《客語白話字聖經試讀版》

 | | | 轉寄

Má-thai Fuk-yîm thi 25 chông_03 Chui-heu ke Sṳ́m-phan

作者 Hak-ngî Sṳn-kîn 2013.02.03

25:31 “Tong Ngìn-chṳ́ chhai Kì-ke yùng-kông lâu chung-sṳ́-chá thùng Kì khiung-ha ke sṳ̀-heu, Kì oi chhô chhai yùng-kông ke pó-chho-táng.
25:32 Van-mìn chhiòn-phu oi chhi-si̍p chhai Kì mien- chhièn, Kì chhiu chiông kì-teû pûn-cho lióng-khiùn, chhiong chóng-yòng ke ngìn chiông mièn-yòng tui sân-yòng-chûng pûn-khôi-lòi án-ngiòng.
25:33 Kì oi chiông mièn-yòng piong chhai yu-phién, sân-yòng chhiu piong chhai chó-phién.
25:34 Vòng chhiu-oi tui chhai Kì yu-phién ke ngìn kóng : ‘Ngì-teû tet-tó Ngâ Pâ su-fuk ke ngìn, hó hàng- chhièn-lòi sṳ̀n-su tui chhóng-chho sṳ-kie yî-lòi chhiu vi-chho̍k ngì-teû só chún-phi ke koet.
25:35 Yîn-vi Ngài tú-kî, ngì-teû pûn Ngài sṳ̍t; Ngài choi-châu, ngì-teû pûn Ngài lîm; Ngài chhut-ngoi liù-long, ngì-teû chhiu chiap-na̍p Ngài;
25:36 Ngài tá-chhak-pok, ngì-teû chhiu pûn Ngài chok; Ngài pot-phiang, ngì-teû cheu-ku Ngài; Ngài chhai chhô-kón-è, ngì-teû lòi khon Ngài.’
25:37 “Ke-teû ngi-ngìn chhiu en Kì kóng : ‘Chú â ! Ngài-teû chhai kí-sṳ̀ khon-tó Ngì tú-kî, chhiu pûn Ngì sṳ̍t; Ngì choi-châu, chhiu pûn Ngì lîm?’
25:38 Yu chhai kí-sṳ̀ khon-tó Ngì chhut-ngoi liù-long, chhiu chiap-na̍p Ngì; Ngì tá-chhak-pok, chhiu pûn Ngì chok?
25:39 Yu chhai kí-sṳ̀ khon-tó Ngì pot-phiang, fe̍t-chá chhai chhô-kón-è, chhiu lòi cheu-ku Ngì nò?’
25:40 Vòng yit-thin oi tui kì-teû kóng : ‘Ngài sṳ̍t-chhai lâu ngì-teû kóng, ngì-teû yí-kîn yû hàng liá-teû sṳ chhai Ngài-ke-teû hiûng-thi sṳ̂n-song, chhiu-he hàng liá-teû sṳ chhai Ngài sṳ̂n-song!’
25:41 “Yèn-heu,vòng yu oi tui Kì chó-phién ke ngìn kóng: ‘Ngì-teû su chu-chú ke-ngìn, hó lì-khôi Ngài, ngi̍p-hi ke vi-chho̍k Mô-kúi lâu kì-ke cháu-ngà só chún-phi yún-yén put-me̍t ke fó tî-poi !
25:42 Yîn-vi Ngài tú-kî, ngì-teû mò pûn Ngài sṳ̍t; Ngài choi-châu, ngì-teû mò pûn Ngài lîm;
25:43 Ngài chhut-ngoi liù-long, ngì-teû mò chiap-na̍p Ngài; Ngài tá-chhak-pok, ngì-teû mò pûn Ngài chok; Ngài pot-phiang,ya-he chhô-kón-è, ngì-teû ya mò cheu-ku Ngài.’
25:44 “Ke-sṳ̀, kì-teû chhiu en Kì kóng : ‘Chú â ! Ngài-teû chhai kí-sṳ̀ khon-tó Ngì tú-kî,ya-he choi-châu, ya-he chhut-ngoi liù-long,ya-he tá-chhak-pok, ya-he pot-phiang,ya-he chhô-kón-è, mò fu̍k-sṳ Ngì nò?’
25:45 Kì chhiu en kì-teû kóng : ‘Ngài sṳ̍t-chhai lâu ngì-teû kóng ,ngì-teû tông-chûng mò hàng liá-teû sṳ, m̀-hén pông-chhu ngìn, chhiu-he mò hàng liá-teû sṳ lòi pông-chhu Ngài.’
25:46 Liá-teû ngìn oi su yún-yén ke hìn-fa̍t; chúng-he ke-teû ngi-ngìn chhiu-oi tet yún-sên.