《李喬小說─寒夜》

 | | | 轉寄

出草，著天釣(1)

作者 李喬 漢羅翻寫：Suingi 2009.07.12

農曆十二月廿四日，立春。朝晨開始，森森冷氣，逼人寒到緊chûn。M̀過，日頭一出來，腳指手尖就mò ko麻痺m̀聽使喚了。

來到蕃仔林，今晡日he滿一隻月。Khâi來ke幾擔蕃薯。堵好食忒；liá-he傍等野生ke「山紅菜」共下食，正維持恁久。

正經再回石圍牆，向善慶伯討？當然m̀會án-ngiòng做。M̀過，mò要緊，歸家人食蕃薯半年ke錢銀，早就準備好勢。

Ti蕃仔林ke六戶人家。除忒新來ke彭家外。其他五家都有足夠ke蕃薯維生。Ke he kì-teû ke唯一主食。

早餐過後，阿強伯lâu人秀兩人。挾等擔竿麻袋，上一段崎到許石輝家買蕃薯。

人傑夫婦到屋背新墾地「燒焿」。就會降子ke芹妹lâu阿媽掌屋看顧德新、德福兩個孫子;其他Ke人，全到屋右正開闢ke「生田」種蕃薯。

許石輝he本地ke「蕃薯大王」；奈家糧食短缺，都做得向他買，或者借用。他he本地擁有耕地盡多ke人，因為他ke人力最充足：兩個哺娘。九個賴仔，四個心舅，三個màng出嫁ke妹仔；除忒大哺娘跛了右腳，lâu一ke心舅坐月做m̀得上山以外，大大細細包括六七歲ke孫仔，總計有二十儕做得勞動做工ke人手。當然，六十開外ke他本人，還he一隻大赤牛，tui早到晚做得不停工作。

記得lâu許石輝見面ke時節，liá儕老赤牛就問：

「你兜人丁旺嗎？都做得khâi鋤頭吧？」

「大細十二口。除肚屎底背ke，還ti地泥項爬ke以外，十儕人，都做得！」阿強伯講。他試著liá個粗豪漢很合自家脾性。

「Ke好！Ti蕃仔林，就oi人人做得做事；家口越多越好。」

「He啊，mò辦法做事，就mò好食。」

「Ngài許石輝討兩房哺娘，有人笑ngài痴哥。哼！懂mak-ke？Ngài he耍多養幾個賴仔，án-ngiòng ngài勞力正夠——ngài tui十七八歲就想自家闖闖啦！Ngài本旦也he長工……」

阿強伯決定學許石輝。Mak-ke搶價錢ke作物kha慢正種；開墾幾多田地，都全種上蕃薯。解決了食ke問題再談別ke。