《江秀鳳散文專欄》

| | | 轉寄

去姑婆屋下尞

  姑婆歇到苗栗公館,還細時節阿爸阿姆輒輒渡ngài歸屋下人去姑婆屋下尞,頭擺姐婆還在ke時節,ngà爸定著會渡kì去尞,姑婆屋下在田中央,單家園屋,m̀過該條田脣細路,he逐個駛車人,oi考執照ke所在,該he一條單行道,兩片析做盡he水溝,當多人ke轎車mò堵好會一隻輪仔漯落去,歸莊仔ke人都看慣吔,m̀管yû熟事ya mò熟事,都會湊人來then手。Ngài盡好拈揚尾打草蜢,逐擺ngà爸ngà姆lâu姑婆、丈公、阿舅、舅姆打嘴鼓ke時節,ngài就會行該條田脣路,行往入犖犖(lo)仔正yû一間屋,逐間屋都yû當大ke天墀坪,姑婆屋下me he,路脣做盡he種禾仔ke田坵,輒常看著青油油ke一大片田地,青青ke天,白雪雪ke雲,雲在田肚遊遊野野,搞到m̀記得食晝。

  Yû一擺,ngài-teû去ke時節堵著歸田坵ke油菜花,靚到奈m̀得,ngài遽遽走轉去喊阿姆、阿姊,過拜託阿舅lâu ngài-teû翕相,到今看著相片就會想著姑婆lâu丈公一屋下人。姑婆屋後背yû一垤菜園,現摘現煮ke菜yu嫩yu多水份,自家種ke mò洩農藥,好食yu安心,逐擺oi轉ke時節,姑婆會喊舅姆摘兜青菜,拿兜自家滷ke覆菜、蘿蔔乾,冬下頭還會有大芥菜同現挷ke大蘿蔔仔,裝到一車仔淰淰。

  Ngà姐婆歇台北,身體mò好,下後就戴養老院,故所ngài mò轉姐婆屋下ke印象,yû一擺,ngà姆在作文班出一隻題目「轉姐婆屋下尞」,等到寫一半,正看著ngài兩姊妹寫m̀出來,吾姆正想著自家mò妹家好轉,妹仔me mò姐婆屋下好去,心肝盡艱苦,就臨時喊ngài兩儕寫「去姑婆屋下尞」,想著姑婆án親切又án會相惜,正經當像ngà姐婆。

  M̀過,該暗晡ngà姆下課轉to屋下,全mò講半句話,怕he心情當m̀好。

  該禮拜尞日,ngà姆自家一儕人坐國光號巴士上台北去看ngà姐婆,暗晡頭轉來ke時節,看著ngà姆目珠紅紅,m̀知噭忒幾多目汁正得。該段跈姐婆去姑婆屋下尞ke記憶,sa變做ngài識牽姐婆ke手,盡尾一擺ke印象了。



  2018.6.27在55路公車頂