《江嵐客家文學專欄》

| | | 轉寄

窗前ke白頭翁

  打早,有一隻鳥仔,停在吾ke窗台,一路里來看著ke鳥仔就翼胛順順靚靚,這隻鳥仔毛茸茸,看m̀出佢ke年齡,m̀過,看起來盡mò精神,打側打側ke身體,腳tiu-tiu支仔,mò該捽來火án大支,佢me m̀驚人,細細粒闍(tu)烏ke目珠緊看ngài,ngài顛倒pûn佢看到會敗勢,奇怪ke he,厥背囊lâu肚笥ke毛做盡茸茸茸,親像正同人相打過樣仔,背囊項兩隻翼胛收起來,me還遮m̀著該燦起來像娘花樣仔ke毛,ngài再注意lâu佢看,細細ke圓身又mò奈位著傷,真經愐m̀解佢仰會án狼狽,就算正睡醒吂梳頭那毛me m̀ he án樣,頭那頂有一搭白白ke記號,確定佢he白頭翁,佢側側ke身體弄啊弄仔,行路小可孔孔竅竅,腳跛跛仔,ngài揣(thon)佢怕有兜仔年紀咧!Ngài mò了解鳥仔ke家族lâu習性,m̀過,逐擺看著飛到吾窗前ke鳥é通常就he一隻、兩隻,還m̀識有歸群仔飛來這歇睏過。逐日朝晨就會有兩隻鳥仔來吾窗前叩門,不管平時仰he禮拜,佢兩儕就當煞猛,m̀輸he ngài請來ke鬧鐘,用佢尖尖ke喙煞猛啄窗仔門,盡懷疑厥喙敢m̀會痛?

  翻過頭來看這隻跛腳ke白頭翁,仰般會毛茸茸又mò伴mò陣,佢算來邸奈位?敢有屋家人?在人生路項堵著風浪,敢mò半儕人好相惜?受到驚險敢mò人好投靠?這ke情形,就像he街路項ke流浪人,有兜he有屋m̀轉去,有兜he mò屋好轉,奇怪ke he,台灣án有錢,流浪ke大部分he男仔人,照常m̀會尋m̀著事做正著,仰會越來越多人甘願出來流浪呢?日時頭mò奈好食,暗晡頭mò奈好睡,拈人食賸ke,睡公園、地下道,該án仰佢出世ke延伸家庭又算麼該呢?頭擺打拼過ke oi仰般看待呢?一生人oi過ke人,又oi仰般交待?就算佢自家願意孤恓,敢就m̀驚屋家人愁?恁仰ke日仔,敢對得起自家識在世間行過?雖然he一儕人食飽歸家人飽,me還oi為著自家ke三餐負責。流浪人me有盡多mò奈何、不得已ke苦衷,總講單淨佢自家知得自家ke處境,自家ke生活方式。

  看著這隻mò人承受ke白頭翁,就pûn ngài想到街路項盡多ke流浪人,受飢受凍受孤恓ke辛苦人生,ngài決定今晡朝晨mò oi食朝,為錢蔭腳目珠ke台灣貧富差距抗議。


                 2007/7/21在西拉雅柚仔樹下