《戀戀台灣客家文學》

 | | | 轉寄

短劇：得人驚ke情人節(中)

作者 Suingi,Piiùng 2026.07.05

(阿蓉lâu阿琳Tui另外一片上臺)
阿琳：阿蓉，上擺先生教ke「打四仔」，ngài轉去練咧異久，共樣mò麼會打，你做得教ngài mò？（手拿六ke沙包，其中三ke pûn阿蓉）
阿蓉：（笑）做得啊～mò問題。你先做一擺ngài看一下，看he哪yû所爭。
（阿琳擲沙包，但he節奏亂掉，沙包跌to地泥項）
阿琳：啊……yu he án nè，ngài逐擺手腳tu忒慢……。（yû點懊惱）
阿蓉：其實你做ke mò m̀著，m̀過mò跈著節奏。你試看啊同沙包擲kha高兜仔，án ngiòng沙包ti空中ke時間kha長，手腳就m̀ sṳ́ án緊。
阿琳：yû影mò？M̀過，ngài驚怕擲忒高voi接m̀著。
阿蓉：你看喔，擲kha高兜仔mò相干，盡重要k ehe目珠oi緊看等沙包，手oi跈得著節奏。（示範）
阿琳：（頷頭）好，該ngài過試看啊。（擲沙包，liá擺表現kha好）
阿琳：（驚喜）欸！正經yû較順耶！
阿蓉：著吼～其實你就he kha mò自信。慢慢仔來，m̀ sṳ́緊張。
阿琳：（笑）好得yû你，mò，ngài就想放忒咧。
阿蓉：mò麼个啦！ên共下練，慢慢仔就voi進步。
（兩人繼續練習，沙包ti空中來回）
阿琳：哇~緊來緊順咧！（一個沙包飛忒遠，滾出去）
阿琳：呃……佢洩走咧……
阿蓉：佢怕想oi歇睏一下。（笑）
（阿蓉lâu阿琳認真尋「洩走」ke沙包）
阿琳：yû看著mò？
阿蓉：mò呢……m̀知走去哪。
阿琳：án會走！(笑)
阿蓉：尋著咧！Án ngiòng看起來，正經oi定定仔kha贏，一下忒遽，顛倒會亂忒。
阿琳：（歹勢）ngài一順就想oi kha遽兜仔，結果就亂忒咧。
阿蓉：其實「打四仔」盡重要ke m̀ he「遽」，he「穩」。穩定下來，手腳跈得著節奏，自然做得緊打緊遽。
阿琳：（頷頭）先生異像me án ngiòng講，m̀過ngài該央時還聽mò。
(音效：尖叫聲)
(阿冠走上臺)
阿琳：先生oi來咧！(收好沙包)
阿蓉：ên遽遽坐好。(兩人坐好，拿等課本)
(阿冠一偎兼阿琳、阿蓉，阿琳、阿蓉黏時面壢青，差一滴仔尖叫出來，對看一眼)
阿琳、阿蓉：先生好！
阿冠：嗯。
阿冠：(轉向觀眾)唉哉！今晡日連吾客語課學生仔me怪怪仔。實在啊~ngài ngióng án受歡迎呢！(yu得意yu苦惱)
(阿冠講話ke時節，後背ke阿琳、阿蓉手探了過來，像想tui阿冠做麼个。阿冠一斡頭，阿琳、阿蓉yu馬上作轉去，詐做當乖巧認真看書)
(阿冠轉向觀眾，當疑狐，試著奇怪，後背阿琳、阿蓉手yu再ko探了過來。阿冠一斡頭，阿琳、阿蓉yu馬上作轉去，詐做當乖巧認真看書)