《江秀鳳散文專欄》

| | | 轉寄

都市大戇 

  Ngà舅姆he台北外省人,十九歲就嫁到ngà屋下。

  Yû一擺kì來台中尞,ngà姆渡kì去埔里,分舅姆ke福氣,ngài me yû好跈,先去「牛耳石雕公園」看落雪ke油桐花,風一來桐花溚溚跌,舅姆臥起頭來看到呆(ngòi)忒:「仰會恁靚哪?一生人就m̀識看過án靚ke花。」舅姆兩隻手巴掌伸出來承桐花,緊講:「還好哪!仰會逐蕊就án萋喏?」kì捧等花拿到鼻公頭鼻香,斡頭lâu ngà姆講:「有略略仔香香呢,你兩儕鼻看哪!」看著舅姆ke鼻公黏等當多花粉,ngà姆lâu ngài笑到哈哈滾,連樹頂ke鳥仔、脣項ke揚蝶仔、天頂ke雲me笑到捩捩轉,ngà姆拿出衛生紙定定仔lâu舅姆捽鼻公ke花粉,舅姆逐朝晨䟘(hong)床鼻公就會過敏,這下花粉黏著鼻公,連連哈啾噴天,lâu承著ke桐花嚇走淨淨。

  Ngài-teû行到公園ke崩崗前,這位看得著遠遠ke山,層層疊疊峰峰相連,深深淺淺ke青色當好看,像月曆頂ke一幅圖樣仔,風景當靚,舅姆看著遠遠該位yû一棟屋仔,就問講:「該山頂仰會起一間博物館呢?」ngài lâu阿姆看來看去就mò看著博物館,就問舅姆:「你算來講ke博物館在哪位?」舅姆手伸長長比幾下重山後背該棟屋仔,ngài lâu阿姆yu笑到目汁跌下來,ngà姆緊捽目汁緊講:「該he『中台禪寺』,m̀-he麼个博物館啦。」舅姆自家me哈哈大笑。

  車仔行過埔里大路項,舅姆yu問:「唉哦!Liá-teû台中ke禾仔仰會恁大頭?該打ke穀m̀就食一粒米就飽了。」ngài兩子哀me mò管客運巴士頂人án多,實在忍m̀核,笑到m̀會停動,歸車人tu緊看ngài-teû,正經會pûn ngà舅姆打橫,又定定仔同kì解釋,該he筊筍m̀-he禾仔,正講煞kì yu看著奇巧ke東西:「該田肚yû一隻羊仔,還大隻喔!」ngài兩子哀yu笑到鼻流鼻串,mò法度好應舅姆。

  Ngà舅姆自嫁到ngà屋下來,因爭ngà姐公yû講:「轉到屋入ngà門,定著oi講客話。」ngà舅姆實在yû慶,一個外省人在台北出世台北大,食到án大m̀識堵著客人,mò想著會嫁pûn客人,kì就lâu正學講話ke細人仔噥噥噥噥學客話,這一路來埔里,做盡歸路仔講客,故所巴士頂坐車ke人旦旦聽m̀識,話著ngài三儕he神經yû問題me mò定著,頭下舅姆看著該隻大羊仔,he在田坵耕田ke水牛,烏色ke,舅姆單淨識在書項看過羊仔he烏色ke,m̀知kì幾大隻,正會恅差代,fu̍t m̀著哩!

  Ngà姆kha開明,輒輒講:「有閒oi渡細人仔出去遶山花,行行尞尞仔,正m̀會麼个就m̀識,羊角看做蓮花。」這me he yû一擺舅姆lâu ngà姆去台南官田尞,看著歸坵田就he青色ke蓮花葉,緊問ngà姆:「Ngài自從m̀識看過青色ke蓮花,蓮花旦勢he水紅色ke,mò就he白色ke,仰會這位ke蓮花做盡he青色ke喏?」下後,yû人講著「羊角看做蓮花」ngà歸屋家人就會哈哈大笑,這he ngà屋下食飽飯講古ke笑科之一。

  「人不可貌相,海水不可斗量」,ngà舅姆he一個當慶ke婦人家,ngà姐婆ke手路菜,四炆四炒,蒸粄、打菜包,逐項kì就曉得,連拜阿公婆、掛紙ke牲儀,kì me會,下把仔還有後生新入門ke心臼來問kì呢,還慶喔!

  2018.5.1在大墩木棉樹下