《戀戀台灣客家文學》

 | | | 轉寄

短劇：兩ke阿姆(下)

作者 Suingi 2026.08.02

(音效：雞啼)
阿芸妹：嘿~ngài來咧！(左片上臺)
阿喬妹：來唷~~~~~~~(右片上臺)
阿芸妹：這he ngài頭一擺來，送pûn你。(送等路)
阿芸妹：若爸爸媽媽呢？
阿喬妹：佢兜今晡日堵好出去尞。
阿芸妹：án nè呀，本旦ngài恅著會看著若爸爸媽媽。(yû兜失望)
阿喬妹：(看向觀眾)當然做m̀得pûn佢看著！
阿喬妹：來，ngài帶你參觀吾間項。(牽阿芸妹ke手，下臺)
(阿姆二揇等阿姆一ke腰，兩人上臺)
阿姆二：心肝寶貝，ên轉屋哩唷！
阿姆一：妹仔看著ên lí，定著當歡喜。
阿姆二：出去尞，仰做得mò佢呢？
阿姆一：一屋家人共下出去尞正yû意思！
阿姆二：上擺ên兩儕偷偷走出去南庄尞，mò湊佢共下，me難怪佢án譴。
(阿喬妹lâu阿芸妹上臺，二人快樂打嘴鼓)
阿姆一：達令~你實在還想得著！
(兩位阿姆看著阿芸妹、阿喬妹，阿芸妹、阿喬妹me看著佢兩儕，兩片馬上恬下來)
阿喬妹：阿姆！？(著驚)
阿姆一、阿姆二：有！(擎手)
阿姆一、阿姆二：若朋友來屋下尞呀？！
阿喬妹：阿姆你兩儕仰án早就轉來？
阿芸妹：這兩位tu he若媽媽？你yû兩ke媽媽？(著驚)
阿喬妹：啊……
阿姆一、阿姆二：(主動lâu阿芸妹扼手)你好你好！Ên he阿喬妹ke媽媽。
阿姆一：m̀知你今晡日會來，屋下mò準備麼个東西。
阿姆二：佢既經當久mò帶朋友來屋下尞咧！當歡喜你來！你定著he佢ke好朋友吼？Mò，佢m̀會帶你來屋下尞！
阿姆一：啊！Ngài實在忒感動咧！ngài等下去買菜，請你食好食ke客家料理！
阿姆二：鹹菜豬肉湯、薑嫲絲炒豬腸、鹹酸甜……，你想食麼个，m̀使客氣喔！做你講！
阿芸妹：阿伯姆，恁仔細！Ên he好朋友。Ngài me當歡喜今晡日做得來尞，還看著佢兩ke án靚ke阿姆。
(阿喬妹mò想著阿芸妹會án nè講，同阿芸妹拉to脣項細聲講話)
阿喬妹：阿芸妹，你會試著ngài當奇怪mò？Ngài yû兩ke阿姆，同別人mò共樣。
阿芸妹：he當特別mò m̀著，嚇著ngài咧！
阿芸妹：m̀過，你當幸福呀，比別人多一ke阿姆惜你，án nè當好。
阿芸妹：ngài頭一擺堵著正式多元成家ke家庭，故所嚇著，m̀過，該mò麼ke好奇怪ke呀！
阿喬妹：歹勢呀~ngài之前緊阻擋你來，就he驚怕你試著ngài當奇怪，yû兩ke阿姆，驚怕你就mò oi摎ngài做朋友咧。
阿芸妹：你想忒多咧！假使he正經ke好朋友，yû 麼个好棄嫌个？
阿芸妹：本旦，逐家逐戶就mò共樣。你兩ke阿姆感情án好，yu惜你，還好哪~
阿姆一：你兩儕ti該講麼个呢？
阿姆二：來來來，好食飯咧！
阿喬妹：(牽起阿芸妹ke手，me牽起兩ke阿姆ke手)好！Ên來食飯！