《客語漢羅聖經試讀版》

| | | 轉寄

約翰福音 第九章_2 法利賽人追究瞙目ke事

9:13 眾人就帶ke先下瞙目ke人去見法利賽人。
9:14 耶穌攪泥醫好他目珠,ke日係安息日。
9:15 Ku-só法利賽人也在問他,他係ngióng般看到ke. 他就lâu他teû講:「祂將湳泥膏我ke雙目,我就看得到。」
9:16 有teû法利賽人講:「這個人m̀係從上主該位來ke,因為祂無守安息日ke規定,」m̀-ku有別人講:「罪人ngióng得會行án-ngiòng ke神蹟喏?」 他teû就因為án-ngiòng來紛爭。
9:17 他teû法利賽人又問瞙目ke人講:「祂既然醫好你ke目珠,你講祂係ngióng般 ke人。」 他應講:「祂係一個先知。」
9:18 Ku-só ke-teû猶太人就m̀信他先下係瞙目ke, 這下已經看得到;等到將他ke爺ôi尋來。
9:19 他teû問講:「這個係你teû ke lai-é係無?你teû m̀係講他出世就瞙目嗎?他這下ngióng看得到?」
9:20 他ke爺ôi應講:「他係我teû ke lai-é. 我teû知他出世就瞙目。
9:21 他這下ngióng看得到,我teû就m̀知;係má人醫好他ke目珠, 我teû也m̀知;他已經大lé,你teû問他,他自家會lâu你teû講。」
9:22 他ke爺ôi án-ngiòng講,係因為驚猶太人ke領袖,因為猶太人ke領袖已經講好,假使有人承認耶穌係基督,就oi將他逐出會堂。
9:23 Ku-só他ke爺ôi 正講:「他已經大lé, 你teû去問他。」
9:24 他teû就將先下瞙目ke人喊來,又對他講:「你一定 oi講實話,在上主ke面前;我teû知ke人係罪人。」
9:25 他就應講:「祂係m̀係罪人,我m̀知;我知一件事,就係我先下係瞙目ke,這下看得到。」
9:26 他teû又問他講:「祂lâu你做mak-ke事?Ngióng般醫好你ke目珠?」
9:27 他就應他teû講:「我lâu你teû講過,你teû也無oi聽;做mak-ke 這下就oi聽nè? 敢講你teû也oi做Kiâ門徒嗎?」
9:28 他teû就罵他講:「你係Kiâ門徒;m̀-ku我teû係摩西ke門徒。
9:29 我teû知上主有lâu摩西講過話;m̀-ku ke-chak人我teû m̀知祂從nai位來ke.」
9:30 Ke人就應他teû講:「這就奇怪lé. 祂醫好我ke目珠,總係你teû m̀知祂從nai位來ke.
9:31 我teû知上主m̀聽罪人ke祈求;祂只有聽ke敬拜祂,並實行上主旨意ke人。
9:32 創造世界以來,出世就瞙目ke,màng識聽過有人醫好他ke目珠。
9:33 除非這個人係從上主來ke, 祂mak-ke都無法做。」
9:34 他teû就對他講:「你出世在罪惡中ke東西,ngióng般敢教訓我teû ?」他teû就將他逐出會堂。