《江嵐客家文學專欄》

 | | | 轉寄

阿婆ke菜園

作者 Kông-làm...江嵐 2009.05.03

　　阿婆ke菜園有一個名仔，安到「芹菜園」。

　　「芹菜園」m̀-he因為種當多芹菜正得名，he因為阿婆ke名仔安到「芹菜」。阿婆一生人m̀識種過芹菜，也m̀識食過芹菜，佢一路里來就認為芹菜he pûn人食ke東西，種ke芹菜總he分人食忒，故所，佢試到種自家pûn人食，he盡憨ke事情。阿婆m̀食芹菜，吾歸屋家人也做m̀得食芹菜，食著芹菜就像食著阿婆共樣，he犯著大忌ke事情，吾屋家討入來ke心舅，第一項愛知ke家規就he這件大事情，一生人做m̀得食芹菜。

　　M̀種芹菜ke芹菜園仰會恁出名呢？該he因為阿婆手路盡好，種麽該生麼該，樣般種樣般生，佢種ke青菜總he肥肥大大葉，又嫩又多水份菜色盡靚，當得人惜。阿婆種ke竻瓜、蕃瓜、瓠仔、菜瓜，逐項都當會開花打子，連種番豆，收成就比別人種ke較好。故所ngài還細該央時，比別人較有福氣，食得到春夏秋冬，mò共樣ke季節，mò共樣ke菜色。

　　甜嫩多水份ke芥藍菜、藚仔、高麗菜，盡有春天ke氣味，mò魚mò肉ke童年生活，he有阿婆親手種ke青菜攪豆油好食，就he盡澎湃ke幸福味緒。熱天ke時節，大家就熱到火氣當大，食著阿婆種ke蕹菜、角菜、菜瓜湯，這種降火又有營養ke青菜，就做得清涼消暑過一ke熱天。秋天he ngài盡合意ke季節，台灣ke土地總he在這ke時節，滿崗滿屻，滿奈就看得到豐收ke果子同菜色，除忒番豆、瓠仔、香園瓜ke收成以外，菜園唇ke時計果（thò-kiet-só）也紅到變吊菜色，捧等飯碗，食一季ke秋味落肚，he仰般ke浪漫幸福你知無？

　　過年前ke油菜花、蘿蔔仔、芥菜，m̀使種到菜園肚項，田坵肚滿坵滿坪ke菜色，pûn上家下屋ke鄰舍儘採摘，食就食m̀忒，阿婆燒暖ke誠意，pûn庒頭肚項逐家人ke灶下燒暖過年。

　　阿婆盡惜ngài，逐擺度ngài去菜園做伴，m̀-he摘thò-ma-tó pûn ngài食，就he挖薑嬤分ngài帶轉去。從細就同阿婆共下睡，阿婆盡好用腳同ngài夾等睡，ngài he弄弄動，佢就會揑ngài，練就ngài這下ke好睡性，愛承蒙還細該央時同阿婆共下睡ke功勞。吾姆ke圓身項有茶米ke味緒，阿婆ke圓身項有番薯奶ke味緒，還細ke時節ngài盡惱阿婆圓身頂項ke番薯奶ke味緒，大姊講該he老人臊，ngài同阿婆共下睡，吾圓身肚項也有老人臊，ngài聽著盡閼。

　　這幾年仔，阿婆ke菜園pûn阿叔賣忒，起當大槓ke樓仔屋，阿婆坐在新屋ke壁角晒日頭取燒暖，mò人了解阿婆ke心事，這幾年來也mò人識看著阿婆ke笑容。今年過年，桌頂項又有又嫩又萋ke芥菜、藚仔、蘿蔔湯，81歲个阿婆，用皺皺瘦夾夾ke手，笑瞇瞇仔挾青菜分ngài食，ngài認得識阿婆種ke菜，有阿婆特別ke手路同香氣，燒暖又幸福ke味道。阿婆pûn ngài磧年錢該央時，ngài拉等阿婆ke手，問佢菜園在奈位？阿婆像做賊pûn人捉著樣仔，用手指甲撍（chṳm）ngài，喊ngài恬恬。年初一打早，天吂光，阿婆就喊ngài hong床，帶等ngài行過幾棟大樓，來到垃圾場唇項，看佢一垤細細垤仔ke菜園，菜園肚ke芥菜、高麗菜、藚仔、蘿蔔仔，種到拶拶（chat-chat）。

　　Ngài看著阿婆ke菜園靚靚ke菜色，同時看著81歲ke阿婆ke春天，正起勢定定。

　　（榮獲2008新竹市兒童文學創作奬甲等）