《編輯案頭》

 | | | 轉寄

轉載：還ngài阿姆話30週年系列活動：惜！阿姆話Hakfa30紀念特展

作者 2018.12.30

　　1988年12月28號客家前輩lâu各族群為客語發聲，發起了「還ngài阿姆話運動」，為紀念liá án yû意義ke日仔，客家委員會客家文化發展中心特別ti「還ngài阿姆話運動」三十週年，ti 107年12月28號to 108年6月30號，ti臺灣客家文化館舉辦紀念特展。

　　本展主題以「惜，阿姆話！」ke客話做為溝通訊息lâu圖像，pûn人一踏入會場，就做得識著當生趣；入口意象拍照區特別以行動書車，由國父銅像領頭，yû各年齡層閱讀ke客語書籍、兒童繪本，lâu別ke族群ke阿姆話教材，提供親子互動拍照以外，ya想望大家記取前人為爭取族群阿姆話話語權ke初心，以「母語傳承、人人有責」自許，向下紮根帶等子女共下講阿姆話，傳誦mò共樣族群ke聲音以豐富台灣多元文化。主展場以四階段ke復興客語推動歷程，pûn民眾行入liá三十年ke光陰故事，包含先以「噤聲」展現tui日治to解嚴前兩擺ke「國語運動」，造成臺灣各族群阿姆話voi m̀-kien-thet；後以「發聲」蒐集tui地下to合法ke族群電台、臺灣客家公共事務協會，lâu大專院校客家社為主ke還ngài阿姆話運動過程；再to「留聲」呈現九0年代以後漸漸仔形成風氣ke阿姆話書寫ke台灣新文學；盡尾透過「牽聲」展現從事母語教育、研究lâu推廣ke今晡日面貌。展區除忒yû當代ke情境呈現外，ya voi展示關鍵歷史文件，比將講，國語推行委員會關防啟用lâu編制表、教育廳提臺灣省非常時期教育綱領實施辦法案等珍貴史料數位檔案liá-teû；另外還規劃以電台為情境ke互動裝置，做得錄製民眾ke聲音lâu影像，參觀者做得利用QR-Cord lâu個人擔任DJ ke影像帶走，檔案ya 做得留存中心成為客家文化資產。

　　客家委員會李永得主委說：「身為現代客家人，我們除忒oi珍惜liá得來不易ke阿姆話發聲權，lâu傳承語言、推廣文化當作自家責任以外，還oi輒常思考客人ti各方領域對台灣ya-he世界yû mak-kai貢獻？Ya想望致力彰顯liá部分，比將講客家文學影響台灣文壇yi深，做得講he台灣文學代表，目前客委會就ti努力lâu重要ke客家文學家經典著作，翻成mò共樣國家文字發行海外，就he期望將來有一日yû客家文學著作得著諾貝爾獎，讓世人肯定客家。」

　　客家文化發展中心何金樑主任ya表示，未來會繼續舉辦阿姆話音檔lâu阿姆話運動相關紀念特展lâu活動，以mò共樣ke模式多方宣揚阿姆話ke重要性。Liá擺特展he客家委員會全國性還ngài阿姆話30週年系列活動之ㄧ，ḿ過，lâu年在靜態策展mò共樣，本展融入且呈現當多ke客家聲音，voi收錄千人音檔，ti展期中ti本館入口處輪播，包含客家名人、海外客家人、外國人講ke客家話、台灣四海大平安各腔調，lâu其他各族群朋友ke阿姆話……超過1,300隻客話音檔。拜五ke開展記者會活動，苗栗縣文山國小學生，重現當年「推動國語、禁止母語」ke校園情境，以詼諧逗趣ke口說短劇演出該段pûn「噤聲」ke歲月；續等ko由識ti客發中心服替代役、入圍2017年金曲獎最佳客語歌手ke曾仲偉，帶等卓蘭國小合唱團用海陸腔合唱一首「禾呈記趣」，展現出經過客家前輩爭取母語「發聲」ke努力，致力「留聲」，三十年後ke今晡日，ên做得ti學校快樂學唱客家歌，透過動態表演藝術lâu展覽內容相互輝映，就he希望所有參觀者yû還啊多ke對話，做得共下繼續傳揚阿姆話。