《客家消息》

| | | 轉寄

轉載:「八音國寶」鍾彩祥告別式 范佐銘頒發客委會褒揚狀

  「八音國寶」美濃客家八音團團長鍾彩祥先生ti今年(2022年)一月七號過身,一月十六號ti高雄舉辦告別式,客家委員會范佐銘副主任委員代表楊長鎮主委出席向家屬致意,頒發客委會褒揚狀,感念kì一生對客家八音藝術文化傳承ke貢獻。文化部李永得部長也出席告別式向家屬致意。高雄市政府me由楊瑞霞主委頒發褒揚狀。

  鍾彩祥先生,民國二十七年出世,he國家級ke客家八音傳承藝師,十七歲開始做場演奏,在美濃,mò論敬神拜祖,ya-he婚宴嫁娶tu yû kì ke身影。鍾先生演奏八音oi 七十年le,民國九十五年組成「美濃客家八音團」,擔任團長,繼續vi客家人ke生命禮俗做場演出,ya開始ti福安國小教八音,lâu八音文化傳承pûn下一代。

  鍾先生致力美濃客家八音ke推廣lâu人才培育,ti 民國104年得著「客家貢獻獎」。民國105年,「美濃客家八音團」由文化部登錄為國家級重要傳統表演藝術音樂類,he堂堂正正ke「八音國寶」。鍾先生ya當多擺帶團參加藝術季、文藝季演出,還遠赴法國、瑞士lia-teû國家表演,pûn客家文化登上國際舞台。Kì一生致力客家八音藝術文化傳承,vi客家音樂技藝在臺灣歷史ke發展留下盡好ke紀錄。