《江秀鳳散文專欄》

 | | | 轉寄

讀幼稚園ke ngài (下)

作者 江秀鳳(四縣腔) 2018.07.08

　　Yû一年暑假過，學校轉學來一個外國人同學，頭那毛金黃金黃，面膜仔白淨白淨，目珠仁he藍色ke，當像漫畫(máng-ká)人物ke人公仔，還得人惜哪！逐擺下課ke時節，ngài就會行到kiâ位仔唚kì，一擺、兩擺pûn ngài唚著，ngài試著當好搞，下後kì看著ngài行過去，就跋起腳走pûn ngài逐，歸節下課，ngài兩儕就在運動坪走相逐，逐到上課ke時，先生看著ngài兩儕大汗披身，汗水奪(tho̍t)過衫濕透透(theu)，就拿阿姆準備好淨利ke衫pûn ngài換。

　　Ko yû一擺先生喊ngài拿剪刀pûn kì，ngài lâu利利該片拿pûn先生，先生講擎刀仔lâu剪刀pûn人，做m̀得lâu利利該片對等人，oi lâu yû柄該片pûn人，因爭ngài讀幼幼班，ngà姆還m̀肯pûn ngài擎刀、擎剪，故所m̀知，承蒙先生教ngài，一生人就記得了。

　　在台中戴太平該央時，ngài讀台中市ke幼稚園，ngài he頭一個上車，盡尾一個下車，坐「娃娃車」在大街小巷捩來捩去oi坐點零鐘，這隻幼稚園ke先生當好盡惜ngài，逐擺轉屋會lâu ngài換淨俐ke衫褲，長頭那毛lâu ngài拼到靚靚。Yû一年熱天放尞，屋下附近新開一間幼稚園，來ngà屋下招生，ngà姆想ngài逐日oi án早䟘床，坐點過鐘ke車仔去幼稚園忒辛苦，該間he新教育ke「蒙特梭利」教法，就lâu ngài換新學校，去mò幾日，ngài就m̀肯上車，見上車就噭濫濕蕊，ngà姆mò奈何，錢就納忒了，先生日日就lâu ngài強強揇上車，放學轉來頭那毛繷頭絞髺，黏等頸根，盧哥挨塞，pûn畫圖ke色料膏著ke衫褲me mò換mò抵，下後吾姆渡ngài去lâu靚靚ke長頭那毛剪忒，ngài在電毛店抗議到緊奮(pín)，從頭噭到尾，轉到屋幾下日mò oi搭ngà姆，ngà姆仰般拐就mò效，到這下還會怨嘆。該學期ngà該條巷仔ke細人仔，做盡mò去該間新幼稚園讀矣！

　　該學期讀忒，ngà姆好聲好氣lâu ngài參詳，問ngài轉去「瑞光幼稚園」好mò？M̀過又oi當早䟘做得mò？Ngài暢到緊頷頭，倒轉去頭擺ke幼稚園，日日又淨淨俐俐轉屋，先生me盡惜ngài，成半年ngà長那頭毛又做得拼毛辮仔了，m̀使阿姆喊䟘床，自家聽著鬧鐘仔響，就會換衫褲著鞋襪歡歡喜喜去讀書。

　　2018.5.3在台中55號公車頂回程