《江秀鳳散文專欄》

| | | 轉寄

大里老屋場

  好朋友ke一大片老屋拆忒矣,ngài pot-tok-ngok ke企to街角,目汁瀾泔。企to老街對面,該垤用黃索圍起來ke廢地裡肚,比雷公還kha大聲ke引擎吵m̀醒百年老屋,ngài呆呆看等怪手上屋拆瓦下手拆壁,街項食了幾下十年ke老麵店、賣朝食粥店、煎餅店、米糕店,還yû街肚項囥等ke老屋場,連一片壁一垤磚頭就mò留下來,單淨伸遠遠該片街項ke兩間老烏瓦屋,舊舊漏漏孤孤栖栖企to該位,就像一ke光頂ke老人家,單淨伸著兩支門牙共樣,笑起來ko kha漏肖,高天天ke老玉蘭樹,忠心對天迎風企在在mò停動,堅耐勇敢守等老祖宗ke一片疆土。

  面對這垤片瓦不留ke空地跡,頭擺ke風華盛景像電影樣仔捩捩轉ke畫面,林先生汗流脈落改泥鏟地蒔花種草,迎接春酒聚眾ke客潮,好朋友打扮時行ke妝點,正sie̍t-tó過ke頭那毛跈風吹來陣陣芳香,文人雅士擁入大里後花園食春酒、賞花吟詩ke圖畫,一幅一幅印to頭腦肚項,江素、佳蓉古箏鏗鏘作響ke曲調還在耳公頭、花園肚盤旋,詩人畫友ke笑聲就在眼前,素貞ke身影在花園肚行上行下mò閒濟杈,咖啡香、果子甜,花園肚ke爆竹紅、萬壽菊、西洋蘭五花十色波嫲濟杈(pho-mà-chi-chia),歸路仔緊行兼來ke人客來來去去mò停砣,門前市街紙爆聲響to轟天,還鬧熱哪!好朋友像楊蝶仔樣歸園飛上飛下,招待to十分親切大方,kì朗斗ke笑聲還留to這垤土地項。

  該間祖上老屋,玉階前ke合影,佳麗共樣燒暖迷人,如今,單淨ngài孤栖一儕人企to街角憑弔這份過往雲煙。

  Ngài將liá情景寫成文章,lâu老屋ke後代好朋友分享,kì大笑講:「拆的是我家又不是妳家,妳有什麼好傷心的?」唉,ngài對liá片輒輒入來坐聊ke土地就he感情極深啊!

                            2012/9/5在大里

Ps:好朋友的一大片老屋拆了,我發楞地站在街角,淚濕衣襟,上課前在極短的時間下匆促成章,上課畢與同學分享,好朋友大笑:「拆的是我家又不是妳家,妳有什麼好傷心的?」回之「我對這片土地感情極深啊!」