,打赤腳行入屋。山項ke人逐隻就當會做,麼該割禾、摘茶、擎樹仔、換工,mò分男女做盡就oi做。

阿細妹嫁過來ke時節,堵堵堵著出茶青ke時節,佢乜跈等大家戴笠嫲thak花巾,同人共下上山摘茶,頭磬磬仔摘到暗,轉到屋家又oi摘菜淋肥,順續罅兜豬菜轉來,煮飯兼煮豬菜,煮好食飯又oi煖水分歸屋家大大細細洗身,等歸屋家人洗身洗好,正有好輪著阿細妹同厥「卡桑」洗;食飯乜共樣,歸家人食飽,正有輪到阿細妹同其「卡桑」並細人仔食。阿細妹oi服侍厥家娘,又還愛lâu厥「卡桑」洗烏腳病臭phâng-phâng仔ke腳,還oi膏藥仔。頭一擺做山事mò經驗,m̀知日頭得人驚,洗身該下,面帕對頸筋項鉅仔落去,頸筋痛到跳起來,原來頸筋mò包著洋花巾,頭那磬磬摘茶,頸筋pûn日頭晒到起瘭就m̀知,起瘭爛忒又搵到水,真經痛到páng驫,目汁跈等洗身水共下流往下。

逐日打早天吂光,又oi洗歸屋家人ke衫褲,寒天時打早扐(let)等一大籃个衫褲,oi行到河灞唇洗衫,十指嫩嫩ke手,pûn冷颼颼ke河灞水浸到必忒,血流血著,阿細妹目汁含等,m̀敢講分人知。下屋ke阿炳嫂看m̀落去,輒輒拿藥仔同佢膏,總會勸話佢講:「做人ke大心舅生成仔oi較做,oi兜人ke飯碗就愛較堅耐兜仔唷!」。

頭一擺lâu人換工he山腳下he阿水伯蒔田,大家蒔ke秧仔做盡筆直,就單淨阿細妹蒔ke秧仔歪哥七叉,厥老公阿雲哥就pûn人笑到面紅紅,該暗晡阿細妹轉到屋有偷偷仔噭一下。總he嫁就嫁著矣,就算當時pûn媒人騙乜騙來仔,總講he自家ke命哪!第二日hong床,阿細妹同阿雲oi去阿水伯ke田項蒔田,在半路仔就講肚笥痛,喊阿雲先行,佢跈等就到。阿細妹就偷偷仔走去看別坵田ke人蒔田,佢在伯公下ke大樹唇看人腳緊退,手就緊插秧仔,一二三四五、一二三四五,原來佢兜用寫田字ke方法插秧仔,正會插來恁直。阿細妹就遽遽走轉去阿水伯ke田項,煞煞做事,過一暗晡定定,阿細妹ke秧仔蒔來筆直,大家就阿腦阿雲哥恁會教夫娘,憨直ke阿雲哥,m̀知佢自家ke夫娘he仰般學會ke,顛倒敗勢到滿面啾紅。