《客語白話字聖經試讀版》

 | | | 轉寄

Má-thai Fuk-yîm thi 25 chông_02 Sâm-ke Phu̍k-ngìn ke Pí-yi

作者 Hak-ngî Sṳn-kîn 2013.01.27

25:14 “Yîn-vi Thiên-koet yu khó-pí liá-ke ku-sṳ: Yû yit-ke ngìn oi chhut-hi lî-hàng, hêm kì chhṳ-kâ ke phu̍k-ngìn lòi, chiông kì só-yû ke sán-ngia̍p kâu pûn kì-teû.
25:15 Kì cheu kì-teû tak-sà ke chhòi-thiau, yit-ke pûn ńg-chhiên ke ngiùn, yit-ke pûn lióng-chhiên, yit-ke pûn yit-chhiên; yèn-heu kì chhiu chhut-fat hi ngoi-thi.
25:16 Ke liâng ńg-chhiên ke ngìn, chit-sṳ̀ chiông liá-teû chhièn hi cho sên-lî, chhon-tó ńg-chhiên ke ngiùn.
25:17 Ke liâng lióng-chhiên ke ngìn, ya-he án-ngiòng cho, nang-ngoi chhon-tó lióng-chhiên ke ngiùn.
25:18 Chúng-he ke liâng yit-chhiên ke ngìn chhiu chhut-hi, chhai thi-nài-hâ lòi yet yit-ke khûng-é, chiông kì-ke chú-ngìn ke chhièn mài-hí-lòi.
25:19 “Ko-heu, ke-teû phu̍k-ngìn ke chú-ngìn chón lòi, lâu kì-teû son-sṳ.
25:20 Ke liâng ńg-chhiên ke ngìn chhiu ngi̍p lòi, tai-tén nang-ngoi ke ńg-chhiên, kóng: ‘Theù-kâ â, ngì pûn ngài-ke ńg-chhiên ke ngiùn, ngài yu kâ chhon ńg-chhiên.
25:21 Kì-ke chú-ngìn tui kì kóng: ‘Chhin-hó â, liòng-san lâu chûng-sîm ke phu̍k-ngìn â, ngì chhai se-se ke sṳ tông-chûng,ngì yí-kîn yû chûng-sîm, ngài oi vî-thok ngì lòi kîn-yìn thai sṳ. Ngì hó ngi̍p-lòi thùng ngì-ke chú-ngìn khiung-ha hióng-su ke hí-lo̍k pâ.’
25:22 “Ke liâng lióng-chhiên ke ngìn chhiu ngi̍p lòi, tai-tén nang-ngoi ke lióng-chhiên, kóng: ‘Theù-kâ â, ngì pûn ngài-ke lióng-chhiên ke ngiùn,ngài yu kâ chhon lióng-chhiên.’
25:23 Kì-ke chú-ngìn tui kì kóng : ‘Chhin-hó â, liòng-san lâu chûng-sîm ke phu̍k-ngìn â, ngì chhai se-se ke sṳ tông-chûng,ngì yí-kîn yû chûng-sîm, ngài oi vî-thok ngì lòi kîn-yìn thai sṳ. Ngì hó ngi̍p-lòi thùng ngì-ke chú-ngìn khiung-ha hióng-su ke hí-lo̍k pâ.’
25:24“Ke liâng yit-chhiên ke ngìn ya hàng-chhièn-lòi, kóng : ‘ Theù-kâ â, ngài tî ngì he chhin li-hoi ke ngìn, m̀-chhièn ve-chúng ke só-chhai, ya-oi sû-sṳ̀n, m̀- chhièn chung ke só-chhai ya-oi sû-kot.
25:25 Só-yî, ngài chhin kiâng, chhiu chiông ngì-ke chhièn mài chhai thi-nài-hâ; khon-â ! Ngì-ke chhièn vàn ngì.’
25:26 “Chúng-he kì-ke chú-ngìn chhiu en kóng : ‘ Ngì liá fái yu lân-sṳ̂ ke phu̍k-ngìn â, ngì ki-yèn tî ngài m̀-chhièn chung ke só-chhai oi sû-kot,m̀-chhièn ve-chúng ke só-chhai ya-oi sû-sṳ̀n;
25:27 ngì chhiu yin-kôi chiông ngài-ke chhièn chhùn-ngi̍p ngiùn-hòng, tén ngài chón-lòi ke sṳ̀, hó chiông ngài-ke chhièn lièn-pún-tai-li khiung-ha liâng-chón-lòi.
25:28 Ngì-teû chiông kì-ke chhièn nâ pûn ke yû yit-van ngiùn ke.
25:29 Yîn-vi só-yû yí-kîn yû ke ngìn, chhiu-oi pûn kì, sṳ́ kì hàn-yû hó chhûn ;ke mò ke ngìn, lièn kì só-yû ke yit-sit-sit-è ya-oi lâu kì thó-chón-lòi.
25:30 Liá-ke mò yung ke phu̍k-ngìn, ngì-teû chiông kì kiuk-chhut-hi ngoi-poi; pûn kì chhai ke-vi thai-keu,lâu ngâu-ngà chhiet-chhṳ́.