《戀戀台灣客家文學》

 | | | 轉寄

52赫茲ke海鰍

作者 2025.01.26

　　「阿婆，ngài聽m̀識。」逐擺阿婆同ngài講客，ngài盡會應ke客話就he liá句。佢he一尾52赫茲ke海鰍，跈等阿爸tui大湖泅出to ho ló庄竹南歇，鄰舍講ho ló話，細人講華語，mò論屋肚屋外，佢he一尾52赫茲ke海鰍。

　　孫女大咧，佢身體殗弱下去，泅入院項。Mò法度轉屋ke佢，teu等管仔，單淨屋家人來，罕得勉強講出聲，sa還啊困難咧。孫女想同阿婆加講幾句話，大學選系選組，選了臺灣語文學系客語組，mò想著正經考著。孫女離開苗栗，to臺中讀書，正深深感受著原來自家me he一尾52赫茲ke海鰍，就算共樣講華語，me聽m̀識人家講ke意思，人家me聽m̀識佢講麼ke。後來正知，liá安到「文化衝擊」。該阿婆nò？佢恁多年來孤恓面對一陣yu一陣ke生份聲浪，pha比癲狗浪還啊大、還啊得人驚！52赫茲ke海鰍當孤恓，佢緊唱緊唱，sa mò人聽m̀識。

　　當mò簡單，因為大家ke煞猛努力、時代ke改變，52赫茲ke海鰍pûn人發現咧，定定仔ín來ín多人注意著佢，聽講還有人發現52赫茲ke海鰍m̀ he一尾定定，佢兜泅入大家心肝肚煞猛唱歌，打開大家ke想像，開始各種創作，用52赫茲ke海鰍，講自家ke故事。

　　Ngài he一尾52赫茲ke海鰍，m̀記得ngióng pân唱自家ke歌。好得liá ha資源當多，共樣52赫茲ke海鰍教ngài唱，pûn ngài拈轉自家ke聲，唱pûn天頂阿婆聽。Ngài me教學生仔唱，mò論佢he海鰍mò，pûn liá歌聲傳揚下去，ti liá海洋、liá世界，學ngióng pân互相尊重、欣賞，共下快樂生活。