《李喬小說─荒村》

 | | | 轉寄

四、長空黯淡(3)

作者 李喬 漢羅翻寫：劉敏貞 2010.12.12

老鬼，影仔般飄過來，眠在她身旁。她萬分厭惡想lâu身仔挪開，m̀-ku挪m̀動。她就án-ngiòng 睜大目珠，僵直ke眠到天光。她驚老鬼在耳公sùn念m̀停，sa又有teû期待做得聽幾句寬懷ke話。老鬼sa mak-ke都無講。

無關ke竹窗外，一片朦朧光lè,老鬼已經hong床。平常都係她先hong床。她勉強再眠一陣，sa已按奈不住，還係匆匆行入灶下底背。譴人ke係：明鼎lâu老鬼，在弄食ke nò.

她乾脆拿一張竹凳仔，在禾埕中央坐下來，看山色。

台灣ke秋天，只有深山ke早暗最做得感覺出來。「鳥石壁」上ke楓樹，團團錦黃，「門板岩」頂高ke灌木林sa係片片殘葉，滿眼枯枝。日頭還màng上升，tui溪口湧上ke晨風，冷凉逼人。她有teû抵擋m̀住，鼻公癢癢，好像 oi打噴嚏lè;她還m̀願加衣，也m̀入去底背。 「明鼎就oi遠行他鄉lè……」腦海一向縈廻liá句話。

Chhin累。真實chhin累。五十二歲。近年ke身體m̀會差，自覺無一sit老態，m̀-ku chhin累啊。Kín tui骨髓心坎悠悠流瀉而出ke疲勞感緊緊糾纏tén她。或者講，她陷入極端想oi放掉自家ke奇異心緒中。

係ke, 就係想oi放掉自家。Tui自家liá-ke苦惱ke圓身逃開；m̀ oi圓身lè,她只渴望自由自在無牽無掛，無愛也無恨，mak-ke都無。 「啊……」liá瞬間ke感覺將她ke心震撼一下。

她向來係一個堅強ke人。生活ke辛酸，sṳt使她畏怯過，人生ke苦難，sṳt使她憂愁過，m̀-ku,她從來無產生逃走、「撤退」，完全oi放掉自家ke念頭。

無定著做m̀得講係放掉自家，係一種悲哀中，渴求依附ke心緒吧。人，太孤單lè, 人，太有限lè. 在層層苦網中，必須oi有一股人以外ke力量支撐chang能脫困；無定著做m̀得奢望脫困，只做得引來「壯膽」吧。嗯，孤獨無助ke生命，太需要人以外ke力量來「壯膽」。

她想起何玉；ke位最最冤屈無告ke女人。

何玉出現本庄係十年前。十一年前，台南噍吧哖庄發生抗日事件，何玉係僥倖ke漏網者，m̀過肚屎底背多一塊日本巡查留下來ke孽種。何玉在兩年前帶lai仔，何阿土到汶水山上「法雲寺」出家。他teû母子離開本庄前，細阿土就跈阿梅哥讀sit-pá「漢書」，liá-pái轉庄來，十歲ke阿土，大a粗壯精悍，聽講老和尚又教他m̀少書籍。

Liá-ke「日本種」ke台灣人，生活在liá-ke窮困又不平ke細山村底背，將來性格為人án-ngiòng ?做得像可憐ke阿姆何玉心境像水ke拜佛誦經nò ?Liá-teû都係謎，只有佛祖知吧？

Liá係以後ke事。兩年m̀見ke何玉，確實係變m̀少；神情容態大大不同於前lè,看來係更安詳更疏朗，好像變成另外一ke人。何玉到法雲寺禮佛，還係阿梅哥慫恿ke. 他講八九年ke時光都化解m̀了何玉內心ke仇結，只有求助佛祖lè.

「Ke我葉燈妹nò ?」她想。

她做m̀得，也m̀會放掉 liá-ke家lâu子女去出家。M̀過想想，她做得在家食齋；至少做得「食早齋」，早暗念經拜佛。她決定下晝就去lâu 何玉講講。何玉liá-pái轉庄，講係oi在上蕃仔林結庵修行ke ;她立刻就答應，並要求庄民khiung-ha搭一間茅草佛庵。無定著茅庵做得多搭一間，自家無事時就去住，聽teû道理。

「阿姆：Án早，露水還重，轉房好嗎？」明鼎在她失神冥想間，m̀知樣仔蹲在面前來。

「M̀……」她定定神，端詳眼前ke 細人仔。

「阿姆：M̀ 好亂想，好嗎？」

「我nai有亂想！」她ke嗓音陡地高拔起來。

「我係講，我無mak-ke啦，一有閒，定著會轉來看阿姆……」

「真實嗎？」她想自家係笑lè,m̀-ku定著笑a chhin淒涼。

「當然真ke,樣仔會騙阿姆！」

她凝然盯住明鼎。歐，細人仔；你大lè, 腳筋韌了，會走會跳lè,所以你就lâu阿姆拋在一旁。你真實係愛阿姆，心底背有個苦命阿姆，ke你就不該問世事，就該留在蕃仔林早暗多陪阿姆，直到討pû娘……m̀，m̀！留m̀住ke, 細人仔有細人仔 ke前程，更何況，像老鬼講ke ;你做m̀得不准阿鼎下山，做m̀得不准狗腿仔來抓人嗎？係ke, 係ke……

她千萬m̀願意，sa又自然在心底背再一pái體認明鼎ke處境。隨tén liá-ke再體認，心，扭曲起來。

絞痛起來；再扭緊ke絞結處，鮮血一滴一滴濺落下來。心，收縮tén,收縮tén. 最尾，她感覺歸ke圓身都扭曲起來，壓擠，好像oi pûn mak-ke無形ke烏洞吸引吞無消失……

「啊……」

「阿姆：你哭，你又哭！」明鼎將雙手放在她ke膝頭hong, ke晶晶ke目珠強力ke投過來。M̀-ku, 眼眸ke亮光chhin遽就消隱，而且湧上朦朦雲翳，然後，明鼎lâu頭面貼在她雙膝hong.

「……」她輕輕撫摸明鼎滑嫩又帶有鬍渣仔ke面頰，用手疏理他ke頭。她輕輕撫摸，還專心去感受；眼前liá-ke愛子真真實實ke存在。

「阿姆：你m̀ 好 liá樣，好嗎？」

「M̀……」

「阿姆：我會保重，定著，定著，真ke, 定著，定著ke……」

「阿鼎……」歐歐，千言萬語，萬語千言，其實，其實都講chhin lè.

「阿姆：定著oi放心，oi寬心。有一日，有一日ên-teû真正……」 －－「好啦！好啦！行吧！日頭爬上山頂囉！」老鬼在講話。

她清楚感到明鼎全身一震。她輕輕一推明鼎蹲伏ke身仔；明鼎自家sa也在同一瞬間遽遽企起來。明鼎移動a chhin 遽，使她悵惘；明鼎做mak-ke m̀肯多貼伏在自家膝頭sùn久一sit, 到完全pûn她來催促然後依依不捨ke離開nò? 哼哼！就係老鬼ke翻版哪！

「Ke, 阿姆：我行lè.」明鼎提起一ke m̀大m̀細ke包袱。

「M̀……有mak-ke, 記m̀得帶ke ?」

「無lè. 阿姆。」

明鼎又突然kín痴痴ke盯tén她。M̀,係用力在她面上搜索mak-ke, 尋求mak-ke. Ke目珠m̀係停頓ke, 係不斷顫抖不斷吸收。他oi將阿姆ke容貌神態最確切，最明晰ke刻印在腦海吧。

一種震動，一股熱流，一道悚慄，忽然撲向她，迅速進入骨竅心脾；她，全身化成洋洋暖暖，酸酸澀澀，敏銳無比ke感覺，以身心ke全部去感覺，去接納眼前liá-ke就將離去ke lai仔輻射過來ke ;她m̀使chang賦pûn他它mak-ke意義，她只oi密切精密ke感受就夠lè.

「阿姆：我行lè.」明鼎推開籬笆門後，轉身企 tén m̀動。

「好，好，你，去吧。」她chhin m̀容易講出一句話。

「Ke, 阿姆：你轉去底背。」明鼎轉身下斜坡。

「等一下！」

「阿姆：樣仔？」明鼎遽遽折轉來。

她一愣。她搖搖頭，緊緊ya̍k手示意。明鼎衝她淺淺一笑，然後chhin 遽就下kia去lè.

「我oi上街，順便送阿鼎一程。」老鬼在身旁悄聲講。

「M̀ oi！」她ke嗓門失去控制。

「我……」

「好吧！」心中強字鼓起ke氣還係迅速洩失：「你就去……」

係嘛。去去去！都走，離開，永遠m̀好轉蕃仔林來！去造反，去流血，去天翻地覆，去死絕絕！

啊，明鼎行過麻竹橋，上斜坡，又冒出來啦。明鼎企在「烏石壁」巨岩下正向她ya̍k手lè.

「去吧，阿鼎！」她想講teû mak-ke :早暗多著teû衫褲啊，南部天時比較……又無人照顧……。

明鼎ke影仔模糊m̀清。明鼎下斜坡行lè. 她又坐下來。