《戀戀台灣客家文學》

 | | | 轉寄

短劇：兩ke阿姆(上)

作者 Suingi 2026.07.26

戲劇名稱：兩ke阿姆

音效：雞啼

道具：
一桌二椅、衫箱、假錢、裙仔、等路、兩ke阿姆ke衫褲lâu鞋仔、客家料理。

劇本：
阿喬妹：坑水流呀流。
阿芸妹：從天光流to暗晡。
阿喬妹：細妹人ke手。
阿芸妹：餔娘人ke手。
阿喬妹：老阿婆ke手。
阿芸妹：洗過幾多舊衫褲。
阿喬妹：搓過幾多爛被單。
阿芸妹：這片就he苗栗南庄出名ke洗衫坑。
阿喬妹：he呀！
阿芸妹：ti這朗讀南庄現代詩詩人邱一帆先生ke詩，特別yû意思呢！
阿喬妹：he呀！Ngài記得先生識講過，頭擺還吂yû水道水ke年代，洗衫坑m̀單淨做得洗衫褲，還做得洗鑊洗菜、㓾雞捋鴨。
阿芸妹：洗衫坑me he鄰舍共下打嘴鼓，消息交換lâu放送ke所在。
阿喬妹：這下洗衫機án利便，洗衫店me i多，故所這洗衫坑就變做一項文化保存，me he外地人當hau來遶尞ke景點。
阿芸妹：he呀！就像邱一帆先生寫ke詩，洗衫坑洗過ke舊衫褲、搓過ke爛被單，見證咧ên lí客家世世代代傳承下來ke勤儉惜福ke精神。
阿喬妹：ko lòi，你想oi去哪尞？
阿芸妹：照ên lí ke計劃，行尞浪漫臺三線，續下來，ên oi去美濃尞。
阿喬妹：耶！Ngài想oi去買美濃靚靚ke油紙遮，還想oi食面帕粄，聽講lâu苗栗ke粄條mò共樣！
阿芸妹：其實ên共下去過án多所在，yû一ke所在ngài盡想oi去。(期待)
阿喬妹：哪呢？
阿芸妹：若屋下呀！(期待)
阿喬妹：吾屋下？！(面壢青)
阿芸妹：he啊！Ên尞一路來，哪就去過，你me來過吾屋下，ngài乜oi去若屋下尞，án nè正公平！
阿喬妹：嗯……啊……這……(迪迪凸凸)
阿芸妹：仰仔呢？Ên敢m̀ he好朋友？仰從來m̀識湊ngài去若屋下尞？這下ngài主動講oi去，你仰還mò麼願意？(譴)
阿喬妹：ên he好朋友，m̀過……(為難)
(兩ke阿姆上臺)
阿姆一：達令~你看啊~這洗衫坑ke水還清喔！(大聲)
阿姆二：喔~吾心肝寶貝~洗衫坑ke水oi清，洗衫正會淨啊！
(阿喬妹看著阿姆二、阿姆一，黏時洩到後背去，驚怕pûn兩ke阿姆看著。阿芸妹看to呆呆。)
阿姆一：達令~ngài想oi買靚靚ke裙仔pûn妹仔，你看~he這較好看，ya he該kha好看？(tui箱中拿出裙仔，揀揀擇擇)
阿姆二：當然he你盡好看！(扼等阿姆一ke手，深情告白)
阿姆一：唉唷~~~(使嬌)大家都緊看，莫án nè啦！
阿姆二：該就pûn佢兜看啊(霸總式揇等阿姆一，面向觀眾)哈哈哈~~~！
(阿姆一在阿姆二懷中使嬌，兩人慢慢仔行to臺下。)
(阿芸妹主動行to阿喬妹該片，lâu阿喬妹講話)
阿芸妹：佢兩儕tu he細妹仔。
阿喬妹：嗯……(心虛)
阿芸妹：佢喊佢達令，佢喊佢心肝寶貝……(指等兩ke阿姆，激動)
阿喬妹：嗯……(還啊心虛，假笑)
阿芸妹：佢兩儕還yû一ke妹仔？！(十分激動，聲音變大)
阿喬妹：嗯……(十分心虛，想尋空囥入去)
(兩位阿姆下臺後，阿喬妹行to臺前，左看右看。阿芸妹me行前來。)
阿喬妹：你正經想oi來吾屋下？
阿芸妹：ên he好朋友啊！做麼mò想oi pûn ngài去？
阿喬妹：mò啦，ngài mò án nè ke意思，你oi來，當然做得，m̀過……
阿芸妹：m̀過麼个？
阿喬妹：mò啦……ngài先準備一下，正m̀會忒失禮。
阿芸妹：好呀！耶！就án nè講好咧唷！來去~(下臺)
(兩ke阿姆恬恬上臺，兩人恩愛互動，在後背坐下來)
阿喬妹：(轉身行向兩ke阿姆，落喪落喪) ngài轉來咧！
阿姆二：啊~ên寶貝轉來唷！
阿姆一：南庄hó搞mò？
阿喬妹：阿姆！(譴)
兩ke阿姆：有！(嚇著，黏時企到正正，擎起右手)
阿喬妹：你兩儕仰會走去南庄尞？
(兩位阿姆對看)
阿姆二：(心虛)聽著你同朋友今晡日oi去南庄尞，ên me i多年無去，故所正會去。
阿姆一：還yû lâu你買裙仔。(拿出裙仔)
阿姆二：耶？你仰會知ên今晡日yû去南庄？
阿姆一：he呀！
阿姆二：敢講你yû看著ên兩儕？
阿姆一：該ên仰mò看著你呢？
阿喬妹：唉哉！一下án多問題，ngài oi先回答哪隻呢？
阿喬妹：(拿出錢)想來阿姆你兜me當久mò出去尞咧，堵好政府普發一萬個銀，你兜liá禮拜拜六拜日好好出去遶山花me i好。
阿姆二：(收下)唉唷~吾妹仔實在賢孝，還出錢分ên兩老出去尞。
阿姆一：惜來yû用啊！
阿姆二：he咩。這下當夜咧，好去睡目，來去~(兩位阿姆共下下臺)
(阿喬妹心事重重，行to臺前，對等觀眾)
阿喬妹：唉！你兜tu看著咧！
阿喬妹：吾屋下lâu別人mò共樣。
阿喬妹：從細ngài就mò阿爸，還比別人多一ke阿姆。
阿喬妹：逐擺朋友發現ngài yû兩ke阿姆，就試著ngài當奇怪，無oi同ngài共下搞。高不將，ngài就mò oi朋友來吾屋下尞。
阿喬妹：這下朋友堅持oi來，阻擋m̀得，僅可請兩ke阿姆出去尞，án nè，朋友來，就m̀會發現liá秘密。吾兩ke阿姆me m̀會pûn人笑、pûn人罵。Mò，驚怕佢兩儕正經會十二月ke芥菜——傷心。(下臺)