《戀戀台灣客家文學》

 | | | 轉寄

《八尺門ke辯護人》lâu〈中元ke構圖〉肚ke七月半

作者 Suingi 2023.10.08

　　七月，he慈悲ke月，pûn陰間鬼做得轉來陽間，陰陽兩界難得做得相見。M̀ ko有兜鬼就算轉來陽間，me mò nái好去，mò屋好轉，m̀知oi尋麼人，該就he孤魂野鬼。

　　鍾肇政小說〈中元ke構圖〉ke阿木，雖然成功tui像地獄ke南洋戰爭轉來，餔娘sa同契哥，還降咧細人仔，包尾lâu契哥離開，就恁呢，阿木癲忒le，變成孤魂野鬼，雖然身在陽間，心早死忒。唐福睿小說《八尺門ke辯護人》，印尼移工Abdul-Adl me he陽間ke孤魂野鬼，來到臺灣做事，ti船項pûn人苦毒，輒常頭那pûn人浸著水肚兩分鐘，故所恅著恁呢he oi人恬恬ke方法，m̀會死，正會浸死船長ke妹仔，連等發生㓾死船長兩公婆ke悲劇，其實佢本旦來船長屋家，單純想拿轉護照轉去印尼定定。Abdul-Adl ti印尼通譯Leena出現以前，mò人願意為佢講話、then sú佢翻譯，就算Leena出現，佟寶駒、連晉平想then sú，yû還啊多人為著各種理由想oi佢死，變成正經ke鬼。

　　對孤魂野鬼來講，七月半he當特別ke日仔。Ti這日，陽間ke人會準備到當phòng phai來普渡四方野鬼，祈求神明饒赦罪孽，pûn孤魂野鬼得著解脫。Ti鍾肇政小說〈中元ke構圖〉lâu唐福睿小說《八尺門ke辯護人》tu出現七月半(中元節)。阿木在鬧熱ke中元祭，癲癲狂狂向大士爺討審判，對大士爺頭那頂ke觀世音菩薩講話mò規mò矩，呈現時代ke悲劇，也pûn人思考生命ke意義。假使煞猛打拼一生人，為著心愛ke人，仰仔tu oi留等一條命轉去，結果心愛ke人同人走咧，自家到底he為著麼个變成陽間ke鬼？《八尺門ke辯護人》肚，印尼移工Abdul-Adl ke死，獻祭，包尾成為基隆中元祭鬧熱祭典普渡ke對象——異國ke孤魂野鬼。死刑存廢ke公投，看起來像中元普渡ke慈悲，其實單淨he一場鬧熱ke政治祭典，成全陽間ke人為自家ke良心感著滿意。

　　故所，麼个he慈悲？He生，ya he死？

　　對阿木來講，留等一條老命，he慈悲？Vi著推動廢除死刑，thiàu thiàu害Abdul-Adl死ke法務部長陳青雪就he慈悲？七月半本旦he慈悲ke一日，陽間ke人誠心普渡，pûn孤魂野鬼me做得食飽，有機會得著解脫。在生lâu死之間，陽間lâu陰間之間，七月半he鍾肇政小說〈中元ke構圖〉lâu唐福睿小說《八尺門ke辯護人》ke橋仔，pûn人認真思量小說反映ke現實。